འདི་གར་བཞད་པའི་མེ་ཏོག་ཚོགས་ཀྱང་
ཧ་ཅང་དགའ་བའི་འཛུམ་ལ་བྲེལ།།
དལ་བུར་ལྡང་བའི་རླུང་བུ་ཕྲ་མོས་ནེའུ་གསིང་ཚལ་གྱི་
དྲི་ཞིམ་ཁུར།།
བདག་གི་སྒོ་ལྔའི་རྣམ་ཤེས་ཚོགས་ཀྱང་སྟོན་མོའི་
ཚོགས་ལ་རྣམ་པར་གཡེང་།།
འཁྲིས་སུ་བཞད་པའི་རྩྭ་ལྗང་རེ་རེས་བརྩེ་བའི་
ཉམས་ཀྱིས་ང་ལ་ལྟ།།
བསྟར་ལ་བརྒྱུས་པའི་མེ་ཏོག་སྣ་ཚོགས་
གཅིག་ལ་གཅིག་གིས་འགྲན་པ་ལྟར།།
ལང་ཚོའི་སྤུད་པའི་ཟེའུ་འབྲུ་ངོམ་བཞིན་རྐང་དྲུག་
གཞོན་ནུ་བསླུ་བར་བརྩོན།།
ཤིན་ཏུ་དྭངས་པའི་ཟིལ་བ་དེ་ཡང་རྩྭ་དང་རྩི་ཤིང་
མགུལ་ལ་སྤྲས།།
གར་ལ་རྩེན་པའི་བྱེའུ་ཆུང་འཇོལ་མོས་སྐོམ་གྱིས་
གདུང་བ་འདི་ཡིས་བསལ།།
དཔྱིད་ཀྱི་དཔལ་མོས་མགྲོན་དུ་བོས་པའི་
སྐྱེ་ལྡན་སྲོག་ཆགས་སྣ་ཚོགས་ཀྱིས།།
དགའ་བའི་གྲེ་འགྱུར་བརྡ་དང་ཚིག་གིས་
ཚིམ་པ་མེད་པར་གར་ལ་རྩེན།།
གནས་འདིར་འབབ་པའི་ཆུ་ཕྲན་ཚོགས་ཀྱིས་
བརྩེ་བའི་གཞས་ཀྱང་ངག་ལ་ཐོགས།།
རི་ལུང་ཐང་གསུམ་བརྩེ་བའི་ཚོན་གྱིས་བདག་
སེམས་བསླུ་བའི་གར་མཁན་མ།།
༼ ཚུལ་མཁས། ༽