རང་མལ་སའི་གནས་ནས་སྔ་མོ་རུ་ལངས་ཏེ།།

ངའི་སྒེའུ་ཁུང་འགྲམ་དུ་མིག་ཟུང་རེ་འཕེན་དུས།།

ཡིད་རྣམ་རྟོག་ཚོར་བའི་རང་སྣང་ལ་རྩེན་པས།།

ལར་ཚོར་བའི་པི་ཝང་དྲུག་འགྱུར་ཞིག་དཀྲོལ་འགྲོ།།

ཞོགས་སྐྱ་རེངས་གསར་པ་རི་སྒང་ནས་འཛུམ་སྟེ།།

མདངས་འོད་དུ་བཀྲ་བཞིན་ངའི་འགྲམ་དུ་ཕོག་པས།།

ལུས་དྲོད་ཀྱིས་གསོས་པའི་སྐྱིད་སྣང་ཞིག་བྱུང་ལ།།

ལག་སྨྱུག་ཁའི་ཚོར་བ་མྱུར་མྱུར་གྱིས་བསྐྱུགས་སོང་།།

ཡུལ་སྡེ་བའི་དུ་ཞག་ལང་ལོང་དུ་གཡོ་བཞིན།།

དྭངས་སྔོ་ཞིང་ལྡེམ་པའི་ལམ་བར་ལ་བརྩོན་གྱིས།།

ངའི་སྒེའུ་ཁུང་རྩེ་མོ་མགོ་དཀྲིས་སུ་བཅིངས་ཏེ།།

སྟོད་ཉི་ཟེར་ལྷན་དུ་རྒྱང་རིང་ནས་ཡལ་སོང་།།

གནས་ངེས་མེད་འཕུར་བའི་བྱ་ཁྱུ་ཡི་གཤོག་སྒྲས།།

ངའི་རྣ་བར་གཟན་གྱིས་གང་ས་རུ་ལྡིང་ཞོར།།

སྐད་སྙན་ལ་འཁྱོག་པའི་སྣ་མང་འགའ་བཏོན་ཏེ།།

མཐོ་ལྗོན་པའི་སྟེང་ནས་མཆུ་དག་རེ་སྦྱོར་སོང་།།

ལྡེམ་རླུང་གིས་འདེད་པའི་རྒྱ་ལྕང་གི་ལོ་མ།།

ངའི་སྒེའུ་ཁུང་འཁྲིས་སུ་ཅི་དགའ་རུ་ཐོར་བས།།

མཛེས་འདབ་མ་རེ་རེ་སྣང་ངོར་ལ་སྦྱོར་གྱིས།།

ཡིད་ཚོར་བའི་དགའ་མ་ཆུ་བོ་བཞིན་བསྐྱོམས་སོང་།།

ཤེལ་སྒེའུ་ཁུང་ཕྱེས་ཏེ་རྒྱང་རིང་ལ་བལྟ་བཞིན།།

རླུང་བསིལ་འཇམ་གདོང་ངོས་གཡོ་བ་རུ་བྱེད་དུས།།

ངའི་སྐྲ་ལོ་རལ་པ་རྒྱབ་ངོགས་སུ་བསྐྱོད་པས།།

ཞེ་དྲན་པའི་ཁོང་གི་ཆུང་འདྲིས་དེ་དྲན་བྱུང་།།

དབྱིངས་གནམ་མཐའི་ཀློང་ནས་སྤྲིན་དཀར་གྱི་ཚོམ་བུས།།

སྡོད་ངེས་མེད་གང་སར་རྒྱུ་བ་རང་བརྩོན་བཞིན།།

བདག་ལྟེ་མཚལ་འཕོས་པའི་ཡུལ་ཕྱོགས་སུ་ཉེ་བས།།

སེམས་དག་པའི་ནང་ནས་ཕ་ཡུལ་ཡང་དྲན་སོང་།།

ཆུ་དྭངས་མོས་ག་ལེར་བཞུར་བ་ཞིག་ཐོས་བྱུང་།།

ངའི་སེམས་པ་དགྱེས་པའི་རང་སྣང་ཞིག་ཚོར་གྱིས།།

མཛེས་ཚོར་རྟོག་ཤ་རུས་སྦྲིད་པ་ཞིག་རྩེན་ཏེ།།

ཡིད་རང་ཞལ་བརྡར་བའི་ཚོར་བ་དེ་འཕྱུར་སོང་།།

རྩྭ་འཇག་མ་བསིལ་བསེར་རླུང་བུ་ཡིས་སྤུར་ཏེ།།

མཉེན་ལྡེམ་མེར་གཡོ་བའི་འགུལ་བ་ལ་བསམས་ན།།

སེམས་འདུན་པའི་སྣང་བ་ཆུ་རིས་སུ་འཁྲིགས་ལ།།

བརྗོད་མི་ཚར་ཡིད་འགྱུ་མི་སེམས་སུ་སྨིན་ཡོང་།།

ཚོར་སྣང་བའི་བཞིན་མདངས་འཛད་རྒྱུ་ཞིག་མེད་ཀྱང་།།

དུས་རྒོངས་ཀ་ཚེས་པས་བསིལ་གྲིབ་ཀྱང་གུག་སོང་།།

ངའི་སྙན་ངག་སྒྱུ་འཕྲུལ་རང་སེམས་སུ་རྒྱས་ཀྱང་།།

ད་འདི་གའི་མཚམས་སུ་ངལ་བ་ཞིག་གསོ་འགྲོ།།

༼ སྙན་རྐང་གླིང་། ༽