སྣང་བའི་བྲོ་གར་འཁྲབ་པའི་པདྨའི་ཚལ།།
དགའ་མ་འཛུམ་པའི་ཀུ་མུ་ད་ཡི་ཞལ།།
གཡུ་ཆུང་ཟླ་བ་མ་ཡིན་འཛུམ་མིན་པས།།
སྨུག་པ་ལང་ལོང་སེམས་པའི་གཤིས་ལ་འཐིབས།།
ཆུ་ཟིལ་གྱིས་མྱོས་འགོ་ལྕོག་ལྡེམ་ལྡེམ་གྱི།།
དཔྱིད་ལ་བཞད་པའི་མེ་ཏོག་འདབ་སྟོང་ཉིད།།
བརྩེ་བའི་སྟངས་སྟབས་མངོན་པའི་སྒེག་པ་ཡིས།།
སྤང་ལ་མ་བཞད་སྙིང་གི་དཀྱིལ་ལ་ཚེས།།
ཞེ་ཡི་མཚོ་མོ་གཡས་སུ་འཁྱིལ་བ་དང་།།
དེ་གར་བཞད་པའི་འདབ་རྫོགས་པདྨ་ལ།།
འདམ་གྱིས་མ་གོས་མཛེས་སྡུག་ཅི་དགར་ངོམས།།
བཞད་པའི་ཡུན་ལ་ཨ་གསར་གྱིས་སྟོངས་ཤོག།
ཉིད་ཀྱིས་ཁོ་རང་སྙིང་གི་དཀྱིལ་ལ་ནི།།
བཟུང་ནས་ནམ་ཞིག་ཕྱི་ཐག་ལྷོད་བྱས་ན།།
སྣང༵་བའི་ནམ་མཁར་གཡོ་བའི་ཉི་ཟླ་ཡིས།།
དག༵འ་བ་མཚོ་མོར་སྐྱུར་བའི་སྲིད་པའི་གཏམ།།
དགའ་སྐྱོའི་ཚོར་འདུ་སྐྱེན་པོའི་ཧྲག་བར་ནས།།
ལས་སྣང་གསར་དུ་བཤད་པའི་མེ་ཏོག་ཚེས།།
མགུལ་ན་ལྷོ་འུར་འཁྱུད་པའི་རི་བོའི་གཤམ།།
ལས་འཕྲོའི་དམ་ཚིག་སྲུང་བའི་སྡུ་གུ་མ།།
བྱ་ཁྱུའི་བསྟར་ཕྲེང་ལྷོ་རུ་ཕྱོགས་པ་ཡིས།།
དྲན་འཛིན་བུ་གར་སྣང་བའི་སྲིད་པ་ཆགས།།
ཁོ་བོའི་ཡི་གར་བཞེངས་པའི་ཁྱོད་ཉིད་ནི།།
ལས་ཀྱི་ཁུད་དུ་འབབ་པའི་གཙང་པོ་ཉིད།།
གཤིས་ལ་ལྷོད་ཆགས་ཡིད་འོངས་སྒེག་མོ་མ།།
ལོ་ཟླའི་འགྲོས་ལ་བརྩེ་བས་འཁྱུད་མོ་རྒྱབ།།
སྔོན་གྱི་བསགས་འབྲས་ཕྱེད་ཀ་འདིར་ཟད་ཀྱང་།།
བརྩེ་བའི་གཤོག་ཟུང་འཇུས་ལ་སྐལ་བས་དབེན།།
ཟླ་བའི་ངོགས་ན་སྤྲིན་པ་ཐར་ཐོར་རྒྱུ།།
བརྩེ་བས་བསླུས་བའི་སེམས་པ་ཆུ་བོའི་གཞུང་།།
ཁྱོད་ཞལ་པདྨོར་བདག་སེམས་བུང་བའི་ཚོགས།།
ཡང་ཡང་འཁོར་བ་སྲིད་པའི་དཔེ་ལ་ཆགས།།
ཁུ་སིམ་མཚན་ལྗོངས་སྲིད་པའི་འཆར་ཡན་རྒོད།།
དོན་འགྲུབ་ལྷ་ཡིས་བདག་ཟུང་བརྩེ་བས་བསྐྱངས།།
སེམས་སོང་སྒྲོལ་མ་རྟོག་འགྱུའི་ཁུད་ན་མཛེས།།
སེམས་ཀྱི་རི་སུལ་ཉུལ་ལ་དེ་བས་སྤྲོ།།
ཡང་དག་འགྲོགས་ལ་བར་ཆད་རྡུལ་རླུང་འཚུབ།།
སོ་སོར་བྲལ་ལ་སེམས་པའི་སྟེང་འོག་བརྗེས།།
ལས་དབང་ཆུ་ལ་སྐྱུར་བར་མ་བཟོད་པས།།
ཨུ་ཚུགས་སྒྲོམ་ལ་ཁོ་བོ་ཡང་ཡང་བཅུག།
སེམས་ཀྱི་སྤྲིན་པ་ལས་ཀྱི་རླུང་བུས་དེད།།
ཁྱོད་ཞལ་པདྨོ་ལྷ་མོའི་རྗེས་ཆགས་པ།།
ཞེན་ཆགས་མེ་ཏོག་བཞད་སའི་ཁྱོད་ཉིད་ལས།།
ཡིད་ཀྱི་མཁའ་རུ་འཛུམ་པའི་ཟླ་བ་གང་།།
༼ པུར་རྒྱལ་བ། ༽