མི་ཚེ་ཟློས་གར་ཡིན་ན། །
མི་རྣམས་གར་མཁན་ཡིན་ན། །
འཚོ་བ་རྩེད་མོར་བསྒོམས་ན། །
དགོད་འཛུམ་ངོ་ལས་ཨེ་ཡལ། །
བདེ་སྐྱིད་རྒྱ་མཐོངས་ཡིན་ན། །
སྡུག་བསྔལ་རྒྱ་མཚོ་ཡིན་ན། །
གནས་ཚང་རི་ཁར་བཅས་ན། །
མྱ་ངན་མགོ་ལ་ཨེ་འཛེགས། །
ལོངས་སྤྱོད་དགག་བྱ་ཡིན་ན། །
རྒྱས་སྤྲོས་ཐན་དུ་བརྩི་ན། །
འཚོ་སྡོད་སྨྲ་བའི་སྲོག་རྔ། །
གང་ལ་བརྟེན་ནས་བསྲིང་ངམ། །
མེད་པོ་རྒྱུ་ཡིས་ཕོངས་ན། །
ཡོད་པོ་གཉིད་ཀྱིས་སྟོངས་ན།
བར་མ་ཚང་གི་བུ་ལ། །
རྒྱུ་གཉིད་འདང་ངེས་ཨེ་ཡོང་། །
ཡོད་ཚད་མར་རྒྱུར་ཡིན་ན། །
དགྲ་གཉེན་ངེས་པ་མེད་ན། །
དགྲ་འདུལ་གཉེན་སྐྱོང་བྱ་བར། །
ལོ་ཟླ་གཏོང་དོན་ཨེ་གདའ། །
རྒྱུ་འབྲས་བསླུ་མེད་ཡིན་ན། །
ཁྲིམས་རྒྱ་གཉའ་ཤིང་ཡིན་ན། །
གཡོ་ཁྲམ་ལྐོག་ཇུས་བཤམས་ནས། །
གནོད་པ་སྐྱེལ་དོན་འདུག་གམ། །
ཕ་མ་དཀོན་མཆོག་ལས་ཀྱང་། །
ལྷག་པའི་འདུ་ཤེས་ཡོད་ན། །
"བརྒྱ་ལོར་སྐེ་བཙིར"གཏང་ཡུལ། །
ཕ་མ་བྱེད་དོན་འདུག་གམ། །
སྡུག་བསྔལ་རླབས་ཕྲེང་བརྩེགས་པའི། །
འཁོར་བ་གཙང་པོའི་གཞུང་རེད། །
བདེ་བ་ལྦུ་ཕྲེང་གཡེང་བའི། །
འཇིག་རྟེན་མི་ཡུལ་ཁམས་རེད། །
༼ ལུག་རྫི། ༽