ལན་ཆགས་རི་བོ་ཙམ་ཞིག་འཁུར་གྱིན་དུ།།
སྐྱིད་སྡུག་འབྲས་བུ་སྨིན་པའི་གནས་སུ་རྒྱུ།།
ལས་འབྲས་མེ་ཏོག་རྙིད་པའི་དངན་པ་ཞིག།
མི་འདོད་ཡིད་ཀྱི་ཕུག་ནས་ཤོར་བར་གྱུར།།
ཐག་རིང་ཟླ་བ་ངུ་བའི་ཚུགས་ཀ་དེ།།
མཐའ་མར་ཁྱོད་ལ་ཕུལ་བའི་དྲན་རྟེན་བཞིན།།
མེ་ལོང་ཟུར་གསུམ་ནང་ནས་ཁོ་བོ་ཅག།
ཅུང་ཙམ་དགོད་འདོད་ཡོད་ཀྱང་དགོད་མི་ནུས།།
རི་བོ་ཐང་ལ་ངལ་བའི་ཞོགས་པ་ཡང་།།
འཕྲིན་པ་བསྐུར་ས་ནོར་བའི་ཁོ་བོ་བཞིན།།
ཚིག་གི་རྒྱ་ལ་གྲོས་པའི་ཤཱ་བ་རི།།
སྤྲིན་པའི་ལྷན་དུ་རྨི་ལམ་རྫོགས་ཐབས་བྲལ།།
ཐང་སྟོང་ཐང་ཆེན་བརྒལ་བའི་སེམས་པ་ཞིག།
གྲིབ་ནག་དེ་ནས་གསལ་ཐབས་མེད་ན་ཡང་།།
མཛེས་མའི་མགུལ་ལ་བཏགས་པའི་སྲུང་མདུད་བཞིན།།
ལས་དང་སྨོན་ལམ་འོག་ཏུ་ཉལ་མི་འདོད།།
ཚེ་ཐོག་འདི་ལ་འཁྲུངས་པའི་ཀུན་རྟོག་བརྒྱ།།
མཐའ་མར་ཁྱོད་ལ་བྱིན་པའི་གློ་མཆིན་ལྟར།།
སྤྲིན་པ་ཡར་འགྲོ་དག་གིས་མི་མཐོང་རུང་།།
མར་འགྲོ་གསེར་ཉ་ཞིག་གིས་མཇལ་ན་འགྲིག།
ལོ་ཟླའི་མྱ་ངན་ཁ་བ་འབབ་པ་བཞིན།།
ང་ཡི་མིག་ཀོང་ནང་དུ་ཟེགས་པ་ན།།
ཡུན་རིང་ཚོར་བ་ཉམས་པའི་ཁ་ཤ་འདི།།
དལ་གྱིས་འགུལ་བ་དེ་ལ་སུ་ཞིག་དངངས།།
ཟླ་བ་ཁྱིམ་ལ་ལོག་སོང་མ་ཟེར་རུང་།།
ཐུན་མཚམས་ནག་གེར་ལུས་པས་གསལ་བར་གྱུར།།
འུ་གཉིས་ཞེས་པའི་ཚིག་གི་འཁོར་བ་ན།།
ང་ཡི་རྣམ་ཤེས་ཉིན་དང་མཚན་ལ་འཁྱམས།།
བུ་མོ་ཨ་གསར་ཅན་གྱི་གོས་སྣེ་རུ།།
ལོ་ཟླའི་རྦ་རླབས་འཕྱོ་བ་སུ་ལ་གསང་།།
གཏམ་དང་ཚིག་གི་འགོ་རྔ་སྒྲིག་པ་ན།།
སེམས་ཀྱི་མེ་ཏོག་གཞི་ནས་བཞད་འདུག་ཟེར།།
ང་ཡིས་རི་བོ་ཞིག་གི་རྣམ་ཐར་གླེང་།།
རྣམ་ཐར་ཕག་གི་ཨུ་དུམ་ཝཱ་ར་གླེང་།།
འདབ་ལག་གྲོལ་བའི་བར་ལ་ཐོན་པ་ན།།
བརྩེ་དུང་ཡོད་ཚད་རྒོད་ལ་སྦྱིན་པར་བྱ།།
རྨི་ལམ་རླུང་གིས་གཏོར་བའི་སྡུག་བསྔལ་གྱིས།།
ཁ་ཚིག་མང་ཡང་བདེན་དོན་མི་འདུག་ཨང་།།
ཆུ་བོ་གྱེན་དུ་ལྡོག་པའི་ཆོ་འཕྲུལ་ལས།།
ཕ་ཡུལ་དྲན་པའི་མགུར་ལ་འཐོམས་ནས་འགྲོ།།
༼ འཕུར་སྐྱོད། ༽