སྙིང་ཉེ། བོད་ཟླ་ལྔ་པའི་ནང་ལ་ཁ་བ་བབས་བྱུང་།
མི་ཚོས་དབྱར་ཁའི་ཁ་བ་ལ་མང་པོ་འཆད་ཀྱིན་འདུག།
འོན་ཀྱང་། དབྱར་ཁར་ཁ་བ་འབབ་པ་ནི།
དབྱར་ཁའི་མཛེས་པ་མངོན་ཚུལ་གཞན་ཞིག་ཡིན་ནམ།
ཡང་ན། དབྱར་ཁའི་མེ་ཏོག་དང་གཡུ་སྦྲང་
དག་གི་སྨོན་པ་གཞན་ཞིག་ཡིན།
བོད་ཟླ་ལྔ་པའི་ནང་ལ་ཁ་བ་བབས་བྱུང་། སྙིང་ཉེ།
མེ་ཏོག་གི་མགུལ་ན་ཁ་བ་ཐར་ཐོར་བབས་འདུག།
གཡུ་སྦྲང་གི་སེམས་ལ་ཁ་བ་ལྷབ་ལྷུབ་བབས་འདུག།
འབྲི་ནག་གི་ལྷས་ན་ཁ་བ་ཚམ་ཚོམ་བབས་འདུག།
འབྲོག་མོ་དག་གི་མཁུར་མགོ་ན་ཁ་བ་བུ་ཡུག་འཚུབ་འདུག།
སྦྲ་ནག་གི་འདབ་ན་ཁ་བ་བོང་བོང་བབས་འདུག།
གྲོང་ཁྱེར་གྱི་མཐའ་ན་ཁ་བ་ཁྱོན་ནས་འབབ་མི་འདུག།
སྙིང་ཉེ། བོད་ཟླ་ལྔ་པའི་ནང་ཁ་བ་བབས་བྱུང་ནའང་།
རྒྱ་གུར་གྲུ་བཞིའི་ནང་ན་ཁ་བ་ཚོར་གྱིན་མི་འདུག།
སྙིང་ཉེ། ཁ་བ་ནི་ལྷ་ཡུལ་ནས་བབས་པའི་
དངོས་གྲུབ་ཡིན།
ཁ་བ་ནི་མི་ཡུལ་ལ་སྐྱེས་པའི་མེ་ཏོག་ཡིན།
ཁ་བ་ལ་རེག་བྱ་གྲང་མོ་ཞིག་ཡོད།
དེ་ནི་མཐོ་སྒང་ནས་སྐྱེས་པས་ཡིན།
ཁ་བ་ལ་སེམས་པ་དཀར་པོ་ཞིག་ཡོད།
དེ་ནི་བོད་ཡུལ་ལ་བབས་པས་ཡིན།
བོད་ཟླ་ལྔ་པའི་ནང་ཁ་བ་འབབ་དུས།
སྙིང་ཉེ།
ངས་གཞས་ཚིག་ཅིག་དྲན་བྱུང་།
གཞས་པ་ཞིག་ཀྱང་དྲན་བྱུང་།
“ཁ་བ་མར་མར་འབབ་དུས།།
ང་ཡི་འགྲོ་ལམ་བཀག་བྱུང་།།”
སྙིང་ཉེ། བོད་ཟླ་ལྔ་པའི་ནང་ཁ་བ་བབས་བྱུང་།
རྨི་ལམ་ཞིང་གི་ལྗོན་པ་དེའི་རྩེ་ན་ཁ་བ་ཡོད་དམ།
སྤྲིན་པ་ལྷོ་རུ་ལྡིང་བའི་ཕར་ངོགས་ན་ཁ་བ་ཡོད་དམ།
༼ གཡེར་མ། ༽