སོར་མོའི་འདེགས་འཇོག་གི་བར་ན།།
ངག་གི་རྒྱ་མཚོ་རང་བསྐྱིལ་བའི།།
སེམས་ངོགས་ཟླ་གཞོན་གྱི་ཚོར་འདུ།།
རླབས་ཀྱི་འགྲམ་ངོགས་ན་ཤར་བྱུང་།།
སྐར་མ་བརྒྱ་འཛོམས་དང་སྟོང་འཛོམས།།
དྲན་པའི་ནམ་མཁའ་དེ་གསལ་བས།།
མཚན་མོའི་འུག་ཁྱུ་བཞིན་འཕུར་ནས།།
དལ་བ་ཁྱོད་ས་རུ་ཉུལ་འདོད།།
ནང་སེམས་སྤྲིན་དཀར་གྱི་ལང་ཚོར།།
དམ་ཚིག་མཐུན་ལུང་གི་འཕྲིན་པ།།
སྙིང་གཏམ་བསིལ་རླུང་ལ་བཏབས་ནས།།
ན་ནིང་ཆུང་འདྲིས་དེར་འཕྲོད་ཤོག །
ལོ་དང་ཟླ་བ་རེ་བརྒལ་མཚམས།།
འགྱུར་བ་མི་རྟག་གི་ཟློས་གར།།
ད་ཡོད་ད་མེད་ཀྱི་འགྱུ་བག །
སེམས་པའི་རུམ་གསེང་དུ་སྐྱོ་སོང་།།
རས་རྐྱང་ན་བཟའ་ཞིག་སེར་གྱིན།།
ལུས་ངག་ཆོས་གྲལ་དུ་འཚང་ཡང་།།
བློ་སེམས་ཁྱོད་ཉིད་ལ་འཐིམས་པས།།
ཞི་བའི་རྒྱལ་ས་དེ་མ་རྙེད།།
ཁྱོད་ཀྱི་འཛུམ་ཆུང་དེ་གཡར་ན།།
དམྱལ་ཁམས་འགྲིམ་དགོས་གཅིག་བྱུང་ཡང་།།
འགྱོད་མེད་ཞེ་ཐག་འདི་ཆོད་པས།།
ཟུར་མིག་ལན་གཅིག་ཙམ་འཕེན་རོགས།།
ངལ་དུབ་བཅོ་བརྒྱད་ཙམ་བརྒལ་ཡོད།།
རྔུལ་ཆུ་བརྒྱ་ཕྲག་གཅིག་ཕྱིས་ཟིན།།
ལས་ཀྱི་འདུན་མ་དེ་འགྲིག་ན།།
མཇལ་འཛོམས་སྨོན་པ་དེ་བཏབ་བཞག །
༼ རང་མདངས། ༽