ངས་དཀར་ཡུག་ཡུག་གི་ཁ་བའི་ངོས་སུ།
ཁྱེད་ཀྱི་རྣམ་པ་རི་མོར་བྲིས་ཏེ།
ནམ་མཁའ་དང་བྱེའུ་དག་ལ་གཟིགས་སུ་བཅུག།
འོན་ཀྱང་། ནམ་མཁའ་ནས་ཁ་བ་འབབ་བཞིན།
བྱེའུ་ཡིས་ཅ་ཅོ་སྒྲོག་པ་ལས།
ངས་ཁྱེད་རང་དྲན་བཞིན་པ་རྟོགས་ཀྱིན་མི་འདུག།
གང་ལྟར།
ཨ་ཕ་ལགས།
ངས་ཁྱེད་རང་ཡང་ཡང་འབྲི་འདོད།
ཨ་ཕ་ལགས།
ངས་འཇམ་ཐིང་ཐིང་གི་ཤོག་དཀར་ངོས་སུ།
ཡི་གེ་དང་ཡི་གེ་མཐུད་ནས།
ཁྱེད་ཀྱི་བརྩེ་བ་དང་དྲན་གདུང་བྲིས་ཏེ།
ཨ་མ་དང་གཉེན་ཉེ་དག་ལ་ཀློག་ཏུ་བཅུག།
འོན་ཀྱང་། ཨ་མ་ཡིས་མིག་ཆུ་བཞུར་བཞིན།
གཉེན་ཉེ་ཡིས་མ་ཎི་བཟློས་པ་ལས།
ངས་ཁྱེད་རང་དྲན་བཞིན་པ་རྟོགས་ཀྱིན་མི་འདུག།
གང་ལྟར།
ཨ་ཕ་ལགས།
ངས་ཁྱེད་རང་ཡང་ཡང་འབྲི་འདོད།
ཨ་ཕ་ལགས།
ངས་གཉོམ་དུང་དུང་གི་སེམས་པའི་ངོས་སུ།
ཁྱེད་ཀྱི་ཆ་ལུགས་དང་ཚུགས་ཀ་དག་བྲིས་ཏེ།
ནམ་ཡང་བསུབ་པ་མེད་པར་སེམས་ལ་ཟུག་ཏུ་བཅུག།
འོན་ཀྱང་།
ལོ་ཟླ་ནི་འདའ་བཞིན་འདའ་བཞིན།
ཉི་མ་ནི་ནུབ་བཞིན་ནུབ་བཞིན།
ངས་ཁྱེད་རང་དྲན་བཞིན་པ་རྟོགས་ཀྱིན་མི་འདུག།
གང་ལྟར།
ཨ་ཕ་ལགས། ངས་ཁྱེད་རང་ཡང་ཡང་འབྲི་འདོད།
༼ ཁ་བ་ན་རོ། ༽