ཐུན་གསུམ་རྨི་ལམ་ཞིང་དུ་ཕེབས་པའི།།
མ་མཇལ་ཞལ་གྱི་དཀྱིལ་འཁོར་དྲོན་མོ།།
ཡིད་ཀྱི་མཆོད་ཁང་གྲུ་བཞིའི་ཀློང་ནས།།
འཛུམ་ཙམ་འཛུམ་ཙམ་བྱས་པ་དྲན་ནོ།།
འཇིག་རྟེན་ཚལ་གྱི་སྤང་ཐང་ཡངས་མོ།།
བརྩེ་བའི་གྲིབ་མས་འུབ་ཀྱིས་བསྡུས་ན།།
ཚོར་བའི་སྒྲོ་གཤོག་རྒྱང་དུ་བརྐྱངས་ཏེ།།
དགའ་ཙམ་དགའ་ཙམ་བྱས་པ་དྲན་ནོ།།
སྙིང་ཆུང་རྐུན་པོས་དུམ་བུར་གཤགས་ན།།
སེམས་དྲོད་ཉི་མས་འོད་ལས་བཟུང་སྟེ།།
ན་ཆུང་ཐུགས་ཀྱི་མཛའ་མཐུན་སྣང་བ།།
བདེ་ཙམ་བདེ་ཙམ་གནས་པར་དྲན་ནོ།།
སྣ་ཚོགས་གར་གྱིས་བཟི་བའི་ཚོགས་སུ།།
སྨོན་ལམ་གཅིག་གི་འདུན་མ་བཏབ་ཚེ།།
ལས་འཕྲོས་གནང་བའི་དམ་ཚིག་འོ་ཇ།།
དལ་གྱིས་དལ་གྱིས་བཞེངས་པ་དྲན་ནོ།།
ཉི་ཤུའི་ལོ་ཟླའི་མཚམས་ལས་བརྒལ་ན།།
ཚོར་བའི་བདེ་སྡུག་ཐང་ནས་བརྡོལ་ན།།
གཞོན་སེམས་དྭངས་གཙང་རི་མོ་དེ་ནི།།
ཡང་ནས་ཡང་དུ་མཐོང་ཕྱོགས་དྲན་ནོ།།
སྐྱིད་སྡུག་བང་ཁའི་ཁྲོད་ནས་རྙེད་པའི།།
དར་རྒུད་ཐིག་རིས་ངོས་སུ་བཀྲམ་པའི།།
བདེ་སྡུག་ཚོར་བའི་མངར་ཁ་བཞེས་ཏེ།།
སྟབས་ཙམ་སྟབས་ཙམ་བྱུང་བ་དྲན་ནོ།།
མཚར་སྡུག་འཇའ་ལ་རྟག་པ་མེད་མོད།།
མི་རྟག་མདངས་ཀྱིས་གྲུབ་པ་ཤེས་ཀྱང་།།
ལོ་ཆུང་སྣང་བའི་མེ་ཏོག་དཀར་དམར།།
བཞད་ཙམ་བཞད་ཙམ་མྱོང་བ་དྲན་ནོ།།
འཁོར་བའི་གྲུ་ཆེན་ཞུགས་པའི་འོ་སྐོལ།།
ལས་ཉོན་བྲན་ལས་ཐར་བར་མེད་ཕྱིན།།
དྲན་འཕྲུལ་སྒོ་མོས་བཏང་བའི་གླུ་འདི།།
སྣང་བའི་མེ་ཏོག་བཞག་པའི་རྟེན་བྱོས།།
༼ གངས་ཆབ་ལྷ་སྲས། ༽