རི་ཡི་རྩེ་ནས་འཆར་བའི་ཉི་ཟླ་ཆ་གཅིག།
ཡིད་ཀྱི་གུར་ཁང་བརྒྱུད་དེ་གང་དུ་ཕེབས་ཀྱང་།།
ངག་རིག་འགྱུར་ཁུག་བསྡོངས་པའི་ལྷ་མོ་མེ་ཏོག།
གཟིམ་མེད་ཡུན་དུ་བདག་གི་ནམ་མཁར་བཞུགས་དང་།།
སྨུག་པའི་ན་བུན་གསེབ་ཀྱི་དྲན་པ་སྙི་མོ།།
དབྱངས་ཀྱི་འཕྲེད་ལ་བཀུག་སྟེ་གླུ་གཞས་ལེན་དུས།།
དགའ་སྐྱོའི་གསང་བ་མོལ་བའི་ན་ཆུང་སྨིན་ལེགས།།
ཞལ་ལ་དམར་མདངས་དོད་པའི་མཛེས་ཉམས་ཅན་པོ།།
ང་ནི་སྙན་དང་མི་སྙན་ངག་རིག་འཇིངས་ནས།།
བག་ལྷོད་ངལ་གསོ་ཞུགས་ནས་མཛེས་མའི་དྭངས་རྩེ།།
ངག་སྙན་མཚོ་བྱུང་པིར་གྱི་རྩེ་ནས་འབོད་བཞིན།།
མཐའ་མེད་འཇིག་རྟེན་ཉུལ་ཏེ་གང་ལ་ལོག་འགྲོ།།
ལས་ཀྱི་མཛའ་མཐུན་སྙིང་གྲོགས་རྒྱང་ནས་བསྐྱུར་ཅིང་།།
བྱམས་པའི་གཉེན་ཉེ་ཆུ་བོའི་འགྲམ་དུ་བཞག་ནས།།
རིག་གཞུང་མེ་ཏོག་ཚལ་ནས་འཚོ་ཁུལ་བྱས་ཀྱང་།།
དྲན་པའི་སྣང་བ་ལྷ་མོའི་ཕྱོགས་སུ་ཤོར་སོང་།།
གཞན་གསོས་ཁུ་བྱུག་གསུང་སྐད་ཐོས་པ་ཨེ་བྱུང་།།
ལྷོ་ཕྱོགས་ཚངས་པའི་བུ་མོའི་ཕྱི་མིག་ཨེ་གནང་།།
འདི་ཡི་ལམ་ཆུང་དཀྱིལ་ནས་གང་དུ་ཕྱོགས་ཀྱང་།།
འདུན་མའི་རེ་ལ་དབྱངས་ཀྱི་དར་ཆ་འཐེན་ཡོད།།
སྤྲིན་དཀར་གང་ལ་རྒྱུ་བའི་ནམ་མཁའི་གཞུང་ན།།
ན་ཚོད་བཅུ་དྲུག་ཅན་གྱི་འཇམ་དབྱངས་རྣམ་སྤྲུལ།།
སྤྲུལ་པའི་དབྱངས་ཅན་ལྷ་མོའི་མཚར་སྡུག་ཡོངས་རྫོགས།།
རྫོགས་ལྡན་དུས་ཀྱི་བསྐལ་པར་ལྷག་ཏུ་མཇལ་འདོད།།
འདི་ན་ཉམས་སྣང་མེ་ཏོག་འདོད་འཇོའི་རྩེ་ལ།།
བརྩེ་སེམས་དབྱངས་ཀྱི་འབྲུ་རྟས་རི་མོ་བྲི་དུས།།
གང་ལ་གང་གི་ཉི་མ་ཡང་ཡང་ཤར་བའི།།
ངག་རིག་ཟླ་བའི་སྲིང་མོ་སྙིང་ལ་འཁྲུངས་བྱུང་།།
སྡེབ་སྦྱོར་ཚིག་གི་བཀོད་པ་ཇེ་མཛེས་བྱས་ཀྱང་།།
ཕུལ་བྱུང་སྙན་པའི་ངག་ཅིག་འཁྱོང་པ་དཀའ་ཡང་།།
རིམ་བཞིན་སྐས་ཐེམ་གཅིག་རྗེས་གཉིས་གསུམ་མཐུད་ནས།།
མུ་ནས་ཡར་ལ་བསྐྱོད་པའི་སྣང་བ་མཐོ་ཨང་།།
ཀུན་རྟོག་སྣང་བས་བསྐྲུན་པའི་ངག་རིག་སྐྱེམས་ཆང་།།
སྒྱུ་མའི་གར་ལ་བརྒྱུས་པས་མྱོང་རོལ་མཛོད་དང་།།
སེམས་གཞས་ཐན་ཐུན་རེ་ཡི་ཁུག་པར་བཞད་པའི།།
དབྱངས་གསལ་སྐར་ཚོམ་རེ་བའི་མཐིལ་དུ་དབབ་ཡོང་།།
མཐའ་མེད་འཁོར་བའི་ལམ་ལ་ཟད་མཐའ་མེད་ཀྱང་།།
མི་ཚེའི་སྲོག་འདི་ཅི་ཙམ་འཚོ་ཞིང་གནས་པར།།
སུས་ཀྱང་གཏན་ཁེལ་བྱེད་པ་ཧ་ཅང་དཀའ་མོད།།
འཚོ་བའི་ཡུན་དུ་འདུན་བརྩོན་གཅིག་གིས་ཆོག་གོ།།
མ་བཅོས་ལྷ་མོའི་ཞལ་རས་དགུང་ནས་བཙལ་ཆེད།།
ཐང་དཀར་གཤོག་པ་གཡར་ཏེ་མཁའ་ལ་འཕུར་འདོད།།
འཇའ་ཚོན་གསེབ་ཏུ་བཞུགས་པ་ལན་ཅིག་མཐོང་བས།།
འདོ་རིགས་རྟ་ལ་བཞོན་ནས་སྤང་ཐང་གཤག་ཡོང་།།
དགྱེས་འཛུམ་ངག་དབང་ལྷ་མོ་གྲོགས་སུ་ཁུག་ན།།
མཚོ་ཆེན་རྒྱ་མཚོའི་གཏིང་གི་ནོར་བུ་རྙེད་འདྲ།།
འདི་སྣང་མི་ཡུལ་སྲིད་པར་ཕྱི་ནང་དབུལ་ཡང་།།
མ་ཅིག་མཛངས་མ་མཁའ་འགྲོ་དེ་གས་ཆོག་རེད།།
༼ ཁམས་ཟླ་སྲས། ༽