དོ་ནུབ་ཀྱི་མཚན་མོ་འདིར།

ང་རང་ཁེར་རྐྱང་ངང་ཆུ་བོ་འདིའི་ཁ་ན་ཡོད།

སེམས་ཀྱི་སྐྱོ་གདུང་ཚང་མ་ཆུ་བོ་འདིས་སེལ་

བར་ནུས་སམ།

སེམས་ཀྱི་ལྷ་མོ།

ཁྱོད་ཀྱིས་བདག་གི་ནང་སེམས་ཀྱི་རྨི་ལམ་

དཀྲོགས།

ངས་རང་བྱུང་ཁམས་དང་ཁྱོད་ཉིད་ལྷན་

གཅིག་ཏུ་བསྲེས་ནས།

རེ་ཞིག་སེམས་པ་འདི་ལྷོད་ལ་འཇགས་

ཐབས་བྱས།

མཚན་མོ་འདིར།

སྙིང་ལ་གཟན་པའི་ཕྱི་རོལ་གྱི་ཁྱི་སྐད་འདི་

དག་གིས།

སྐྲག་སྣང་ཞིག་་གིས་སེམས་པ་འདི་བདེ་བར་

མ་གནས།

ངས་འབད་པ་ཆེན་པོའི་ཁྱོད་ལ་སྙན་ངག་

ཅིག་བྲིས།

འདི་ནི་ང་རང་འཇིག་རྟེན་གྱི་ཕ་རོལ་

བརྒལ་དུས།

ཁྱོད་ལ་ཕུལ་བའི་སེམས་ནང་གི་ལེགས་

སྐྱེས་ཡིན།

དོ་ནུབ་ཀྱི་ཆར་པ་འདི་དག་གིས།

ང་ཡི་ལུས་པོ་ཕྱི་ནང་བརླན་སོང་།

ང་ཡི་སེམས་ནས་བཞུར་བའི་སྙན་ངག་དང་།

མིག་ནས་བཞུར་བའི་མིག་ཆུས་ཁྱོད་

ཉིད་ལ་བདེན་དཔང་བྱེད།

གཉིད་མི་ཁུགས་པའི་ལོ་ཟླ།

ཁྱོད་ཉིད་དྲན་པའི་སྐྱོ་གདུང་གི་ན་ཟུག།

ཆར་པ་རླུང་བུའི་སྒྲ་སྐད་འདི་དག་གིས།

ནང་སེམས་རྙོག་མ་དེ་དག་སེལ་བར་

ནུས་སམ།

དཀོན་མཆོག་ལ་ཡེ་ཤེས་ཀྱི་སྤྱན་ཡོད་དམ།

སེམས་ཀྱི་ལྷ་མོ་ལ་དགའ་བའི་གདུང་བ་

འདི་མཁྱེན་ནམ།

སེམས་ཀྱི་ལྷ་མོ།

ངས་ཁྱོད་ལ།

སྐྱེ་བ་ཚེ་རབས་ཀྱི་ལན་ཆགས་ཤིག་མ་སོད་

པ་ཡིན་ནམ།

གསལ་ལ་མི་གསལ་བའི་མཚན་དུས་འདིར།

རང་བྱུང་ཁམས་དང་ཆར་རླུང་གི་སྒྲ་

བཙན་པོ་དེས།

ངས་སྐད་གསང་མཐོན་པོས་ཁྱོད་ཉིད་

བོས་ན་འདོད་ཀྱང་།

ཕྱི་རོལ་གྱི་ལྷིང་འཇགས་དཀྲོག་པར་ང་

རང་སྐྲག།

བདག་གི་ཡོད་ཚད་ནས་ཡོད་ཚད་ཁྱོད་

ལ་འབུལ་ཐུབ།

བདག་གི་ཚེ་སྲོག་གི་རྒྱུ་བ་ཕྲ་མོ་འདི་མ་

ཆད་བར་དུ།

ངས་ཁྱོད་ལ་རྣམ་དག་སེམས་ཀྱི་ལེགས་

སྐྱེས་འབུལ་ཐུབ།

གལ་ཏེ་ང་རང་འཁྲུལ་བ་མིན་ན།

ཐེངས་རེར་ཁྱོད་དང་བར་ཐག་ཉེ་བའི་

སྣང་བ་སྟེར།

དེ་དུས་སེམས་ལ་ཧ་ཅང་དགའ་བའི་སྣང་

བ་སྟེར།

ད་ལྟ་ཆར་རླུང་ཤིན་ཏུ་ཆེ་ཡང་།

ངས་ཁྱོད་ཉིད་སེམས་སུ་བཏགས་ནས་

སྙན་ངག་བྲིས་ན།

ང་རང་གིས་ཁྱོད་ལ་བཅངས་བའི་སེམས་

པ་དེ་ཁྱོད་ཀྱིས་ཤེས་ཐུབ།

དེ་བས་ང་རང་དཀའ་སྣང་གང་ཡང་

མི་འདུག།

༼ རི་སྤྱང་། ༽