མི་འགྱུར་རྡོ་རྗེའི་སྲོག་གི་ཀ་ཆེན་མིག་གི་
དཔྱིད་དུ་ཆེར་བསླངས་ཤིང་།།
གཞན་ཕན་འོད་ཀྱི་དྲ་བ་ལྗང་ཁུ་འཛིན་མའི་ཁྱོན་ལ་
འཁྱུད་པ་ཡིས།།
རྡོ་དང་ཚེར་མའི་ལམ་བུ་སྟོང་ཕྲག་འདས་སོང་ཀློང་ལ་
བྱིངས་མོད་ཀྱི།།
དྲན་པའི་རྡོ་རིང་ངོས་སུ་འོད་དུ་འཚེར་བའི་
གཏམ་རྒྱུད་སྨུག་པོར་གྱུར།།
སྲིད་ཇུས་གསེར་གྱི་ཉི་འོད་འཇམ་པོ་ཁོ་ར་
ཁོར་ཡུག་འཕྲོས་པ་ན།།
མཐུན་པའི་དཔལ་བེའུ་དམ་དུ་སྦྲེལ་བའི་
མི་རིགས་ལྔ་དྲུག་བདག་ཉིད་ཅན།།
དགའ་སྐྱིད་བྲོ་གར་སེམས་ཀྱིས་རྡུང་བཞིན་ཚེ་ཡི་
སྙིང་པོར་འཇུག་པ་ནི།།
བསྟོད་པའི་རྒྱལ་མཚན་ཞིང་དུ་མཆོད་པའི་གཞི་མ་ག་
རེ་མ་ཡིན་གྲང་།།
སྲོག་གི་རྟ་རྔ་བསྡོས་པར་ཕེར་བའི་སྐྱེས་ཆེན་གསེར་རིའི་
ཕྲེང་བ་ཡིས།།
འབད་པའི་གྲུ་ཁེམ་ཤེད་ཀྱིས་དཀྲུགས་པའི་
རེ་བའི་དཔང་བོའི་དན་རྟགས་སུ།།
མི་འཇིགས་ཁྲི་རུ་ཁ་ལོ་བསྒྱུར་བའི་ཀྲུང་ཧྭ་གསེར་ལྡན་
སྒེག་མོ་ཞེས།།
སྙན་པའི་བ་དན་ཕྱོགས་བཅུར་སྐྱོད་པས་
མཚོན་པར་སོམ་ཉི་ཅི་ལ་སྐྱེས།།
བཙན་པོའི་བདུད་ཀྱི་མཆུ་ཏོ་ནག་པོ་རྣོ་ངར་རལ་
གྲིས་འབྲེག་མཁས་ཅན།།
གཉོམ་ཆུང་གདོང་གི་པདྨའི་དབུས་ལ་བརྩེ་བའི་
བྱིལ་བྱིལ་མ་ཆད་པའི།།
དྲང་བདེན་གསེར་གྱི་སྨིན་མ་ཕྲ་མོ་གཞར་ཡང་ཕྱོགས་
སུ་མ་ལྷུང་བའི།།
སུ་ཡི་མཛད་པའི་ཕྲིན་ལས་དཀར་པོ་ས་
ཆེན་འཛིན་མའི་རྒྱན་དུ་འཕུར།།
རིག་པའི་གནས་སུ་ཧུར་གྱིས་འཇུག་པའི་
ཨེ་མ་བསྐལ་པའི་ཐོབ་སྐལ་གཅིག།
ཆོས་ཀྱི་ཆོ་ག་ཕྱག་ལེན་མ་ལུས་རང་མོས་ཡིན་པའི་
ལམ་ལུགས་གཉིས།།
དམངས་ཀྱི་འཚོ་བ་ཉིན་རེར་རྒྱས་པའི་
འཕོ་འགྱུར་སྟོང་གི་ཧྲག་བར་ནས།།
རང་སེམས་སྐྱིད་པའི་གླུ་ཆུང་ལན་གསུམ་དབྱངས་ཀྱི་
ཁུགས་པར་དཀྲིས་ན་སྙམ།།
གཟིགས་དང་ལྟོས་དང་སྣོད་ཀྱི་བཀོད་པ་
ལྷ་ཡི་ཁང་བཟང་བསྒྲུན་པར་ནུས།།
ཉོན་དང་གསོན་དང་བཅུད་ཀྱི་སྐྱེ་འགྲོའི་
འཛུམ་ཞལ་པད་ཁ་གྲོལ་བ་ལ།།
བརྩོན་དང་འབད་དང་མ་འོངས་ལམ་གྱི་
འཇུག་ལམ་ཁོད་ནི་ཡངས་པ་ལ།།
ཀྱེ་མ་འདི་དག་བསམ་ཞིང་བསམས་ན་
ཚེ་ཡི་སྙིང་པོ་མཐོང་བར་འདྲ།།
དུས་ཀྱི་རྒྱུ་བ་རི་གཟར་ཆུ་བོ་བཞིན་དུ་རྔམ་གྱིས་
རྒྱུགས་ནའང་།།
དབུས་ཀྱི་ལྷ་ལྡན་ཉི་མའི་དྲུང་དུ་སྙིམ་པའི་
ལག་ཟུང་མཐོར་བཀྱགས་ཏེ།།
སེམས་ཀྱི་འདུན་མའི་སྨོན་ལམ་ལན་གསུམ་སྙིང་ནས་
བརྒྱབ་པའི་ས་བོན་གྱིས།།
བླ་ན་མེད་པའི་ཀྲུང་ཧྭའི་འབྱོར་ཕྱུག་ཛམ་བྷ་ལྷ་ཡིས་
སྲུང་བར་མཛོད།།
༼ ཞོ་ར་བསམ་འགྲུབ་རྒྱལ། ༽