ཀྭ་ཡེ་གསོན་དང་ཡིད་འོང་ལྷ་ཡི་སྲས།།
ཁ་སྒོ་སྐྱེ་འབྲས་མཚར་བའི་བུ་མོ་ལགས།།
གངས་ལ་ཟླ་འོད་ཕོག་པའི་མཛེས་པ་ཅན།།
ངག་དབང་ལྷ་མོ་འདྲ་ཁྱོད་དུང་བའི་ཡུལ།།
ཅ་ནོར་རྒྱུ་རྫས་སྟོང་གི་མི་ཁུག་པའི།།
ཆ་རྫོགས་ཉ་གང་ཟླ་བའི་ཞལ་ལྡན་མ།།
ཇ་ཡུན་ཙམ་གྱི་མི་ཡུལ་ཁམས་འདི་ནས།།
ཉ་ཀྱུས་འཛིན་འདྲར་སེམས་པ་ཁྱོད་ཀྱིས་འཕྲོག།
ཏ་ཀིའི་ན་ཟུག་སློང་བའི་ན་ཆུང་མ།།
ཐ་སྙད་སྟོང་ཕྲག་མང་པོའི་བརྗོད་བྱ་དང་།།
ད་ལྟ་ཕོ་སྐྱེས་སྟོང་གི་སེམས་རྟེན་ཡིན།།
ན་ཆུང་ཁྱོད་ཀྱི་ལང་ཚོ་མེ་ན་ཀཱ།
པ་ཅར་མཛེས་དགུའི་ཆས་སྤྲས་ལུས་ཕྲ་མ།།
ཕ་རོལ་ཡིད་སེམས་འཕྲོག་པའི་གཞི་མ་སྟེ།།
བ་དན་རླུང་གིས་བསྐྱོད་འདྲའི་མི་སེམས་དག།
མ་ལུས་བསླུ་བའི་ཕོ་ཉ་སྒེག་ལྡན་མ།།
ཙན་དན་འདྲ་བའི་ལུས་ཀྱི་ལྗོན་པ་ཡིས།།
ཚངས་སྲས་ལྷ་མོ་འགྲན་པའི་འཇོ་སྒེག་ཅན།།
མཛངས་ལྡན་ཡིད་འཕྲོག་ཁྱོད་ཀྱི་སྐུ་ལུས་ལ།།
ཝ་ལེར་ཆགས་ལྡན་སྐྱེ་བོའི་གདུང་བ་ལྕི།།
ཞེན་ཆགས་གདུང་བའི་མནར་བའི་མི་དག་གིས།།
ཟ་འཐུང་འགྲོ་འདུག་བར་ནས་ཁྱོད་ལ་འཁྲེང་།།
འ་འུར་སྐྱེ་འཆིའི་བར་གྱི་མགྲོན་པོ་དག།
ཡ་མཚན་ཤི་ཡང་ཞེན་ཆགས་ལྷག་ན་ཐང་།།
རས་གོས་སྲབ་འཇམ་ཡང་བའི་གྱོན་པའི་འོག།
ལག་པའི་སོར་མོའི་ཁྲི་ཤིང་ལྡེམ་ལྡེམ་ངང་།།
ཤ་མདངས་དཀར་དམར་སྒྱུ་མའི་མེ་ཏོག་དེས།།
ས་སྟེང་སོ་སྐྱེས་སྟོང་གི་རྣམ་ཤེས་འཕྲོག།
ཧ་ཅང་མཛེས་སྡུག་སྟོང་གིས་ཕྱུག་པའི་ཁྱོད།།
ཨ་ཙི་ཕོ་གཞོན་སྟོང་གི་སེམས་པ་ཤོར།།
ཧ་ལམ་འགྲན་གྱི་ཟླ་བོ་དབེན་པའི་ཁྱོད།།
ཨ་མའི་བུ་མོ་སྟོང་གི་གཙུག་ན་མཛེས།།
༼ རྡོ་རྗེ་ཐར་ལམ། ༽