འཁོར་འདས་རྣམ་རྟོག་འགྱུ་སའི་མེ་ལོང་དུ།།
རྒྱ་སེའི་མེ་ཏོག་མཛའ་བརྩེའི་ཚུལ་གྱིས་འཛུམ།།
དེ་ཡང་ཞེན་ཆགས་དུངས་པའི་རྙི་རུ་ལྷུང་།།
རྟོག་ཚོགས་འགྱུ་བ་འགག་སའི་གཡུལ་ས་ཡིན།།
ངས་ནི་གནག་སྣུམ་སྐྲ་ལོ་རལ་གྲིར་བྱིན།།
འཁོར་བའི་རྣམ་རྟོག་གཙང་པོའི་ཆུ་ལ་སྐུར།།
རྒྱ་སེའི་མེ་ཏོག་མི་མངོན་དབྱིངས་སུ་སྤུར།།
མཛའ་བའི་འཕྲིན་པ་དམར་པོ་མེ་ལ་སྦར།།
ཕ་ཡུལ་རི་སྡེ་ན་བུན་གསེབ་ཏུ་བསྐྱུར།།
དབུ་དཀར་མ་ལོ་ཕ་ཁྱིམ་འཁྲིས་སུ་བཞག།
ན་གཞོན་ང་དང་གནམ་མཐའི་སྤྲིན་པ་གཉིས།།
ལས་ཀྱི་དབང་གིས་མུ་མེད་རྒྱང་རིང་འཕུར།།
འདི་ན་དགོང་ཁའི་ཉི་ཟེར་ལམ་ལམ་འཕྲོ།།
བྱེའུ་ཆུང་འཇོལ་མོ་ཤིང་ལོའི་པང་ལ་བསྙེགས།།
དལ་གྱིས་ལམ་སྒྲོན་ཚོགས་ཀྱང་གཉིད་དུ་ཡུར།།
ལྷིང་འཇགས་དབེན་པའི་མཚན་མོ་བག་རེ་ཕེབས།།
མཚར་སྡུག་ཡིད་འཛིན་བུ་མོའི་དུངས་སེམས་ཀྱིས།།
ཁྲེལ་ཡོད་གཞུང་བཟང་བུ་ཡི་སྙིང་ག་རུ།།
བརྩེ་བའི་འདབ་བརྒྱ་གྲོལ་བའི་ལོ་ཟླ་ཡང་།།
ངས་ནི་མཐའ་མེད་རྒྱ་མཚོའི་གཏིང་ལ་སྐུར།།
མི་ཡུལ་རྣམ་ཤེས་ཟུང་གི་སྐྱིད་སྡུག་ཀྱང་།།
ངས་ནི་མཆོག་གསུམ་ལྷ་ལ་ཕུལ་བ་སྟེ།།
ཁོ་བོ་ལས་སྐལ་མེད་པའི་འཚོ་ཚིས་ཀྱིས།།
མིག་ཟུང་མཆི་མ་མ་བཀུ་བརྩེ་ལྡན་ཚོགས།།
བརྩེ་བའི་མཆི་མ་ལྷུང་བའི་ཟུར་མིག་ལ།།
དྲིས་པའི་ཨ་ལན་སུ་ཡིས་མི་བཤད་དེ།།
མ་ཚིམ་སེམས་ཀྱི་འགྱུ་བ་ཕྲ་མོའི་ནང་།།
བརྩེ་བའི་བརྡ་གླུ་ཅི་ཙམ་ལྷག་ཡོད་དམ།།
༼ ཚུལ་མཁས། ༽