རྒྱང་བཞུད་ལྷོ་མཐའི་སྐར་མ་འོད་ཆེན།།

སྟོན་མཇུག་ལོ་མ་རླུང་གིས་སྤུར་ཡང་།།

སྐྱོ་ཚུལ་མ་སྟོན་ནུབ་རིའི་ཕག་ལ།།

ལས་ཀྱི་ཆུ་བོ་འཁྱག་གིས་མ་བསྡམ།།

ཉི་འོད་ཁུར་བའི་བྱ་ཁྱུའི་བསྟར་ཕྲེང་།།

ཟླ་བ་སོང་བའི་ཤུལ་ལ་ལྷག་ཀྱང་།།

ཆུ་བོའི་འགྲམ་གྱི་རྩི་ཏོག་རྩེ་མོར།།

སྨུག་པ་འཁྱིལ་བ་སེམས་ཀྱི་ན་བུན།།

ཡིད་ཀྱི་མཁའ་ན་ཕུང་ཕུང་གཡོ་བའི།།

ཞེན་ཆགས་སྤྲིན་དཀར་ལྷགས་པས་ཁྱེར་ན།།

གཙང་བའི་ཁུད་དུ་ཟད་པའི་འདབ་མར།།

ཟླ་བའི་ལག་པས་བྱིལ་བྱིལ་ཨེ་གནང་།།

རླུང་གིས་འདར་བའི་ལྕང་མའི་ལན་བུ།།

ཟླ་བ་ལྷུང་བའི་ཆུ་རིས་ལྟེབས་ནས།།

ཁ་བའི་འདབ་མར་ཞེན་ཆགས་བྱུང་ན།།

དབང་གཞིའི་རི་མོས་དགུན་གཞུང་དྲན་ཡོང་།།

ཚིག་གིས་བསྒུལ་བའི་མི་སེམས་དུམ་བུ།།

དབྱངས་ཀྱིས་བསླས་པའི་མགྲིན་པས་བཏེགས་ན།།

ནགས་མའི་ཀླུང་ན་ལྷང་ལྷང་གྲགས་པའི།།

ཁུ་བྱུག་ཚོགས་ཀྱི་གསུང་སྐད་ཨེ་འགག།

རི་ལ་གཤར་བའི་འབྲོང་གི་ཁྱུ་ཚོགས།།

སེམས་ཀྱི་རི་སུལ་ཐད་ཀྱིས་བཅད་ཀྱང་།།

རླུང་ལ་ཞོན་པའི་རྒྱང་གི་ཞེན་ཆགས།།

ཁོ་བོའི་ཡིད་ལ་ལྷོད་ཀྱིས་སིམ་པ།།

སྤྲིན་པར་དཔྱངས་པའི་ཟླ་བ་སྒོར་སྒོར།།

སྙིང་འཕྲོག་ཁྱོད་ཀྱི་ཞལ་རས་ཨེ་ཡིན།།

བསེར་བུས་བདས་པའི་གྱང་ཁའི་འཇག་མས།།

ཉི་ཟླའི་འགྲོས་ལ་འཁྱུད་མོ་བརྒྱབ་སོང་།།

ལྷོ་འུར་འཁྱུད་པའི་རི་བོའི་གཤོང་ན།།

ལྕོག་ལྕོག་ལྡེམ་པའི་མེ་ཏོག་ཚལ་ན།།

ཤག་ཤག་བབས་པའི་གཙང་པོའི་ཁུད་ན།།

ཟགས་པའི་ལོ་མས་སྨེང་སྐྱོ་ཁུར་སོང་།།

༼ པུར་རྒྱལ་བ། ༽