དཔྱིད་དཔལ་སླེབ་དུས།
མཚོ་མོའི་དར་ཁ་ཕྱེས་ཤིང་།
འཇམ་པོའི་ངག་ལ་སྙན་འཇེབས་ལྡན།
དཔྱིད་ཀའི་ཉི་འོད་ཀྱི་མེ་ལོང་ནང་ན།
གསར་དུ་འབུས་པའི་ཁྱོད་ཀྱི་ལང་ཚོ་ནི།
ལོ་ཟླ་གསར་པ་ཞིག་གི་དབུ་འབྱེད་པའི།
རྟེན་འབྲེལ་གྱི་ཁ་གཡང་ཐོག་མ་དེ་ཡང་ཡིན།
དབྱར་ཟླ་བཞི་པར།
ནམ་མཁའ་གཡའ་དག་ཅིང་།
ས་གཞི་རྡུལ་དག།
བསིལ་འཇམ་གྱི་དྲི་བཞོན་དལ་བུར་ལྡང་དུས།
དབྱར་གསུམ་སྦྲང་ཆར་གྱི་ཟེགས་མ་མཁའ་ནས་འཐོར།
ལྗང་མདོག་གི་དུས་ཚིགས་འདིར།
སྨུག་ལོང་བན་བུན་ཁྲོད་ནས།
དབྱར་ཟླ་བཞི་པའི་མཛེས་སྡུག་དང་ལྷན།
ཁྱོད་ཀྱི་ལང་ཚོ་ཡོངས་སུ་སྨིན།
སྟོན་ཀ་སླེབ་དུས།
སྟོན་གསུམ་འབྲུ་དྲུག་སྙེ་མའི་འགོ་ལྕོག་ལྡེམ་ལྡེམ་བྱས་ཤིང་།
དྲོད་འཇམ་གྱིས་སྟོན་རླུང་ལྡང་ཐེངས་རེ་རེས།
གསེར་མདོག་གི་སྡོང་ལོ་དག་ས་ལ་ཐོར།
འདི་ཡང་སྟོན་ཀའི་མཛེས་ཉམས་ངོམ་སྟངས་ཤིག་ཡིན་སྲིད་ཀྱང་།
ལྗང་མདོག་གི་ཚེ་སྲོག་བོར་བའི་ཁྱོད་ཉིད།
སྔར་ཡོད་མྱོང་མེད་པའི་ཁེར་རྐྱང་གི་སྣང་བ་ཞིག
ཐོལ་གྱིས་ལྡང་།
དགུན་གསུམ་ཁ་བའི་འདབ་མ་ལྷབ་ལྷུབ་གཡོ་ཞིང་།
གྲང་ངར་ལྷགས་རླུང་རྩུབ་མོ་དེས།
ཁྱོད་ཀྱི་ལང་ཚོ་ཡོངས་སུ་བཅོམ།
ཁ་བ་རྒོད་ས་ན།
གྲང་རླུང་འཚུབ་ས་ན།
སྐྱ་སད་དུ་གྱུར་བའི།
ཁེར་རྐྱང་གི་རྣམ་ཤེས་ཤིག་ལ་སྐྱོ་ཡུས་ཤིན་ཏུ་མོད།
མདོར་ན།
དུས་བཞིའི་མེ་ཏོག
དུས་ཚིགས་རེས་མོས་ཀྱི་ལྟེབས་ཁུག་ན།
ཁྱོད་ནི།
འཆར་ཡན་གྱི་ཐུམ་སྒྲིལ་བྱས་པའི་
བྱིས་སྒྲུང་གི་འཇིག་རྟེན་ཞིག་དང་འདྲ།
གལ་སྲིད། དུས་བཞིའི་འགྱུར་ལྡོག་གི་ཆོས་ཉིད་མེད་ན།
ཁྱོད་ནི་ནམ་ཡང་སྡིག་སྒྲིབ་ཀྱིས་མ་གོས་པའི་
མཛེས་སྡུག་དང་ལྷན་དུ་བཞད་ཡོད་ངེས།
ཀྱེ་མ།
རྟག་བརྟན་གྱི་རང་གཤིས་དབེན་པའི་ཁོར་ཡུག་འདི་ནས།
ཡིད་རྟོན་འདི་སུ་ལ་བཅོལ།
༼ མེ་ཆར། ༽