གླུ་མ་ལེན་གཅིག་དང་མ་ལེན་གཉིས། །
གླུ་ལེན་ན་ཨ་སྔོན་དགུང་ནས་ལེན། །
དགུང་ཉི་ཟླའི་ཐུགས་ལ་འབབ་ནི་ལེན། །
གླུ་མ་ལེན་གཅིག་དང་མ་ལེན་གཉིས། །
གླུ་ལེན་ན་བྲག་དམར་དཀྱིལ་ནས་ལེན། །
རྒོད་ཐང་དཀར་ཐུགས་ལ་འབབ་ནི་ལེན། །
གླུ་མ་ལེན་གཅིག་དང་མ་ལེན་གཉིས། །
གླུ་ལེན་ན་ཁྲོམ་ཆེན་དཀྱིལ་ནས་ལེན།།
མགོ་དཔོན་ལུའི་ཐུགས་ལ་འབབ་ནི་ལེན། །
ངའི་གླུ་རེའི་ནང་ན་རྟ་རེ་ཡོད། །
རྟ་གཡུ་འཛི་རྔ་མདུད་ཤིགས་སེ་ཡོད། །
ངའི་གླུ་རེའི་ནང་ན་མཛོ་རེ་ཡོད། །
མཛོ་ཁྱུང་ལུ་རྭ་ཁ་ཤིགས་སེ་ཡོད། །
ངའི་གླུ་རེའི་ནང་ན་ལུག་རེ་ཡོད། །
ལུག་གཡང་དཀར་བལ་ཁ་ཤིགས་སེ་ཡོད། །
སྟོད་ཡ་གིའི་སྤང་རི་རྩྭ་ཁ་ཅན། །
རི་རྩྭ་ཁ་ཅན་ལ་རི་དྭགས་འཁོར། །
སྐེད་ཕ་གིའི་མཚོ་མོ་རླངས་པ་ཅན། །
མཚོ་རླངས་པ་ཅན་ལ་གསེར་ཉ་འཁོར། །
སྨད་མ་གིའི་དཔོན་པོ་ཁེབས་རྒྱ་ཅན། །
དཔོན་ཁེབས་རྒྱ་ཅན་ལ་སྡེ་བ་འཁོར། །
དགུང་ཨ་སྔོན་གཡང་གི་ར་བ་རེད། །
དེའི་ནང་ལ་ཉི་ཟླ་སྐར་གསུམ་འཛོམས། །
འབྲུག་ཕོ་ཐང་སྣང་བ་སྐྱིད་པོ་རེད། །
ཆར་ཟིལ་མ་རྒྱུན་ཆད་མེད་པར་ཤོག །
ནགས་རྒྱ་རྫོང་གཡང་གི་ར་བ་རེད། །
དེའི་ནང་ན་བྱ་རིགས་སྣ་ཚོགས་འཛོམས། །
བྱ་ཁུ་ལོ་སྣང་བ་སྐྱིད་པོ་རེད། །
ནགས་རྩི་ཏོག་རྒྱས་པའི་སྨོན་ལམ་ཤོག །
སྡེ་ཆེན་པོ་གཡང་གི་ར་བ་རེད། །
དེའི་ནང་ན་ཕ་མ་བུ་གསུམ་འཛོམས། །
དྲིན་མ་ལོ་སྣང་བ་སྐྱིད་པོ་རེད། །
སྐྱིད་འཚོ་བ་རྒྱས་པའི་སྨོན་ལམ་ཤོག །
( ནོར་བུས་བསྡུས།)