ཉི་འོད་ནུབ་རིར་ཡལ་རྗེས།

ཟླ་འོད་གཉིད་དུ་ཡུར་རྗེས།

ང་དལ་བུར་ཡར་ལངས་ནས།

མཛེས་སྡུག་གི་ཡུལ་ལྗོངས་གཞན་ཞིག་མིག་

གིས་འཚོས།

འཇིག་རྟེན་གྱི་ལྟེ་བར་བརྒྱུས་པའི་ཡུལ་གྲུ།

དུས་ཚོད་ཀྱི་བྲེལ་ཟིང་བར་ནས་གསོན་ཤུགས་རྒྱས།

གངས་རི། རྫ་རི། བྲག་རི།

རྔམ་བརྗིད་ཀྱི་རི་ཚོགས་མཐོང་དུས།

སྐལ་བའི་ལོ་རྒྱུས་ཀྱི་འོད་སྣང་ལམ་ལམ་འཕྲོས།

གངས་ཆུ། རྫ་ཆུ། ན་ཆུ།

ཤང་ཤང་གི་ཆུ་རྒྱུན་མཐོང་དུས།

སྲིད་པའི་བདེན་ལུགས་ཀྱི་དར་ཆ་ལྷབ་ལྷབ་བསྐྱོད།

གསལ་བྱེད་སུམ་ཅུའི་མཛེས་སྡུག་གི་ལང་ཚོ།

ཀུན་གསལ་གྱི་པང་པ་ནས་གཉོམ་ལག་རྒྱས།

དབྱངས་ཡིག་བཞི་པོའི་སྙན་འཇེབས་ཀྱི་གླུ་སྒྲ།

དྲི་བཞོན་དང་འགྲོགས་ནས་ཀུན་ལ་ཁྱབ།

དམ་པའི་སྲོལ་བཟང་གི་ལྟ་སྤྱོད་ཁྲི་གདུགས་ཀྱི་

འོད་སྣང་བཞིན།

བསྐལ་པ་ནས་བསྐལ་པར་ལམ་ལམ་དུ་འཕྲོས།

མེས་པའི་མཛད་འཕྲིན་གྱི་གཟི་མདངས་དུང་མདོག་

གི་ཟླ་བ་བཞིན།

རབ་ཡངས་ཀྱི་ནམ་མཁའ་ནས་རྟག་བརྟན་དུ་གནས།

རབ་དཀར་གྱི་སྤྲིན་པས།

བག་ཡངས་ངང་ནམ་མཁའི་མཐོངས་ནས།

མཛེས་སྡུག་གི་ཁ་དོག་ཡོད་ཚད་བདག་གིར་

བཟུང་རྗེས།

ས་གཞིའི་པང་པར་གསེར་ཆུ་བྱུགས།

ས་གཞི་རྒས་རྗེས། དེ་ཡི་མཛེས་པ་མ་ལུས།

ཁོང་གི་དབུ་སྐྲ་ལྟ་བུའི་རྩྭ་ལྗང་དང་ལྗོན་ཤིང་

གིས་སྲུང་ངམ།

ཁྲི་གདུགས་ཀྱི་དཔལ་གྱིས།

མཚར་སྡུག་གི་མི་ཡུལ་དང་།

མི་ཡུལ་གྱི་རྩྭ་ཐང་ལ།

དྲོད་འཇམ་གྱི་འོད་སྣང་སྩོལ་དུས།

ནོར་ལུག་གི་ཁྱུ་ཚོགས་སྔར་ལྟར་བག་ལྷོད་རྒྱུའམ།

བྲེལ་ཟིང་གི་མི་ཚོགས་སྔར་ལྟར་བྲེལ་ཞིང་འཚུབ་བམ།

ངའི་མི་ཚེ། ངའི་ལང་ཚོ།

ངའི་འདས་སོང་གི་གཏམ་རྒྱུད་སྐྱུར་པོ།

ངའི་བརྗེད་སོང་བའི་བརྩེ་དུང་གི་རྨ་ཁ།

ངའི་བོར་སོང་བའི་ཁོ་དང་ཁོ་མོ་ཚོ།

ངའི་འབོར་བཞིན་པའི་ད་ལྟའི་ཡོད་ཚད།

ཅི་འདྲའི་ཡི་རྨུག་པ་ལ།

ཅི་འདྲའི་ཞེ་སྡུག་པ་ལ།

གསོན་དང་། ངའི་གོམ་སྒྲ་ལ་གསོན་དང་།

ལྗིད་དིག་དིག་གི་གོམ་སྒྲ་ལ་གསོན་དང་།

གོམ་སྒྲ་ལྟ་བུའི་སྙན་ངག་ལ་གསོན་དང་།

ངའི་སྙིང་གི་འཕར་ཆགས་ཐོས་ཐུབ་ལ།

སེམས་ཀྱི་སྐྱོ་གདུང་ཡང་ཚོར་ཐུབ།

གཟིགས་དང་།ངའི་རྒྱབ་གཟུགས་ལ་གཟིགས་དང་།

ནག་རོག་རོག་གི་རྒྱབ་གཟུགས་ལ་གཟིགས་དང་།

རྒྱབ་གཟུགས་ལྟ་བུའི་སྙན་ངག་ལ་གཟིགས་དང་།

ངའི་སྐྱི་གཡའ་བའི་འདས་དོན་དག་མཐོང་ཐུབ་ལ།

གཡའ་དག་པའི་མ་འོངས་པའང་རྙེད་ཐུབ།

ཅི་ཞིག་གི་ཆེད་དུ།

ངས་རང་གི་མི་ཚེ་ལ་བླ་སྲོག་གསར་བ་བསྩལ།

བླ་སྲོག་གི་འབོད་པས།

ངའི་ཕུགས་འདུན་གྱི་རྦ་རླབས་ཡང་ཡང་གཡོས་ཤིང་།

མདུན་སྐྱོད་ཀྱི་མེ་ལྕེ་དྲག་ཏུ་མཆེད།

ཡིན་ནའང་། ངས་རེ་ཞིང་སྒུག་པའི་སྟོང་བསམ་

དང་འཕྲུལ་སྣང་འདི་ཚོ།

རླུང་འཚུབ་ཞིག་གིས་ཐལ་རྡུལ་བཞིན་རྒྱང་རིང་

ཏུ་ཁུར་སོང་།

༼ ཉག་ཕྲན། ༽