ཞིན་ཧྭ་གསར་འགྱུར་ཁང་པེ་ཅིང་ནས་སྤྱི་ཟླ7ཚེས11ཉིན་གློག་འཕྲིན་འབྱོར་གསལ། སྤྱི་ཟླ7ཚེས11ཉིན། ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་དང་རྒྱལ་ཁབ་ཀྱི་ཀྲུའུ་ཞི་ཞི་ཅིན་ཕིང་དང་ཁྲའོ་ཞན་ངལ་རྩོལ་ཏང་གི་སྤྱི་ཁྱབ་ཧྲུའུ་ཅི་དང་རྒྱལ་དོན་ཨུ་ཡོན་ལྷན་ཁང་གི་ཨུ་ཡོན་ཀྲང་ཅིན་ཀྲེང་ཨེན་གྱིས《ཀྲུང་ཁྲའོ་མཛའ་མཐུན་མཉམ་ལས་རོགས་རེས་ཆིངས་ཡིག》བཞག་ནས་ལོ་ངོ65འཁོར་བར་རྟེན་འབྲེལ་གློག་འཕྲིན་གཏོང་རེས་གནང་བ་རེད།

ཞི་ཅིན་ཕིང་གིས་གསུངས་དོན། 1961ལོར། ཀྲུང་ཁྲའོ་རྒྱལ་ཁབ་གཉིས་པོའི་འགོ་ཁྲིད་རྒན་རབས་པས《ཀྲུང་ཁྲའོ་མཛའ་མཐུན་མཉམ་ལས་རོགས་རེས་ཆིངས་ཡིག》བཞག་སྟེ། རྒྱལ་ཁབ་གཉིས་པོའི་མི་དམངས་ཀྱི་ཁྲག་དྲོན་ལས་གྲུབ་པའི་དམག་འཐབ་མཛའ་གྲོགས་བརྟན་དུ་གཏོང་བར་ཆབ་སྲིད་དང་བཅའ་ཁྲིམས་ཀྱི་རྨང་གཞི་གལ་ཆེན་བཏིང་བ་ལས། ཀྲུང་གོ་དང་ཁྲའོ་ཞན་གཉིས་པོའི་མཛའ་གྲོགས་རྒྱུན་འཛིན་དར་སྤེལ་དང་། ས་ཁུལ་དང་ཐ་ན་འཛམ་གླིང་གི་ཞི་བདེ་བརྟན་ལྷིང་སྲུང་བར་ནུས་པ་གལ་ཆེན་ཐོན་ཡོད། ལོ65ཡི་རིང་། ཕྱོགས་གཉིས་པོས་ཆིངས་ཡིག་གི་དགོངས་དོན་རྒྱུན་འཛིན་གྱིས་ཕན་ཚུན་རྒྱབ་སྐྱོར་དང་། མཐུན་སྒྲིལ་རོགས་ལས། དཔུང་པ་མཉམ་གཤིབ་ཀྱིས་འབད་འཐབ་བཅས་བྱས་ཏེ། མི་རབས་ནས་མི་རབས་བར་མཛའ་མཐུན་མཉམ་གནས་དང་། ལས་དབང་གཅིག་མཐུན། ཕན་ཚུན་ལྟ་སྐྱོང་བཅས་ཀྱི་ཀྲུང་གོ་དང་ཁྲའོ་ཞན་གྱི་འབྲེལ་བའི་མངོན་གསལ་དོད་པའི་ཁྱད་ཆོས་གསོན་ཉམས་དོད་པོས་མཚོན་པར་བྱས་ཡོད།

ཞི་ཅིན་ཕིང་གིས་ནན་གསུང་གནང་དོན། ད་ལོའི་ཟླ6པར། ངས་ཁྲའོ་ཞན་ལ་གྲུབ་འབྲས་ཐོབ་པའི་ངང་རྒྱལ་དོན་འཚམས་འདྲི་བྱས་ནས། བློ་མཐུན་སྤྱི་ཁྱབ་ཧྲུའུ་ཅི་དང་ལྷན་དུ་ཀྲུང་གོ་དང་ཁྲའོ་ཞན་གྱི་སྲོལ་རྒྱུན་མཛའ་གྲོགས་སྲ་བརྟན་དང་རྒྱུན་འཛིན་བྱེད་པ་དང་འབྲེལ། དུས་རབས་ཀྱི་ནང་དོན་གསར་པ་སྣོན་པའི་ཐད་ཐུན་མོང་གི་ངོས་འཛིན་གལ་ཆེན་བྱུང་སྟེ། དུས་སྐབས་གསར་པའི་ཀྲུང་གོ་དང་ཁྲའོ་ཞན་གཉིས་པོའི་འབྲེལ་བ་འཕེལ་རྒྱས་ཡོང་བར་འཐབ་ཇུས་ཀྱི་མཛུབ་ཁྲིད་བྱས་པ་དང་འཆར་གཞི་གསར་པ་བཀོད་ཡོད། འཛམ་གླིང་ལ་ལོ་བརྒྱའི་འགྱུར་ལྡོག་གང་མགྱོགས་འགྲོ་བཞིན་པའི་མདུན་དུ། ངས་བློ་མཐུན་སྤྱི་ཁྱབ་ཧྲུའུ་ཅི་དང་ལྷན་དུ་འཐབ་ཇུས་འབྲེལ་གཏུག་སྔར་བས་དམ་ཟབ་བྱས་ནས། རྒྱལ་ཁབ་གཉིས་པོའི་འབྲེལ་བའི་འཕེལ་ཕྱོགས་བརྟན་དུ་གཏོང་བ་དང་། ཕྱོགས་གཉིས་པོའི་མཛའ་མཐུན་མཉམ་ལས་ལ་སྣེ་ཁྲིད་ཀྱིས་རྒྱལ་ཁབ་གཉིས་པོའི་མི་དམངས་ལ་བདེ་སྐྱིད་དེ་བས་ཆེ་བ་བསྐྲུན་ཏེ། ས་ཁུལ་གྱི་ཞི་བདེ་དང་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་འབུལ་འདོད་ཡོད།

ཞི་ཅིན་ཕིང་གིས་གསུངས་དོན། རྒྱལ་སྤྱིའི་དུས་བབ་ལ་འགྱུར་ལྡོག་གང་འདྲ་བྱུང་རུང་། ཀྲུང་གོའི་ཏང་དང་སྲིད་གཞུང་གིས་ཀྲུང་གོ་དང་ཁྲའོ་ཞན་གཉིས་པོའི་སྲོལ་རྒྱུན་མཛའ་གྲོགས་ལ་ཚད་མཐོའི་མཐོང་ཆེན་བྱེད་པའི་ལངས་ཕྱོགས་བརྟན་པོར་འགྱུར་ལྡོག་འགྲོ་མི་སྲིད་པ་དང་། བློ་མཐུན་སྤྱི་ཁྱབ་ཧྲུའུ་ཅི་ཅིན་ཀྲེང་ཨེན་གྱིས་ཁྲའོ་ཞན་གྱི་སྤྱི་ཚོགས་རིང་ལུགས་བྱ་གཞག་ལ་འགོ་ཁྲིད་གནང་བར་བློ་བརྟན་འགྱུར་མེད་ཀྱིས་རྒྱབ་སྐྱོར་བྱེད་པར་འགྱུར་ལྡོག་འགྲོ་མི་སྲིད་པ། ཀྲུང་གོ་དང་ཁྲའོ་ཞན་ཕྱོགས་གཉིས་པོའི་ཐུན་མོང་གི་ཁེ་ཕན་དང་འཐབ་ཇུས་ཀྱི་ཁོར་ཡུག་བཟང་པོ་སྲུང་བའི་ཆོད་སེམས་བརྟན་པོར་འགྱུར་ལྡོག་འགྲོ་མི་སྲིད་པ་བཅས་ལ་ངས་བསྐྱར་བསྒྲགས་བྱེད་འདོད་ཡོད།

（ པར་ངོས་གཉིས་པར་གཟིགས།）