མཁའ་དབྱིངས་སུ་འཁོར་བའི་བྱ་རྒོད་ཀྱི་ཁྱུ་ཚོགས།

རྣམ་ཤེས་བྲལ་བའི་གཤིན་པོ་ཞིག་ལ་རེ་སྒུག་བྱེད་བཞིན།

ཉིན་མཚན་གྱི་བར་མཚམས་ན།

རྨི་ལམ་བོར་བའི་འདས་པོ་ཞིག་འཚོལ་འདུག།

སུ་ཞིག་གིས་སྨེང་བའི་མེ་ལྕེ་སྦར་བཞིན།

འཚོ་བའི་བར་སྣང་དེ་བརྒལ་ཐུབ་ཀྱིན་འདུག།

སྤྲིན་ཚོགས་རླུང་བུས་དེད་པའི་འགྲོས་དང་།

ཉི་ཟླའི་གོང་ཁར་བབས་པའི་འོད་ལམ་ལམ་གྱི་དྲོད་ཐིགས།

སུས་ཀྱང་ཟིན་དུ་མེད་པའི་ཚེ་སྲོག་གི་ང་རོ་གསར་པ།

མདུན་དུ་ཆས་དགོས་པའི་སྦྲག་ཡིག་ཅིག།

སྐབས་བབས་ཀྱི་བགོ་སྐལ་ཞིག།

ལེ་ལོའི་ར་བ་ནས་བོར།

ཡོད་ཚད་དུས་ཚོད་ཀྱི་མེ་ལྕེ་རུ་སྦར་ནས།

སེམས་ཀྱི་གྱང་ཀོག་ལ་རྨོངས་བའི་གཟུགས་རིས་བྲིས།

སྐྱོ་བ་གྲངས་མེད་ཅིག་མིག་ཆུ་དང་བསྡོངས་ནས།

འགྱོད་གདུང་གི་ཞལ་ངོ་བཀྲུས།

སེམས་གསོའི་མེ་ཏོག་ཆུང་ཆུང་ཞིག་ལག་པས་

འཛིན་གྲབས་བྱས་ཀྱང་།

ཡུ་བ་ལ་ཚེར་མས་དཀྲིས་འདུག་པས།

ནམ་ཡང་རྒྱང་དུ་བཀྱེད་དགོས་བྱུང་།

རང་ཉིད་འཆི་བ་ལ་སྦྱོར་བའི་དུས་ཚོད་ཀྱི་གོམ་འགྲོས་རེ་རེ།

འཕྱོན་མ་བཞིན་གཡོ་ཟོལ་གྱི་མིག་ཟུར་དང་།

རྣམ་གཡེང་གི་རྩེ་དགོད་བྱེད་བཞིན།

ཚེ་སྲོག་གི་འགྲམ་ཆུ་ཡང་ཡང་སློང་།

རྨི་ལམ་དང་མཚུངས་པ།

འཇའ་ཚོན་དང་འདྲ་བ།

ཐོབ་ཤོར་གྱི་རེ་དོགས།

མཛེས་སྡུག་གི་བསླུ་བྲིད།

ཕམ་ཉེས་གང་མང་ཞིག་གིས་ཡོངས་སུ་བཏུམས།

ལ་ཁའི་རི་རྩེར་ཡིབ་པའི་རྟ་བདུན་དབང་པོ་དེས།

ཉིན་རེ་བཞིན་ངའི་འཚོ་བ་ལ་སེམས་ཁུར་ཞིག་དང་།

ངའི་ལས་དབང་ལ་གོ་བརྡ་ཞིག་སྤྲོད་ཀྱིན་མཆིས།

མཛའ་གཞས་སྙན་མོ་དེ།

ངའི་དཀྱིལ་སྙིང་དུ་མ་ཕོག་པ་རེད་དམ།

ང་ལ་དེ་ཉན་པའི་སྐལ་བ་མེད་སོང་བ་རེད།

མུན་པའི་ཁྲོད་ནས་ངས་ཁྱེད་ཀྱི་གཟི་མདངས་གཞི་ནས་ཚོར།

ནམ་ཞིག་གི་དུས་ན།

ངས་སྙན་ངག་གི་མེ་ཕུང་བཞག་ནས།

གླུ་ངག་གི་སྐྱེད་ཚལ་འདིར་ངེད་ཅག་འཛོམས་དུས།

སྐྱོ་སྣང་དང་རྨོངས་པའི་བུད་ཤིང་མཐའ་དག་བསྲེགས་ཏེ།

གླུ་གཞས་ཀྱི་མཁར་རྫོང་དེ་རུ་དབྱངས་རྟ་

གསར་པ་ཞིག་བཟོ་དགོས་ཨང་།

༼ བདེན་མིག། ༽