ཟླ་
བ་
འོག་
གི་ཆུང་
འདྲིས
ཚེས་ཆེན་དགུང་སྔོན་གྱི་ཟླ་བ།།
འགྲམ་དུ་འཛུམ་པ་རང་གནང་དུས།།
ཞེ་འདྲིས་དུང་བ་ཡི་ཞལ་རས།།
ཡིད་ལ་འཁོར་བ་རང་བྱས་བྱུང་།།
སྐོར་ལམ་མི་ཚོགས་ཀྱིས་བཀང་དུས།།
ཆུང་འདྲིས་གཟུགས་བྱད་དང་འདྲ་བ།།
གཅིག་ཀྱང་མཐོང་བ་རང་མི་འདུག།
སྣང་བ་རྒྱ་ཡན་དུ་བཏང་སོང་།།
ལྷད་མེད་དྭངས་གསལ་གྱི་ཟླ་བ།།
མཚོ་ངོགས་འཕྲོས་པ་རང་གནང་དུས།།
བརྩེ་མཐུན་ཆུང་འདྲིས་ཀྱི་འཛུམ་ཞལ།།
ཡིན་སྣང་འཆར་བ་རང་ཤོར་སོང་།།
སྤྲིན་པའི་བང་རིམ་དེ་སྟུག་ལ།།
མཚམས་སྤྲིན་ཁ་དོག་དེ་མཛེས་པས།།
བཅོས་མིན་རོགས་ལོ་ཡི་བྱད་པ།།
སྣང་ངོས་གཡོ་བ་རང་གནང་བྱུང་།།
གསལ་གསལ་ཟླ་བ་ཡི་ཞལ་ཁྱིམ།།
གཙང་འགྲམ་འཚེར་བ་རང་བྱེད་དུས།།
སྔར་སོང་འུ་གཉིས་ཀྱི་རྐང་ལམ།།
མིག་སྣང་འཁོར་བ་དེ་མང་སོང་།།
ཟླ་ཟེར་རང་ཕྱོགས་སུ་འཕྲོ་དུས།།
ཤིག་ཤིག་ལྗོན་བཟང་གི་འོག་ཏུ།།
འུ་གཉིས་ཐུག་འཕྲད་ཀྱི་ལས་སྐལ།།
ཡིད་བརྙན་ཚོར་བ་དེ་ཟབ་སོང་།།
དཀར་གསལ་ཟླ་བ་ཡི་འཛུམ་ཟེར།།
ཤར་རིའི་ཕྲག་རྒྱན་ནས་འཕྲོ་དུས།།
ཆུང་གོམས་བྱམས་པ་ཡི་ཞལ་སྒོ།།
རང་སེམས་མཐིལ་འོག་ན་ལྷུངས་བྱུང་།།
དགོང་ཀའི་ཉི་ནུབ་ཀྱི་ཀློང་ནས།།
ཟླ་འོད་ལམ་ལམ་དུ་འཚེར་དུས།།
ཆུང་འདྲིས་དགའ་མ་ཡི་རང་གཟུགས།།
དྲན་པའི་སྣང་ངོས་ལ་རེག་བྱུང་།།
༼ སྙན་རྐང་གླིང་། ༽