སྨུག་པ་ལང་ལོང་གི་རྫ་རྩེར་བསྙེགས་ནས།།
རྫི་གླུ་སང་སང་དེ་ངག་ནས་བཀུག་སྟེ།།
འུར་རྡོའི་ཚག་སྒྲ་ཡིས་ནོར་ཁྱུ་འཚོལ་བའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
གཡང་དཀར་ལུག་ཁྱུ་ཡི་འབའ་སྒྲ་སྙན་པའི།།
སྔོ་ལྗང་གཡུ་མདོག་གི་སྤང་གཞུང་དེ་ནས།།
མེ་ཏོག་ཞྭ་མོ་ཡི་རྒྱན་ཆ་མཛེས་པའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
ཡན་ལག་བརྒྱད་ལྡན་གྱི་ཆུ་བོའི་འགྲམ་ནས།།
མཆོད་ཆུ་དང་པོ་དེ་ལྷ་ལ་ཕུལ་ཅིང་།།
འོ་ཟོམ་ཆུང་ཆུང་ཞིག་རྒྱབ་ཏུ་ཁུར་བའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
སྦྲ་ནག་གྲུ་བཞི་ཡི་མཐིལ་འོག་དེ་ནས།།
འཛུམ་མདངས་སོ་དཀར་གྱི་མེ་ཏོག་བཞད་དེ།།
ཕ་མ་མགོ་འཛོམས་ཀྱི་གཞིས་ཁྱིམ་བསྐྱངས་པའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
ནོར་གནག་སྟོང་འདུས་ཀྱི་ལྷས་རའི་དབུས་ནས།།
འབྲོག་སྡེའི་ལས་སྐལ་ལ་སུན་སྣང་བྲལ་ཏེ།།
ཐུལ་དཀར་འབྲི་མོ་ཡི་བཞོ་དབྱངས་སྙན་པའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
གྲང་ངར་རྒོད་དུས་ཀྱི་ཐོ་རངས་ཤིག་ལ།།
ཡིག་དྲུག་མ་ཎི་དེ་ངག་ནས་ཟློ་བཞིན།།
ལག་ཟུང་འཇམ་པོ་ལས་ལྕི་དྲི་འཐུལ་བའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
སྐྲ་ལོ་རྒྱ་ལྕང་གི་ལོ་མའི་གསེབ་ནས།།
གཟི་དང་བྱུ་རུ་ཡི་བཏགས་རྒྱན་མཛེས་ཤིང་།།
གཡུ་ཡི་ཕྲེང་ཞགས་ཀྱི་སྐེ་རྒྱན་ཡག་པའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
རང་བྱུང་ཞལ་རས་ལ་གཞོན་ཤ་ཆགས་ཏེ།།
མཆུ་སྒྲོས་དམར་པོ་ལ་ཚོན་རྩི་མེད་པ།།
འགྲོགས་ན་བརྩེ་འདང་གི་མཚོ་མོ་འཁྱིལ་བའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
བདེན་བདེན་རྫུན་རྫུན་གྱི་སྐད་ཆ་མེད་ཅིང་།།
དྲང་པོ་དྲང་བཞག་གི་གཤིས་ལུགས་བཟུང་སྟེ།།
འདྲིས་ན་ཕྱི་ཐག་གི་ཀློང་ན་འཚོ་བའི།།
ཨ་ཅག་འབྲོག་མོ་དེ་གང་དུ་ཕེབས་སོང་།།
༼ དམར་ཁ་ཚ། ༽