ཚར་དཀར་མགོ་ལ་དཀྲིས་པའི་རྫི་བོ་སྣང་འགྲོ།།
རྫི་གླུ་ངག་ལ་འགུགས་ན་ཚངས་པའི་དབྱངས་ལྡན།།
དཔྱིད་གསུམ་དཔལ་གྱི་སྒེག་མོ་སེམས་སུ་ཉལ་བཞིན།།
མི་འཇིགས་མཚོན་གྱི་སྲུང་བ་དགུ་རེ་བཏགས་ཡོད།།
ནོར་ཁྱུ་ཐང་ལ་བརྡལ་བའི་སྟག་ཤར་གཞོན་ནུ།།
ཡིད་ཀྱི་འཆར་སྒོ་བཀྲོལ་བའི་རི་དྭགས་མིག་ཅན།།
བརྩེ་འདུན་ཡིད་ལ་བཅངས་པའི་མཛེས་པའི་ཉམས་འགྱུར།།
ཡིད་ལ་འཆར་གྱིན་འཆར་གྱིན་ནོར་ཁྱུའི་རྗེས་འགྲོ།།
ཁ་སྒང་རི་སྒང་སྐོར་བའི་རྟ་ནོར་ལུག་གསུམ།།
སིང་སིང་ཀི་རྒྱང་གཅིག་གིས་མཐའ་ནས་བསྐོར་བའི།།
རྒྱ་ལྕང་ལོ་མའི་ལན་བུ་རྒྱབ་ན་མདུད་ཅིང་།།
འབྲོག་པའི་སྣང་བ་འདི་ཚོ་གཙང་མ་གཙང་མ།
ཁ་བ་བུ་ཡུག་འཚུབ་པའི་རླུང་བུའི་གསེབ་ན།།
འདོ་རིག་རྟ་ཕོའི་གོང་ན་ལྷོད་ཀྱིས་བགྲོད་ཅིང་།།
སྐེད་ཀྱི་འུར་རྡོ་དགུ་སྒྲིལ་ལན་རེ་སྐོར་གྱིན།།
ནོར་ཁྱུའི་རྗེས་སུ་བསྙེགས་ན་རྩལ་ཞིག་རྒྱས་ཡོད།།
ན་ཆུང་གཞོན་པའི་སྣང་བ་རི་ལ་ཕྱོགས་ཤིང་།།
ཚེ་སྔོན་ལས་འཕྲོའི་ཁ་ཆད་རི་ནས་བགོས་ན།།
གཅིག་འཛོམས་གཉིས་ཕྲད་བྱུང་བའི་ལས་ཀྱི་འཕྲོ་མ།།
ཁྱིམ་གཞིས་དྲོན་མོ་ཞིག་གི་གཞས་ལ་བཀུག་ཡོད།།
གཤིས་བཟང་ངང་རྒྱུད་རིང་བ་འབྲོག་པའི་བུ་མོ།།
འཇོ་སྒེག་དཔལ་གྱིས་བརྒྱན་ཞིང་བཞོ་དབྱངས་ལེན་དུས།།
ཐུལ་དཀར་འབྲི་མོའི་འོ་ཞོ་ཟོམ་ལ་བསྙལ་ནས།།
གོམ་པའི་གདེགས་འཇོག་སྦྲ་ཁྱིམ་སྒོ་ལ་བསྣོལ་ཐལ།།
ཕ་ས་སྨུག་པོ་གཡུ་ཡི་གཞོང་པའི་ངོས་སུ།།
ཁྲ་ཚོམ་ལས་ཀྱི་མེ་ཏོག་བཞད་པས་མཛེས་ཤིང་།།།
དྲན་འཛིན་ཡིད་ཀྱི་ན་བུན་རི་ལ་འཁོར་ན།།
མི་བརྗེད་དུང་སེམས་མངར་མོའི་སྐྱེམས་ཆང་ཕུལ་འདུག།
དབྱར་གསུམ་མེ་ཏོག་ཐང་ན་སྐྱིད་ཀྱིས་འཚོ་ཞིང་།།
ཕྱུགས་ཀྱི་ཐང་མ་སྤང་གཞུང་ཡངས་པོར་བཀྲམ་པའི།།
བལྟས་པས་ཆོག་མི་ཤེས་པའི་ཚད་དུ་གླེང་བའི།།
སྦྲ་རྒན་གྲུ་བཞི་གན་ཚོར་ཡག་ཅིག་འདུག་པ།།
སྟོན་གསུམ་ཕྱུགས་ཀྱི་བཅུད་བཟང་ལྟེམ་མེར་འཁྱིལ་ཞིང་།།
དཀར་གསུམ་ཟས་ཀྱིས་ཕུད་ཁ་ལྷ་ལ་མཆོད་ཅིང་།།
ནོར་ལུག་ཤ་ཤེད་འཛོམས་པའི་སྡེ་ཚོ་ཞིག་ལ།།
གཡང་གི་ཕྱི་རིམ་ནང་རིམ་དགུ་རེ་ཆགས་ཡོད།།
དགུན་གསུམ་གྲང་རླུང་བཙན་པའི་རི་སྒང་འདི་ན།།
ལུས་ཀྱི་གོ་ཆ་ངར་མའི་མེ་དྲོད་བརྟེན་ཞིང་།།
ཁ་བ་བུ་ཡུག་རྡོག་པའི་སྣེ་ན་བརྫི་བའི།།
འབྲོག་རྒན་སྐྱ་བོ་འདི་ཚོའི་སྣང་བ་མཐོ་འདུག།
༼ དབྱིངས་ཀུན་གཞི། ༽