མཚོ་མོ་འདིའི་མིང་ལ་ཅི་ཟེར།
གུ་རུ་བླ་མཚོ།
སྙིང་གཟུགས་མཚོ།
འཇའ་རྫའི་བླ་མཚོ།
བརྗིད་ཆགས་གངས་རི་དཀར་པོའི་ཐུལ་འོག་ན།
སྔོ་ལྟེམ་མེར་འཁྱིལ་བའི་གུ་རུ་བླ་མཚོ།
མེས་པོ་ཚོས་བླ་ནས་བླ་རུ་བཀུར་བའི་ཡིད་འོང་གི་མཚོ་མོ།
གནས་འདིའི་གཟི་དཔལ་གྱིས་བདག་སེམས་ལྷོད་དུ་བབས།
རྣ་བས་ཡང་ཡང་གོ་མྱོང་ལ།
སེམས་ཀྱིས་ཡང་ཡང་བསམ་མྱོང་བའི།
རླབས་ཆེན་གྱི་མཚོ་མོ།
རི་ལམ་ཀྱག་ཀྱོག་རེ་རེ།
ལུས་སེམས་གཉིས་ཀྱིས་བརྒལ་རྗེས།
ལྟ་ན་སྡུག་པའི་ཡུལ་ལྗོངས་རེ་རེས།
བདག་ལ་བསུ་བ་ཞུ་བའི་སྣང་བ་འགོག་མེད་དུ་སྟེར།
དབུ་འཕང་མཐོ་བའི་གངས་རི།
བ་ལུ་དཀར་པོའི་བསུང་ཞིམ།
དུག་ཤིང་སྟག་མའི་མཚར་ཉམས།
གྲོག་ཆུ་ཕྲ་མོའི་སྙན་དབྱངས།
གནས་འདིའི་བཀོད་པས་སུམ་རྩེན་གནས་ལ་སྐྱེངས་པ་སྟེར།
དམངས་ཁྲོད་ཀྱི་ངག་རྒྱུན་རེ་རེས།
འུ་ཅག་ལ་དྭངས་གཙང་ཞེས་པའི་ཐ་སྙད་ཅིག་བསྟན་བྱུང་།
ཨིནྡྲ་ནི་ལའི་མདོག་ལྟར་སྔོ་བའི་མཚོ་ཆུའི་ཁ་དོག་བསྟན་བྱུང་།
སྣོད་བཅུད་ཞི་མཐུན་གྱི་ངེས་ཤེས་རྣལ་མ་རྙེད་བྱུང་།
ཡུལ་སྐོར་བའི་པར་ཆས་ནང་འགུལ་བཞིན་པའི།
སྙིང་གཟུགས་མཚོ།
ཡང་ན་གུ་རུ་བླ་མཚོ།
ཁྱེད་ཀྱི་དྭངས་གཙང་དང་བློ་ཁོག་གིས།
ངེད་ཅག་ལ་ཞི་ལྷོད་ཀྱི་ཞིང་ཁམས་ཤིག་བསྩལ།
གུ་རུ་བླ་མཚོ།
སྙིང་གཟུགས་མཚོ།
འཇའ་རྫའི་བླ་མཚོ།
ཁྱེད་ཀྱི་འགྲམ་ངོགས་ནས།
ས་མཐའི་འཁྱམ་པོ་ངས།
མེས་པོ་ཚོའི་གནའ་གཏམ་ལ།
དད་པ་བརྟན་པོ་རེ་རྙེད།
༼ སྨྱུག་སོན་ནོར་སངས། ༽