སེམས་ཀྱི་བླ་སྲོག་ཁུར་བའི་ནང་གྲོགས་དེ།།
མི་འགྱུར་ཐེར་ཟུག་ཀུན་གསལ་བུ་མོར་བསྒོམ།།
བསྟུད་མར་ལོ་ཟླའི་འཁོར་བརྩེགས་གས་སྲུབ་ནང་།།
སིམ་གདུང་འདྲེས་མའི་མངར་སྐྱུར་ལྷན་ཏུ་མྱང་།།
དུས་ཀྱི་བསྐལ་པའི་ཚེ་འདིའི་ཐེམ་སྐས་སུ།།
རྣམ་དཔྱོད་རིག་པའི་རྩལ་གྱི་ཡལ་འདབ་རྒྱས།།
ཤེས་འཇོན་ལྗོན་པའི་བསིལ་གྲིབ་ཐུ་འོག་ཏུ།།
ནེའུ་གསིང་སྐྱེ་བོའི་ཚོགས་ཀུན་འདུ་བར་བྲེལ།།
དབྱར་གསུམ་དྲོད་དང་ཆར་ཆུས་སྨིན་བྱེད་ཅིང་།།
བསེར་བུའི་སྙན་གྲགས་འགོག་མེད་ཕྱོགས་ཀུན་རྒྱུ།།
སྐྱེ་དགུའི་གཙུག་གི་ཅོད་པན་རྒྱན་འཛིན་པའི།།
ཡིད་སེམས་དྲོན་མོའི་འདི་ཕྱི་སྐྱབས་ཀྱི་མཆོག་ཉིད་དོ།།
བདག་ཉིད་ཤིན་ཏུ་ཕྲ་བའི་སྲིན་འབུ་ཙམ།།
ཁྱེད་ལ་སྐྱབས་འཚོལ་སྙིང་གི་གཤོག་པ་རེ།།
འགུལ་ཤུགས་བརྒྱ་ཕྲག་བཀོད་པའི་ཕར་ནང་ནས།།
ངལ་འབྲས་གསུང་སྙན་ཙམ་ཡང་མྱོང་ཐབས་བྲལ།།
ཁོ་བོའི་ནང་ཁོག་ཉེ་སའི་ལྗང་འདབ་རེ།།
བདག་དབང་བྲལ་བའི་དགུང་ཁའི་སྐར་ཚོམས་བཞིན།།
མཛེས་སྡུག་ཡིད་ལ་འཚེར་ཡང་ལག་ཟུང་དུ།།
འོངས་མེད་མཐོ་ཆེན་དགུང་ཁའི་དབྱིངས་སུ་བཞད།།
སྲོད་ཀའི་འཇིག་རྟེན་འཚོ་བའི་ནང་རོལ་ཏུ།།
ཞེན་ཆགས་སྙིང་ཤའི་འཕར་རྩ་ལྡིང་སྐབས་རེ།།
ཁེར་རྐྱང་ཡ་ཆུང་བྲིས་པའི་སྤྲིངས་ཡིག་དེ།།
ནུབ་ཁའི་རྣམ་རྟོག་གྲིབ་མའི་ངོས་སུ་འཕྱོ།།
ཆགས་སྡང་བཙན་པོའི་མངའ་དབང་ཉིད་གྱུར་པའི།།
འཛིན་ཞེན་སྒྱུ་མའི་ཞགས་པས་བཅིངས་པའི་སེམས།།
ཕྱོགས་འཛིན་རེས་སུ་ཆད་པོ་གཏམ་རྒྱུད་དག།
ན་ཟུག་སྣང་བརྒྱའི་ཁྲོད་དུ་གབ་ལ་བརྩོན།།
ཁྱོད་ཞལ་ཟླ་བ་སྟོང་གིས་གཞལ་མེད་པའི།།
མཛེས་སྡུག་སྟོང་ཕྲག་ཁུར་དུ་འཆང་བ་ཡི།།
འཛུམ་དཀར་འོད་དང་གྲིབ་མའི་ཉག་ཕྲན་ཙམ།།
རྩོལ་སྒྲུབ་འབད་བརྒྱའི་ཀློང་ནས་ཐོབ་པ་དཀོན།།
ཚ་གདུང་དུག་ལྡན་ཉམ་ཆུང་བདག་འདྲའི་དོན།།
རོ་བརྒྱ་བདུད་རྩའི་ཉིང་བཅུད་བསིལ་བའི་ཚལ།།
གསེར་ནག་ཁལ་བརྒྱའི་རིན་ཆེན་བཏང་བྱས་ཀྱང་།།
བརྩེ་བའི་ལག་ཟུང་བདག་ལ་ཕྱོགས་ཐབས་དབེན།།
འཁོར་བའི་གར་སྟེགས་རྨི་ལམ་སྒྱུ་མའི་ནང་།།
བདེ་མོའི་འཇིག་རྟེན་བདེ་མོའི་ངང་ལ་རྫོགས།།
འདུ་འབྲལ་ཆོས་ཉིད་འདུས་བྱས་རང་གཤིས་དེ།།
ཟིན་མེད་དྲན་པའི་ངོས་སུ་འཆར་འགོང་ཙམ།།
༼ སྒང་ཁྱུང་སྐྱེས། ༽