སྐྱ་རེངས་བུ་མོའི་སྤྱན་ཟུང་མ་ཕྱེ་གོང་།།

སྐར་མའི་འདར་སྒྲས་འཇིག་རྟེན་སྒོ་མོ་སྐྱོམ།།

དུང་ཆུང་ཟླ་བ་ལྷ་མོའི་འཛུམ་འོག་ནས།།

མཚན་མོའི་མཛེས་སྡུག་ང་རང་ཁོ་ནས་རོལ།།

ཆར་ཞོད་སྙི་མོས་ས་གཞིའི་གནས་མལ་བརླན།།

ཁྲ་ཚོམ་ཆུན་པོའི་ཡང་བཅུད་དལ་གྱིས་སྨིན།།

ཟིལ་པས་བཏུམས་པའི་སྣ་མང་བདུད་རྩི་དེ།།

བུང་བ་གཞོན་ནུས་ཉམས་སུ་མྱོང་བར་མཐོང་།།

རྩྭ་ཐང་ཡངས་མོའི་སྟེང་གི་མཚར་སྣང་རེ།།

མིག་དབང་གསོ་བའི་སྒྱུ་རྩལ་རི་མོ་ཉིད།།

མཐོང་བའི་ལྟད་མོ་བརྗོད་དུ་མེད་པ་དག།

ཡུལ་གྱར་སེམས་ཀྱི་ཟད་མེད་བདེ་སྣང་ངོ་།།

དབྱར་ཟླས་ལྗང་ལོ་གྱོན་པའི་སྒེག་ཉམས་དེས།།

ཡིད་ཀྱི་སྡུག་ཡུས་མ་ལུས་གད་བདར་བྱས།།

བག་ཕེབས་སྣང་བས་བདེ་སྐྱིད་དཔལ་ཡོན་བསྩལ།།

གནམ་སའི་བར་གྱི་སྣོད་བཅུད་སྙིང་ལ་སྡུག།

གངས་ཀྱིས་བསྐོར་བའི་ནོར་འཛིན་སྤང་གཤོང་དུ།།

རྟ་ནོར་ལུག་གསུམ་ཁྲ་རྒྱན་གཟུགས་རིས་མཛེས།།

མཐིང་སྨུག་དུ་ཞག་ཅན་གྱི་ལྷས་འདབས་ནས།།

འབྲོག་མིའི་འཚོ་བས་ཡིད་ཀྱི་དབང་པོ་འཕྲོག།

བསིལ་རླུང་ཞི་འཇམ་ལྡིང་ནས་རྩྭ་རྩེར་རེག།

རྒྱང་མཐའི་སྤྲིན་པ་མི་སྡོད་ཡུལ་གཞན་འགྲིམས།།

ཉི་འོད་མི་བཞུགས་ནུབ་རིའི་ཕྱོགས་སུ་བསྐྱོད།།

ས་སྲོད་དྲན་པས་སྐྱོ་གཞས་རྒྱང་དུ་བླངས།།

ང་ནི་གནམ་མཐའི་བྱེའུ་ཕྲུག་རྩལ་མེད་ཡིན།།

མཁའ་ཡི་སྐྱིད་སྡུག་ལག་པས་ཟིན་ཡུལ་མིན།།

ལྷོད་བདེ་ཀློང་ནས་དབྱར་གྱི་པང་དུ་ལོག།

ཁ་རོག་བསྡད་དེ་མཐོང་ཐོས་མྱོང་གསུམ་བྲིས།།

མི་ཚོགས་མང་པོའི་དཀྱིལ་ནས་རང་རློམ་གྱིས།།

གོམ་འགྲོས་རླུང་ཁར་གཏད་ནས་ལམ་ལ་ཆས།།

སླར་ཡང་ཕྱིར་མིག་ཤོར་སའི་འབྲོག་ཐང་གན།།

ཚེ་རབས་ལས་སྐལ་མང་པོའི་ཕ་གཞིས་འདྲ།།

སྲོལ་རྒྱུན་རྨུ་ཐག་རིང་མོའི་རླབས་རྒྱུན་དེ།།

མ་འགག་ཁད་ཀྱིས་བཞུར་བའི་ཚུལ་དེ་བཟང་།།

བགྲེས་པོའི་སྤྱན་ཆབ་ལྷུང་བའི་ཤུལ་མཐོང་ན།།

མི་རིགས་ཤིག་གི་དར་རྒུད་ལོ་རྒྱུས་དྲན།།

ངོ་མཚར་འོད་སྟོང་འཛུམ་པའི་ས་ཆ་རེ།།

རྐང་རྗེས་བཞག་པས་བློ་ཡང་བདེ་པོ་བྱུང་།།

འགྲུལ་བཞུད་ལམ་གྱི་སྙན་ངག་དོན་སྟོང་མ།།

རེ་ཞིག་བྲི་བའི་ངལ་བ་གཡོལ་ཐབས་འཐེན།།

དྲི་མེད་དྭངས་གཙང་ནམ་མཁའ་བདེ་མོ་བྱོས།།

མཚར་སྡུག་གངས་དཀར་ལྷུན་པོ་བདེ་མོ་བྱོས།།

མཐའ་མེད་ནེའུ་གསིང་སྨན་ལྗོངས་བདེ་མོ་བྱོས།།

རྒྱང་བཞུད་ཚོར་བས་སླར་ཡང་བསྐོར་ནས་ཡོང་།།

༼ གངས་ཆབ་ལྷ་སྲས། ༽