ལམ་

ཕྲན།

གསུམ་ལྡན་བླ་མ་བསྟེན་བཞིན་བསྟེན་བཞིན་ཡོང་།།

དམ་ཆོས་འོ་ཞོ་འཐུང་བཞིན་འཐུང་བཞིན་ཡོང་།།

ཆོས་མཐུན་སྤུན་དང་འདྲིས་བཞིན་འདྲིས་བཞིན་ཡོང་།།

ལོ་ཟླའི་སྐས་ཐེམ་བགྲོད་བཞིན་བགྲོད་བཞིན་ཡོང་།།

དཀར་ནག་རྒྱུ་འབྲས་བསམ་བཞིན་བསམ་བཞིན་ཡོང་།།

འཇིག་རྟེན་འཁོར་བ་གླེང་བཞིན་གླེང་བཞིན་ཡོང་།།

རས་གཟན་ཕྲག་ཏུ་གཟར་བཞིན་གཟར་བཞིན་ཡོང་།།

ཕལ་བའི་འཚོ་བ་རོལ་བཞིན་རོལ་བཞིན་ཡོང་།།

དྲིན་ཆེན་ཕ་མ་དྲན་བཞིན་དྲན་བཞིན་ཡོང་།།

མི་ཚེའི་རྐང་ལམ་འདེད་བཞིན་འདེད་བཞིན་ཡོང་།།

མདུན་ལམ་ཀྱག་ཀྱོག་བརྗེ་བཞིན་བརྗེ་བཞིན་ཡོང་།།

གདམ་ཀའི་རི་མོ་སུབ་བཞིན་སུབ་བཞིན་ཡོང་།།

སྐྱིད་སྡུག་གླུ་རུ་ལེན་བཞིན་ལེན་བཞིན་ཡོང་།།

བཟང་ངན་མི་དང་འཕྲད་བཞིན་འཕྲད་བཞིན་ཡོང་།།

ཚོར་བའི་བཟི་ཆང་རྔུབ་བཞིན་རྔུབ་བཞིན་ཡོང་།།

ཚིག་གི་རྒུམ་འབུ་འཐུ་བཞིན་འཐུ་བཞིན་ཡོང་།།

ལང་ཚོའི་མེ་ཏོག་རྙིད་བཞིན་རྙིད་བཞིན་ཡོང་།།

ལས་ཀྱི་ཉི་མ་འདེ་བཞིན་འདེ་བཞིན་ཡོང་།།

ཚེ་ཡི་སྒོ་དར་སྲུང་བཞིན་སྲུང་བཞིན་ཡོང་།།

འདས་དོན་ཕྱི་མིག་འཕྲེང་བཞིན་འཕྲེང་བཞིན་ཡོང་།།

ཨ་གསར་གཤིས་ཀ་སྤོང་བཞིན་སྤོང་བཞིན་ཡོང་།།

རེ་དོགས་མིག་ཆུ་བཞུར་བཞིན་བཞུར་བཞིན་ཡོང་།།

ནང་སེམས་དབྱངས་ལ་འདེགས་བཞིན་འདེགས་བཞིན་ཡོང་།།

སྟོང་བསམ་རྨི་ལམ་རྨི་བཞིན་རྨི་བཞིན་ཡོང་།།

མི་འདོད་ནད་ཀྱིས་མནར་བཞིན་མནར་བཞིན་ཡོང་།།

མི་བཟོད་གདུང་བས་མནན་བཞིན་མནན་བཞིན་ཡོང་།།

མི་སྡུག་གཟུགས་ཀྱིས་སླུ་བཞིན་སླུ་བཞིན་ཡོང་།།

མི་སེམས་འཇའ་ཚོན་འདེད་བཞིན་འདེད་བཞིན་ཡོང་།།

སྐྱེ་འཆིའི་ཟློས་གར་འཁྲབ་བཞིན་འཁྲབ་བཞིན་ཡོང་།།

འདུ་བྲལ་ཞེ་ལ་ལྷུང་བཞིན་ལྷུང་བཞིན་ཡོང་།།

མི་ཚེའི་གླེགས་བམ་ཀློག་བཞིན་ཀློག་བཞིན་ཡོང་།།

བྱིས་པའི་རྩེད་ར་བརྗེད་བཞིན་བརྗེད་བཞིན་ཡོང་།།

རྟོག་ངན་ན་བུན་འཁྲིག་བཞིན་འཁྲིག་བཞིན་ཡོང་།།

སྡིག་པའི་ཁྲེས་པོ་འཁུར་བཞིན་འཁུར་བཞིན་ཡོང་།།

རྒྱུས་མེད་ས་མཐའ་སྐོར་བཞིན་སྐོར་བཞིན་ཡོང་།།

བརྩེ་བའི་མི་དང་འགྲོག་བཞིན་འགྲོག་བཞིན་ཡོང་།།

སྙན་ངག་ཟས་སུ་སྒོམ་བཞིན་སྒོམ་བཞིན་ཡོང་།།

འཆར་ཡན་རོལ་རྩེད་ངོམ་བཞིན་ངོམ་བཞིན་ཡོང་།།

རྒྱལ་ཕམ་མི་ཚེ་དྲན་བཞིན་དྲན་བཞིན་ཡོང་།།

ཡོད་ཚད་འགྱུར་བ་རྟོགས་བཞིན་རྟོགས་བཞིན་ཡོང་།།

༼ འོད་འཛིན་མ། ༽