གསེར་ལུང་པདྨ་གད་པའི་ཟེའུ་འབྲུ་རུ།།
འཕགས་ཚོགས་བུང་བ་གཡོ་བའི་ཟུར་ཁ་ནས།།
དད་འདུན་སྙིང་གི་པདྨོ་ཁ་ཕྱེས་ཏེ།།
རེ་བ་རེ་བས་འགྲུབ་པའི་སྨོན་འདུན་ཞུས།།
དུང་དུང་ཡིད་ཀྱི་བརྟན་པ་འཕྲོག་པའི་ཞིང་།།
མཇལ་བའི་ལས་སྐལ་རེ་རེ་ཐོབ་པའི་མོད།།
བདག་སེམས་ཀུན་གཞི་ཡངས་མོའི་ཕ་མཐའ་རུ།།
མ་བཅོས་ཚོར་བའི་མེ་ཏོག་ཡང་ཡང་བཏབ།།
ཤར་ཕྱོགས་ཟླ་བ་འཛུམ་པའི་ཉ་ག་འམ།།
ཡིད་ཀྱི་རི་དྭགས་རྒྱུ་བའི་སྲང་ལམ་ནས།།
ཞེ་འདང་ཉི་མ་འཚེར་བའི་དུང་སེམས་ཀྱིས།།
བྱང་ཕྱོགས་གཡུ་ལོ་རྒྱས་པའི་རི་ལ་བལྟས།།
རི་དེ་གུར་གུམ་སྤུང་བའི་ལུང་ཤོད་འདྲ།།
ཚིག་འདི་གསེར་གྱི་རི་མོ་བྲིས་དང་མཚུངས།།
སྒྲ་འཛིན་རི་དྭགས་པུར་གྱིས་བསླུས་པ་བཞིན།།
དུང་ཞེན་གཅིག་ཏུ་སྦྲེལ་བའི་ཉམས་ལ་ཆགས།།
ཚོར་བ་གླུ་དང་འདྲེས་པའི་སྐབས་དག་དང་།།
རྨི་ལམ་མངོན་སུམ་མྱོང་བའི་སྐད་ཅིག་དག།
བདེ་སྡུག་རོལ་མོ་དཀྲོལ་བའི་སེམས་ཉིད་ཀྱི།།
བརྩེ་བའི་བཟི་ཁ་མཚོན་པའི་མཚོན་རྟགས་ཡིན།།
འཁོར་ཞིང་འཁོར་བའི་དག་ཞིང་གཞན་ཞིག་ནས།།
མཛེས་ཤིང་འཛུམ་པའི་བཞིན་རས་དེ་ཁོ་ནར།།
བདག་ཡིད་སྐྱེད་མོའི་ཚལ་གྱི་དོ་ར་ནས།།
སྙན་ཚིག་ཟིལ་བའི་མུ་ཏིག་ལན་མང་གཏོར།།
འུར་འུར་ཟིང་ཟིང་རྒོད་པའི་དེང་དུས་འདིར།།
མི་འགྱུར་གཤིས་ཀྱི་སྒམ་ཚུགས་སྲ་བ་ཡི།།
ལུས་སེམས་བྱིས་པ་སྲུང་བའི་བྱེད་པོ་ལ།།
དགའ་སྡུག་སླ་བའི་ཁོག་པ་ཡང་ཡང་བསྟན།།
སྟོན་ཀའི་ཤིང་ལོ་བདག་སེམས་གཉོམ་པོ་བཞིན།།
ཡུད་ཙམ་སྐྱོ་བའི་རང་གཟུགས་ངོམ་དང་ལྷན།།
བསིལ་འཇམ་རླུང་བུས་ཡར་མར་བདས་པའི་ཚེ།།
གྱེས་བྲལ་ཕྱག་གི་བདེ་མོ་ལན་གསུམ་ཕུལ།།
མི་རྟག་བསུ་མས་སོ་སོ་བཀར་ན་ཡང་།།
རྒྱང་རིང་འཚོ་བའི་གྲུ་ཟུར་རེ་རེ་ནས།།
དྲན་པའི་གདུང་བ་ཚིགས་སུ་བཅད་དེ་ནི།།
ཕལ་བའི་མི་ཚེ་ཕལ་བའི་ས་ནས་བསྐྱལ།།
ལོ་ཟླ་ཆུ་བོ་བཞིན་དུ་མདུན་ནས་རྒྱུག།
མི་ཚེ་མར་མེ་བཞིན་དུ་ཟད་ན་ཡང་།།
ཚེ་རབས་གཤིས་སུ་ཐིམ་པའི་ཁྱོད་ཉིད་དང་།།
ལས་ཀྱི་སྙན་ངག་མི་ཚེའི་གཏན་གྲོགས་ཡིན།།
༼ འོད་འཛིན་མ། ༽