གསོན་ངོགས་འཇིག་རྟེན་སྒྱུ་མ་ཡི་གྲོང་ནས།།
དགའ་ཕྱོགས་འཚོ་བའི་དབྱངས་རྟ་དེ་འགུགས་བཞིན།།
སྣ་ཚོགས་ཚོར་འདུའི་གར་སྟབས་ལ་རྩེན་ན།།
སྐྱིད་ཀྱི་སྣང་བའི་ཡོ་ལང་རེ་རྒྱས་ཡོང་།།
དབྱངས་གསལ་ཡི་གེའི་མེ་ཏོག་གི་ཚོགས་ལ།།
ཞེན་ཆགས་མིག་ཟུང་ཕར་ཕར་དུ་ཕྱོགས་ནས།།
འདིར་སྣང་འཁོར་བའི་སྐྱིད་སྡུག་གི་རི་མོ།།
གཞས་སུ་འཐེན་པ་གཞོན་ཆུང་གི་འགྲོས་རེད།།
མ་གཉིད་འཚོ་བའི་སྣང་བརྙན་གྱི་བསྡུས་གཟུགས།།
གཉིད་དུས་རྨི་ལམ་སྣ་ཚོགས་ཀྱི་སྣང་བ།།
ཡོད་ཚད་སྙན་མོའི་དབྱངས་རྟ་རུ་དྲངས་ཏེ།།
ལྷོད་ཆགས་ཞི་བའི་རི་གྲོང་དུ་ཆས་འགྲོ།།
རྫོགས་མེད་ལས་བྲེལ་བྱ་གཞག་གི་ཀློང་ནས།།
ལུས་སེམས་དལ་བའི་དུས་ཚིགས་ཤིག་དཀོན་རུང་།།
སྒྱུ་འཕྲུལ་ཚིག་ཚོགས་མགྲིན་ངག་ཏུ་གྱེར་ཏེ།།
དབྱངས་ཀྱི་འཇིག་རྟེན་འགྲིམ་རྒྱུ་ལ་གོམས་ཡོད།།
གུ་ཡངས་གཙང་པོའི་བཞུར་རྒྱུན་དང་འགྲོགས་ཏེ།།
སྙན་ཆང་བདུད་རྩི་ངོམས་མེད་དུ་རྔུབ་བཞིན།།
ཚེ་ཡི་འདུ་བྱེད་སྤྲོ་ཉམས་ཀྱིས་རྫོགས་ན།།
འཚོ་བའི་སྙིང་པོ་དེ་ལས་གཞན་མི་དགོས།།
ལྷིང་འཇགས་ལྗོན་པའི་བསིལ་གྲིབ་ཀྱི་འོག་ནས།།
སྙན་ཚིག་ཟླ་བའི་འོད་མདངས་དེ་འཚོལ་བཞིན།།
འབྱུང་འགྱུར་རྨི་ལམ་བརྒྱ་སྟོང་ལ་རེ་བའི།།
ན་ཆུང་སྣང་དྭངས་སྤྲིན་དཀར་དང་འདྲ་སོང་།།
ལན་གཅིག་མི་ཚེའི་འགྲུལ་བཞུད་ཀྱི་ཁྲོད་ནས།།
དཀའ་སྡུག་འཚོ་བའི་རི་ལུང་དེ་བརྒལ་དུས།།
ནང་སེམས་བསླུ་མེད་འཁྲེང་ཡུལ་གྱི་མཆོག་ནི།།
ལས་འཕྲོའི་ཐ་སྙད་འདི་དག་ལས་མི་འདུག །
༼ འཇོ་མདའ་པདྨ། ༽