རྒྱང་རིང་བཞུད་པའི་སྤྲིན་པ་དཀར་པོ་དེས།།

ང་ལ་ཕྱི་མིག་འཕངས་པའི་ཚུལ་ཞིག་མཐོང་།།

ཡང་ན་རླུང་བུ་འཇམ་པོ་ལྡང་བ་འདིས།།

ལོ་དེའི་དབྱར་ཁ་དྲན་པ་འདི་ཙམ་རེད།།

དེ་དུས་ཆུ་བོ་དྭངས་ཤིང་རབ་ཏུ་གཙང་།།

ནམ་མཁའི་དབྱིངས་ལ་ནག་ནོག་གོས་པ་མེད།།

ས་ཆེན་བརྩེ་བ་འཐུལ་བའི་དབྱར་ཁ་དེར།།

མགུར་མའི་གཞས་ཤིག་བཏང་བ་འདི་འདྲ་རེད།།

གཞས་ཆུང་སྙན་མོ་སྲིད་པའི་མགུར་གླུ་ཡིན།།

སེམས་དང་བསམ་པ་མཚོན་པའི་ཡིག་འབྲུ་ཡིན།།

གདུང་བ་ཡེ་ནས་མེད་པའི་དན་རྟགས་ཡིན།།

ལོ་དེའི་དབྱར་ཁ་ཧ་ཅང་མཛེས་པོ་ཡོད།།

ཁུ་བྱུག་གསུང་སྐད་སྙན་པ་དེ་དུས་ཐོས།།

འཇོལ་མོས་གཞས་ཆུང་ལེན་པ་དེ་དུས་ཚོར།།

སྣང་བའི་གར་ལ་རྩེན་པའི་ང་དང་ཁྱོད།།

འཇིག་རྟེན་གསར་པ་ཞིག་གི་ཕྲ་རྒྱན་ཡིན།།

གཞོན་པའི་དུས་ཀྱི་སྣང་བ་མཐོན་པོ་དང་།།

གཞན་བསྟུན་མི་ཤེས་ཨུ་ཚུགས་མཁྲེགས་པོ་ཅན།།

འཛུམ་དང་དགོད་སྒྲས་གང་བའི་དུས་སྐབས་ཀྱི།།

ལོ་དེའི་དབྱར་ཁ་དྲན་ན་མཛེས་སྡུག་ལྡན།།

ལོ་དེའི་དབྱར་ཁ་བདག་ལ་དབང་བ་འདྲ།།

རྩེད་དགོད་ལས་ལ་བྲེལ་བ་ངེད་ཅག་གིས།།

རང་སྣང་མཐོན་པོ་ནམ་མཁའི་ཁྱོན་ཡངས་སུ།།

འུར་གཏམ་སྣ་ཚོགས་བསྒྲགས་པའི་དུས་ཀྱང་ཡོད།།

ད་ནི་བརྩེ་བའི་གྲོགས་དག་རིང་དུ་གྱེས།།

རང་སེམས་རང་གིས་ལྟ་ཞོར་རང་ཉིད་ནི།།

ཁེར་འགྲོ་ཁེར་འདུག་བྱས་ནས་གཅིག་པུར་ལུས།།

སེམས་པའི་ཕྱི་ནང་འདི་ཡང་སུ་ཡིས་རྟོགས།།

སྔོན་ནས་འདྲིས་པའི་མི་རྣམས་སོ་སོར་བྲལ།།

བརྩེ་བའི་ས་ཆེན་དེ་ཡང་སྐྱ་བོར་གྱུར།།

རང་ལ་དབང་བའི་གྲིབ་གཟུགས་ནག་པོ་དང་།།

རིང་དུ་འགྲོགས་ནས་ཡོང་བ་དེ་ག་ཙམ།།

ཕོ་ལོ་ཉི་ཤུའི་སྣང་བ་རྫོགས་ལ་ཉེ།།

འུར་ཟིང་ལས་ལ་དེ་ཙམ་མོས་པ་མེད།།

སོལ་དལ་བག་ཕེབས་ངང་ནས་འདུག་མཁན་ང་།།

དགའ་སྐྱོའི་དཔུང་རོགས་ཟེར་བ་ཡིག་ཚོགས་ཡིན།།

སྤྲོས་པའི་གར་སྟེགས་སྟེང་གི་ཡིག་འབྲུ་དག །

ང་ལ་མཚོན་ན་ཧ་ཅང་རིན་ཐང་ཡོད།།

འགྱུར་མེད་སེམས་ཀྱི་གྲོགས་པོ་འདི་ལས་གཞན།།

ང་ལ་གང་ཡང་མེད་ཅེས་ཐ་ཚིག་བསྒྲགས།།

༼ རྫ་ཤུལ་བློ་བཟང་། ༽