གངས་ཀྱི་བདུད་བརྩི་ཟིལ་མ་ལྷུང་ལྷུང་དུ་འབབ་ཞིང་།།
ལྕང་ཤུག་ལོ་འདབ་རྒྱས་པའི་ནགས་ཚལ་གྱི་དབུས་སུ།།
འཇོལ་མོའི་གསུང་སྐད་སྙན་མོ་རྣ་ལམ་དུ་རྒྱུ་བའི།།
ཕ་ཡུལ་སྨན་ལྗོངས་ཕྱུག་མོའི་དབྱར་ཁ་འདི་སྐྱིད་པ།།
རྫ་རི་སྨུག་ལོང་འཐིམ་སའི་ཕ་ཡུལ་གྱི་འབྲོག་སྡེའི།།
ནོར་གནག་སྟོང་གིས་འཁྱུད་པའི་སྦྲ་ཁྱིམ་དེ་མཐོང་ན།།
དབྱར་གྱི་མཛེས་སྡུག་བརྐུས་པའི་ཕ་ཡུལ་གྱི་དག་ཞིང་།།
བོད་མིས་བདེ་སྡུག་འཚོལ་སའི་གླིང་ཀ་འདི་སྐྱིད་ཨང་།།
ཆར་གྱིས་ཡང་ཡང་གསོས་པའི་སྤང་ཐང་གི་མཐིལ་ན།།
མེ་ཏོག་གེ་སར་སོགས་ཀྱི་ལང་ཚོ་དེ་ངོམ་བཞིན།།
བུང་བའི་གུར་ཁྱིམ་ཕུབ་པའི་མཛེས་སྡུག་དེ་མཐོང་ན།།
མི་སེམས་བསིལ་རླུང་འཇམ་པོའི་ཞིང་ཁམས་སུ་སྐྱེལ་འགྲོ།།
གནམ་གྱི་ཀ་བ་བཏེགས་པའི་རྫ་རི་ཡི་རྐེད་ནས།།
སྨུག་སྤྲིན་སྐེད་རག་བཅིངས་པའི་ངང་ཚུལ་དེ་མཐོང་དུས།།
ཡིད་འོང་ལྟ་ན་སྡུག་པའི་མཁའ་གོས་ཀྱི་འོག་གི།།
མཛེས་སྡུག་མུ་མཐའ་མེད་པའི་ཕ་ཡུལ་དེ་སྐྱིད་སོང་།།
མ་བཅོས་རི་ཆུའི་སྒེག་མོའི་མངའ་ཐང་དེ་རེག་ན།།
ཞི་ལྷོད་ནོར་ལུག་འཚོ་སའི་དབྱར་གཞུང་གི་དུས་སུ།།
རྣམ་བཀྲ་མེ་ཏོག་འཛུམ་སའི་སྐྱེད་ཚལ་གྱི་དབུས་ན།།
དབྱར་གྱི་མཛེས་པ་སྣུམ་པོ་ཐེངས་གཅིག་ལ་རོལ་ཤོག།
༼ ཁྱུང་གསེར་སྨྱུག། ༽