དགའ་སྐྱོ་འདྲེས་མའི་མི་ཚེའི་ཟློས་གར་ཁྲོད།།
སྐྱི་ལ་སྡུག་གི་རི་མོ་འབྲི་བཞིན་དུ།།
ཞེ་རུ་མ་མཐུན་ཚོན་མདངས་དམར་སེར་ཞིག །
དབང་མེད་ལས་ཀྱིས་བསྐོས་པ་ངོ་རེ་གནོང་།།
དབེན་གནས་ལུང་རིགས་འཚོལ་བའི་རི་ཁྲོད་ནས།།
མཁའ་ཡི་ཆུ་འཛིན་མིག་ལམ་རྒྱུ་བ་ན།།
རྒྱང་དུ་གནས་པའི་སེམས་ཀྱི་སྙིང་ཉེ་ལ།།
ཚིག་གི་འཕྲིན་ཐུང་སླད་མར་འདི་ལྟར་བྲིས།།
ཀྭ་ཡེ་རི་ཆུས་བཅད་པའི་ཕ་རོལ་གྱི།།
མཚར་སྡུག་ཡིད་དབང་བཅོམ་པའི་མེ་ཏོག་མ།།
འུར་ཟིང་འདུ་འཛི་ཆེ་བའི་རི་གྲོང་ནས།།
སྐྱིད་པའི་ངང་ནས་འཚོའམ་སྙིང་ཆུང་མ།།
ང་དང་གྲིབ་གཟུགས་སྨྱུག་མའི་གསེབ་ན་གཡོ།།
གྲང་བསིལ་རླུང་བུས་སེམས་སུ་ན་ཟུག་བསླངས།།
གཞུང་བཟང་ཟབ་མོའི་དྲི་བཟང་ཚོར་ན་ཡང་།།
དགའ་བའི་འཛུམ་དང་སྤྲོ་བའི་སྣང་བ་གང་།།
མཚན་དང་ཞག་གི་རྨི་ལམ་རིང་མོའི་ནང་།།
ཆུང་ནས་འདྲིས་པའི་བྱམས་པ་གཡུ་ཆུང་མ།།
ཡང་ཡང་འཕྲད་པའི་སྣང་བ་འཆར་བ་ནའང་།།
ལྷན་འཛོམས་ལས་ཀྱིས་འཕྲད་པའི་བསྐལ་བ་ཅི།།
འཕྲུལ་སྣང་སྒྱུ་མའི་གར་སྟབས་ག་ལ་བདེན།།
མངར་སྐྱུར་བྲོ་བ་རང་ཉིད་གཅིག་པུས་རྟོགས།།
གྱེས་བྲལ་ལོ་ཡི་སྡུག་བསྔལ་ཅི་འདྲ་མང་།།
དྲན་པའི་སེམས་སུ་ཡང་ནས་ཡང་དུ་འཁོར།།
ཁྲུང་ཁྲུང་དཀར་མོ་ལྷོ་རུ་འཕུར་ནས་སོང་།།
རྨས་པའི་ཁྲུང་ཆུང་སང་ལོ་འཕྲད་ནས་འོང་།།
འདུས་བྲལ་འཁོར་ལོ་བརྒྱ་སྟོང་འཁོར་བ་ན།།
སྨོན་ལམ་མཐུ་ལས་གཞིས་གཅིག་འཛོམས་ཀྱང་སྲིད།།
འོན་ཏང་ཞེ་མཐུན་རོགས་ལོ་རྩེད་ར་ནས།།
དགའ་དུས་དགའ་རོགས་མེད་པས་ཤུགས་རིང་ཤོར།།
སྐྱོ་དུས་སྐྱོ་རོགས་མེད་པའི་མི་ཆུ་བྱོ།།
ཀྱེ་མ་འདི་འདྲའི་ཚོར་སྣང་སུ་ཡིས་སེལ།།
རི་ནས་རི་སྤྱང་འགྲོག་ན་ཚོར་བ་བསླངས།།
སྤང་ནས་མེ་ཏོག་མཐོང་ན་ཁྱོད་རང་དྲན།།
སྔོན་ལས་ཕྲན་བུ་ཞིག་གིས་འུ་གཉིས་ཀ །
འདི་ལྟར་བཀོད་སྒྲིག་བྱས་པ་སུ་ལ་ལན།།
ཁ་བ་དཀར་པོ་བརྩེ་སེམས་མི་ལྡན་པས།།
སྙིང་རྗེའི་གནས་ལུགས་བཤད་པ་ངལ་བའི་རྒྱུ།།
གལ་སྲི་གནམ་རྒན་མ་ཁྱོད་སེམས་ཡོད་ཚེ།།
སྐྱིད་སྡུག་མི་ཚེ་ལན་གཅིག་སྐྱོབ་པར་འཚལ།།
༼ དབྱངས་ཞི་བ། ༽