སྦྲ་གུར་མེ་ཏོག་འཛོམས་པའི་སྐྱེད་ཚལ་ནས།།
འབྲུ་དྲུག་མ་ཎིའི་དབྱངས་རྟ་འཐེན་ཞོར་དུ།།
དཀར་གསུམ་ཟས་ལ་རོལ་བཞིན་འཚོ་བ་ཡི།།
འབྲོག་པའི་མོ་སྨན་ཚོགས་ལ་ཡིད་རབ་དུང་།།
ཞིམ་མངར་འོ་ཇའི་མཆོད་པ་ལྷ་ལ་འབུལ།།
བྲོ་ལྡན་རྩམ་པའི་ཟས་ཕུད་ཕ་མར་སྟེར།།
འབྲོག་ཁྱིམ་གཡང་ནོར་སྲུང་བའི་མི་མོ་ལ།།
སྙིང་གི་དབུས་ནས་ཞེན་ཆགས་མདའ་མོ་ཤོར།།
ཡིད་འོང་ཐེར་ཕྲུག་འཇམ་གོས་ལུས་ལ་གྱོན།།
དགོ་དགོ་འབྲི་མོའི་བཞོ་དབྱངས་ངག་ཏུ་གྱེར།།
ལས་འབྲས་རང་གི་མིག་འབྲས་ལྟར་དུ་སྲུང་།།
གངས་ཀྱི་མཛངས་མ་དག་ལ་ཡིད་རེ་སྨོན།།
གནག་སྣུམསྐྲ་ལོ་ལན་བུ་རླུང་ཁར་སྐྱོད།།
རབ་དཀར་ངོ་ཡི་མཛེས་སྡུག་ཟླ་བར་འགྲན།།
ལྡེམ་མྱུར་གཟུགས་ཀྱི་ལང་ཚོ་སྤང་ནས་ངོམ།།
ཁ་བའི་སྐྱེས་མ་འདི་རྣམས་མིག་ལ་མཛེས།།
ལྷད་མེད་འཛུམ་ཆུང་མེ་ཏོག་འདབ་མ་གྲོལ།།
མ་བཅོས་བརྩེ་བའི་རྨུ་ཐག་ཡུན་དུ་སྲིང་།།
ཁྲེལ་གཞུང་རྫ་ཆུ་དྭངས་མ་དལ་གྱིས་བཞུར།།
མཐོ་སྒང་འབྲོག་པའི་བུ་མོ་གཅེས་པར་འོས།།
ཕ་སྐད་མ་ཡིག་རང་གི་སྲོག་ལྟར་གཅེས།།
སྦྲ་གུར་སྲོལ་བཟང་མེས་པོའི་རྒྱན་དུ་སེམས།།
མི་གཡོ་རང་གཤིས་མངའ་བའི་འབྲོག་མོ་ཚོ།།
འུ་ཅག་གངས་ཅན་བོད་ཀྱི་རྒྱུད་འཛིན་ཡིན།།
༼ འཇོ་མདའ་པདྨ། ༽