གྲང་རེག་ཁུར་པོ་བྱེད་པའི་སྟོན་རླུང་ཞིག།
གནས་འདིར་མགྲོན་དུ་ཕེབས་པའི་ཉིན་མོ་ནས།།
གཡུ་ལོ་ལྗོན་པའི་ཡལ་ག་རབ་གཡུག་ཅིང་།།
དབྱར་ཟླ་རིང་མོ་ཕྱོགས་ལ་བདེ་མོ་བྱེད།།
དྲི་ཞིམ་མེ་ཏོག་ལུས་ལ་འཁྱུད་བྱེད་པའི།།
བཅུད་ལེན་དགའ་མའི་གྱེས་པའི་གདུང་བ་ཡིས།།
འཛུམ་ཆུང་འདབ་ལོ་དམར་པོ་ཐང་དུ་གཏོར།།
མགོ་བོ་དུད་དུ་བསྐྱོད་ནས་མྱ་ངན་བྱེད།།
དབྱར་ཟླའི་དགའ་མ་རྒྱང་དུ་གྱེས་པ་ལ།།
དྲག་པོ་ཤུགས་གླུ་འཐེན་པའི་སྟོན་རླུང་གིས།།
སྔོན་མོ་གཡུ་ཆུང་བཞུས་ནས་བཀོད་འདྲ་བ།།
སྤང་ལྗོངས་གཡུ་ཡི་ཚོན་ཅན་རྙིང་པར་བྱེད།།
དྲག་ཆར་མཚོན་གྱི་རྗེས་སུ་རབ་སྙེག་པའི།།
སྤྲིན་གྱི་རྡོ་ཆར་འབབ་པའི་སྟོན་དུས་སུ།།
འདབ་སྟོང་གེ་སར་འཛུམ་པའི་རྒྱ་སེ་དག།
གསོན་མེད་ཤུལ་དུ་བརླག་པ་ཡིད་རེ་མུག།
འོན་ཀྱང་འདོད་འཇོ་གསེར་གྱི་ས་གཞི་ལ།།
འབྲས་དྲུག་གཡུར་དུ་ཟ་བའི་ལོ་ཏོག་དག།
སྨིན་ལེགས་རབ་ཏུ་རྫོགས་པའི་དུས་ཚིགས་འདི།།
ཨ་ཁུ་ཞིང་པའི་ཡིད་སེམས་ཅི་མི་སྤྲོ།།
བང་མཛོད་འབྲུ་ཡིས་བཀང་པའི་དུས་སྟོན་རྒྱས།།
སོ་ནམ་ལས་ལ་ཕྱོགས་པའི་ཞིང་པ་དག།
ངོ་སོ་བཅོ་ལྔའི་དུང་གི་ཟླ་ལྟར་ངོམ།།
སོ་ཕྲེང་མུ་ཏིག་འོད་ཀྱི་འཛུམ་པ་གྲོལ།།
༼ བོད་སྨྱུག། ༽