ཞལ་རས་ཟླ་བ་གོར་གོར།།
མཁུར་ཚོས་དྭངས་ཤ་རྒྱས་པའི།།
ཟླ་བའི་ལྷ་མོ་ཁྱོད་ཀྱི།།
འགྲམ་ཆང་བཏུང་ན་ཨེ་ཆོག།
ལང་ཚོའི་འཛུམ་རིས་མེ་ཏོག།
ཁྱོད་རང་ཕྱོགས་ལ་བཞད་དུས།།
ཞིམ་མངར་སྦྲང་རྩི་དྭངས་མ།།
ང་རང་འཐུང་ན་འདོད་བྱུང་།།
རེ་བའི་འདུན་པ་བཅིངས་ནས།།
ཡིད་སེམས་ཁྱོད་ལ་གཡེང་སྟེ།།
ལོ་ཟླའི་འཁོར་ཕྱོགས་མ་ཤེས།།
མི་ཚེའི་ཕྱེད་ཆ་རྫོགས་འདུག།
སེམས་པ་ཕར་ལ་ཕྱོགས་ནས།།
ལོ་ཟླ་བགྲང་བ་མ་ཐིག།
བྱམས་པའི་སེམས་ཀྱི་རྟ་ཁ།།
ད་དུང་ལོན་ས་མ་རེད།།
རྐང་ལམ་ཕྲ་མོ་ཞིག་ཏུ།།
ཐུག་པའི་ལས་འཕྲོ་ཡོད་ཀྱང་།།
མི་ཚེའི་གོམ་ཁ་རྒྱག་སར།།
ཅི་ཞིག་ཕྲད་པ་མིན་ནམ།།
ལྷ་ཡིས་བཀའ་ཆད་ཕོག་པའི།།
ཁྱོད་དང་འུ་གཉིས་ལས་འཕྲོ།།
དང་པོ་མ་ཕྲད་ཆོག་ཀྱང་།།
སེམས་སྐྱོ་དགོས་དོན་མི་འདུག།
བརྩེ་སེམས་འོ་ཆང་དཀར་མོ།།
འཐུངས་ནས་དྲན་པ་བཟི་དུས།།
འཇིག་རྟེན་ལས་ཀྱི་བརྩེ་བ།།
ད་གཟོད་མེད་པ་ཅི་ཞིག།
བརྩེ་སེམས་ཁྱོད་ལ་མེད་ན།།
འཛུམ་དཀར་སེམས་ཀྱི་མེ་ཏོག།
དང་པོ་མ་དགོད་ཆོག་ཀྱང་།།
སེམས་པ་ཁྱེར་དོན་མི་འདུག།
ལང་ཚོའི་མེ་ཏོག་ལྡུམ་ར།།
གཤིས་ཀ་ལྷ་དང་འགྲན་པའི།།
ན་ཆུང་འདོད་ཉམས་ཅན་ལ།།
སེམས་པ་རྐུ་རུ་ཤོར་སོང་།།
༼ བོད་སྨྱུག། ༽