ཆ་མེད་ཡུལ་གྲུ་ཞིག་ནས་གང་གི་ཕྱོགས་སུ།།

ཆས་ཀྱང་རང་དང་འཚམ་པའི་ཡུལ་ལ་ལོག་འདོད།།

ཅི་ནས་འཕུར་རྩལ་ངོམ་པའི་གཤོག་ཟུང་ཐོགས་ན།།

འཇིག་རྟེན་སྣང་བའི་ཁམས་ལ་ལྡིར་སྐོར་རྒྱག་འགྲོ།།

ཁྱོད་ཀྱི་གཟུགས་བྱད་མིག་གི་མཐིལ་དུ་བབས་ཏེ།།

ཁྱོད་ཀྱི་ཞལ་རས་སེམས་པའི་དཀྱིལ་དུ་བསྒོམས་ནས།།

འདི་སྣང་སྲིད་པའི་འདམ་ནས་དུས་ཀྱིས་ཁྱད་མེད།།

རྟག་པར་བརྩེ་འཕྲིན་སྤྲིངས་ནས་སྣང་བ་སྐྱིད་སོང་།།

ངག་རིག་དབྱངས་རྟས་འདྲེན་པའི་གསུང་སྐད་སྙན་པ།།

མདངས་ཀྱི་མེ་ཏོག་འཛུམ་པའི་འཇོ་སྒེག་ལྡན་པ།།

དྭངས་པའི་ནམ་མཁའ་འདི་ཡི་མཚམས་སྤྲིན་ཀློང་དུ།།

ཡལ་དུ་མེད་པའི་ལྷ་དེ་ཁྱོད་རང་ཡིན་ཆོག །

གངས་ཀྱི་གཟི་འོད་བཀྲ་བའི་འཇིག་རྟེན་ཞིག་ཏུ།།

སྤང་ཐང་དཀར་དམར་བཞད་པའི་གདན་གྱི་སྟེང་ནས།།

ལས་ཀྱི་སྨོན་ལམ་རེ་ལ་འདུན་པ་གཏད་ནས།།

ངག་རིག་འཕྲེད་གླིང་འབུད་པའི་ཕལ་བ་ཞིག་གོ།།

སྙིང་སྡུག་སེམས་ལ་ཉར་བས་བདག་བློ་སྐྱིད་ཅིང་།།

མཛའ་མཐུན་ལག་རྡང་སྦྲེལ་བས་དམ་བཅའ་བརྟན་པའི།།

བཅོ་ལྔའི་ཟླ་བ་འཛུམ་པའི་འོད་དཀར་གླེགས་ནས།།

འུ་གཉིས་བརྩེ་སེམས་གླེང་པའི་གཏམ་རྒྱུད་དྲན་སོང་།།

གཙང་པོའི་འགྲམ་ནས་རྒྱུག་ལ་རི་རྩེར་ཆས་སོང་།།

ཁྱིམ་གྱི་ཕུགས་པར་ལྟ་ཞིང་རྩྭ་ཐང་སྙེག་གིན།།

སྙན་ངག་དབྱངས་རྟ་སྒྲོག་བཞིན་ཁྱོད་ཉིད་ཁོ་ནར།།

དུང་བའི་སེམས་འཕྲིན་བྲིས་པ་འཛད་རྒྱུ་མ་བྱུང་།།

སྣང་བ་ལིང་ལིང་གཡོ་བའི་ས་གནམ་བར་ནས།།

མཐུར་མེད་རང་དབང་ཐོགས་པའི་ཅང་ཤེས་རྟ་ཕོ།།

ཉིན་སྲིབ་བར་མེད་གང་དང་གང་ཞིག་བརྒལ་ཡང་།།

ཡིད་ཀྱི་ཁམས་ལ་སྐྱིད་པའི་འཇིག་རྟེན་ཚེས་འདྲ།།

ནང་གི་དགའ་སྐྱོའི་ཚོར་འདུ་དབྱངས་ལ་འདྲེན་ནས།།

དཀར་པོ་ཤོག་གི་ངོས་སུ་གཟུགས་རིས་ཕབ་ན།།

མ་འོངས་རིགས་ཀྱི་རྒྱུན་འཛིན་བྱིས་པ་ཚོགས་ཀྱིས།།

དགའ་སྤྲོ་དགྱེས་པའི་ངང་ནས་ལན་ཅིག་བཞེས་གནོངས།།

མི་རྟག་འཁོར་བའི་བྱིང་ནས་རྣམ་རྟོག་ཕྲ་མོ།།

ཡུལ་ཕྱོགས་གང་དུ་མ་ལོག་སུ་ལ་འཁྲེང་ཡོད།།

ཁྱོད་ཀྱི་ཚལ་དུ་ཕེབས་པའི་ལས་སྐལ་བྱུང་ན།།

དལ་འབྱོར་མི་ལུས་ཐོབ་པར་རིན་ཐང་ཆེ་ཨང་།།

༼ ཁམས་ཟླ་སྲས། ༽