རྒྱ་ནག་ཡུལ་གྱི་ཇ་ལོར།།
ཡན་ལག་བརྒྱད་ལྡན་ཆུ་དགོས།།
ཇ་རྟ་ཡར་འགྲོ་ཞིག་ལ།།
ཇ་ལོ་བག་གཅིག་བསྐུར་ཡོད།།
ཡིད་སེམས་ཤོར་སའི་སྒྲོལ་མ།།
ལས་དང་བསོད་ནམས་ཡོད་ན།།
གདན་ཐོག་རི་ནས་སྒུགས་དང་།།
དར་རྩེ་མདོ་ལ་འཛོམ་ཆོག།
གཡང་དཀར་བལ་གྱི་ཁ་བཏགས།།
བཀྲ་ཤིས་རྟེན་འབྲེལ་དགུ་འཛོམས།།
ཚོང་དཔོན་མར་འགྲོ་ཞིག་ལ།།
ཁ་བཏགས་དཀར་པོ་བསྐུར་ཡོད།།
རྨི་ལམ་ནང་གི་བྱམས་པ།།
སེམས་ལ་འགྱུར་བ་མེད་ན།།
མདོ་ཆུ་བརྒྱུད་ནས་ཤོག་དང་།།
དར་རྩེ་མདོ་ནས་བསྒུགས་ཡོད།།
ཁྱེད་དང་ང་ཡི་བརྩེ་བ།།
ཆུ་དང་འོ་མ་བསྲེས་འདྲ།།
གངས་དཀར་རི་བོའི་འདབས་ནས།།
སྨོན་ལམ་བཟང་པོ་བཏབ་ཡོད།།
སེམས་མཐུན་ཆུང་འདྲིས་ངེད་གཉིས།།
ལས་ལ་བར་ཆད་མེད་ན།།
མཛའ་གཞས་རིང་མོའི་ཁྲོད་ནས།།
དར་རྩེ་མདོ་ནས་འཛོམ་དགོས།
༼ ཤེས་རབ་བཟང་པོ། ༽