ལོ་ཚོད་ཇེ་རྒས་སོང་ཡང་།།
བརྩེ་སེམས་རྒ་རྒྱུ་མི་འདུག།
མེ་ཏོག་སེར་བས་བཅོམ་ཡང་།།
ལོ་རྗེས་སྔར་ལྟར་སྐྱེ་ཡོང་།།
ཁྱོད་རང་གཞན་དང་འགྲོགས་དུས།།
ངའི་སྙིང་དམར་པོའི་ངོས་ལ།།
རྨ་ཁ་བཏོད་པ་བྱས་སོང་།།
རྨ་ཁ་དྲག་ས་མ་རེད།།
ལྷ་སའི་ཇོ་བོ་མདུན་ནས།།
སྨོན་འདུན་ལན་གསུམ་ཞུས་ཀྱང་།།
ཁྱོད་ཀྱི་ཡིད་སེམས་དམར་པོ།།
ང་ལ་འཁོར་ཐབས་མི་འདུག།
མདུན་ནས་རི་བོས་གཡོགས་ཀྱང་།།
ཕ་མས་བཀའ་ཚིག་གནང་ཡང་།།
ཁྱོད་ཀྱི་གྲོང་སྡེའི་གཞུང་ན།།
སྔར་བཞིན་འབྱོན་བ་བྱ་ཡོང་།།
བྱམས་པའི་ཐུགས་དང་མཐུན་ན།།
ལས་ཀྱིས་བསྐོས་ཐང་ཞིག་གིས།།
ཉིན་མཚན་འཁོར་མོའི་བར་ནས།།
ཐུག་པའི་ལས་སྐལ་ལོས་ཡོད།།
དུས་ཚོད་ཡུན་ནས་འདས་ཀྱང་།།
བརྩེ་སེམས་ཡལ་ཐབས་མ་བྱུང་།།
བྱམས་པའི་ཞལ་རས་དྭངས་མོ།།
སྔར་བཞིན་མིག་ཏུ་འཁོར་བྱུང་།།
སྙིང་སྡུག་བུ་མོ་དྲན་བཞིན།།
ཕན་ཚུན་འཕྲད་པ་བྱུང་ན།།
ཚེ་འདི་འགྱོད་མེད་ངང་ནས།།
ཁྱོད་ལ་བྲན་དུ་འཁོར་ཆོག།
ན་ཆུང་བརྩེ་བའི་སེམས་ལ།།
སྙི་ཁ་ཅུང་ཟད་ལྡན་ཡང་།།
ཁྱོད་དང་འུ་གཉིས་བརྩེ་བ།།
སྙི་མོ་ཡོང་ཐབས་མི་འདུག།
དུང་བའི་སྙིང་གི་ཕྱེད་ཀས།།
ལན་གཅིག་སྐྱོ་བ་མ་གནང་།།
ནམ་མཁའི་ལྷ་ཡི་འོག་ནས།།
ཏག་ཏག་འཕྲད་པ་གནང་ཡོང་།།
ཚེ་ཚད་མཉམ་དུ་རྫོགས་མེད།།
སྙིང་གཏམ་བཤད་འཕྲོ་ལུས་ཡོད།།
ཉི་ཟླ་འཁོར་ཕྱོགས་ཤིག་ནས།།
སླར་ཡང་ཐུག་འཕྲད་སྨོན་ཡོད།།
ཤ་འདྲིས་སྙིང་གི་བྱམས་པར།།
ལས་འཕྲོ་རྫོགས་པ་མེད་ན།།
སྐྱེ་བ་ཕྱི་མའི་མདོ་ནས།།
འུ་གཉིས་སླར་ཡང་འཛོམ་ཆོག།
༼ སྙན་རྐང་གླིང་། ༽