ན་ཆུང་བྱིས་དུས་རྩེ་ར་གཅིག་གི་ནང་།།

འདང་བརྩེ་པང་གང་བཟུང་ནས་ནར་སོན་ཞིང་།།

འདུན་མའི་རེ་འདུན་ཁྱོད་ཀྱི་གམ་དུ་བསྙལ།།

ཚེ་གཅིག་ལུས་ཀྱི་སེམས་རྟེན་ཉིད་དུ་བྱས།།

དར་མའི་ལང་ཚོའི་འཇའ་སྤྲིན་འཁྱུད་པའི་དྲུང་།།

བར་ཐག་རི་ཆུས་བཅད་ཀྱང་དུང་ཞེན་གྱིས།།

འཁང་ཞིང་ཁ་ཆད་བྱེད་པའི་ལབ་ཙེའི་རྩེར།།

དར་ལྕོག་དཀར་དམར་གཡབ་པའི་རི་སྒང་ན།།

སྙིང་གཏམ་ཤུབ་ཤུབ་བཤད་པའི་གཞོན་ཟུང་ཉིད།།

མཇུག་མཐའི་རེ་བ་ཉག་གཅིག་ཡིད་མཁའ་རུ།།

བཟུང་ཞིང་ངག་འཇམ་ཚིག་ལ་བརྒྱུས་པ་ཡི།།

རྒྱང་རིང་ལྷིང་འཇགས་འཚོ་བའི་ཡུལ་ངོས་ནས།།

མཉམ་འཛོམས་ཚེ་གཅིག་སྐྱ་ཡའི་འདུན་མ་ལས།།

དམིགས་ཡུལ་མེད་ཀྱང་ལས་ཀྱི་བདས་པ་ཡིས།།

མི་སྡོད་གཞན་ཡུལ་འགྲིམ་པའི་ཞག་འགའ་དྲུང་།།

སྐྱིད་སྣང་སེམས་སུ་ཚོར་བའི་འདོད་གདུང་གི།

དྲོད་ཁོལ་སྙིང་ལ་སིམ་པའི་ཡིད་འཕྲོག་མ།།

རྒྱུ་འབྱོར་དཔོན་ཐོབ་དམིགས་པའི་འདོད་རྔམ་གྱི།།

མི་འདོད་གནས་ཡུལ་སྦྱིན་པའི་མ་ལོའི་བཀའ།།

བཟློག་མེད་ལས་ཀྱིས་བསྐོས་པའི་ཁ་ཡིག་གྱུར།།

ཉིན་མཚན་དབྱེར་མེད་གྲོགས་ཀྱི་མཐར་ཐུག་དེར།།

སྒུག་པའི་མིག་ཆུ་ཕྱིར་དྲན་ཐང་ལ་གཏོར།།

དྲན་པའི་གདུང་བ་སྙིང་རྩ་འཕར་ལ་བཅང་།།

སྐྱོ་སྡུག་ཁྲོད་ཀྱི་མཛེས་པའི་ཞལ་སྒོ་འདིས།།

སྲོལ་ངན་རྒྱུན་གྱི་དེ་ཉིད་མངོན་དུ་བྱས།།

མཛེས་ལྡན་རྩྭ་ཐང་གསེར་མོའི་པང་ཁུག་ལ།།

བག་ཕེབས་དང་པོ་གྲོགས་ཀྱི་འདང་བརྩེ་ཉིད།།

སེམས་ལ་སྒོམ་པའི་སྒེག་ལྡན་བྱམས་པའི་ཞལ།།

མ་མཇལ་ཞག་འགའི་སྣང་བ་ལོ་ཟླ་ཉིད།།

ཐུག་འཕྲད་དར་ལྕོག་ཟད་པའི་འགྲམ་ནས་བསླངས།།

ཤ་རུས་གསེབ་ལ་ཐིམ་པའི་དགའ་མ་དེ།།

མི་འདོད་གནས་ཡུལ་སྦྱིན་པའི་མིག་ཆུའི་རྒྱུན།།

ཁྲེལ་ལྡན་གཞུང་བཟང་བུ་ཡི་མདུན་ས་རུ།།

བརྩེ་བའི་ཚིག་ཕྲེང་ངག་ལ་བརྒྱུས་པའི་ཚེ།།

གཞན་ཡུལ་འགྲིམ་པའི་ཞེ་ཐག་ཁོང་ནས་བཅད།།

ཡིན་ཡང་ཤ་ཁྲག་ཟུངས་ལྡན་གདོས་བཅས་ལུས།།

བསྐྱེད་ཅིང་རང་ལུས་ཕངས་མེད་བུ་ཡི་ཆེད།།

གཏོང་བའི་མ་རྒན་གྲུ་བཞིའི་ཁང་ཕུག་ནས།།

འདོར་བ་ཡིད་ལ་འཁོར་ཚེ་བུ་ཡི་སེམས།།

གྲང་ངར་སད་ཀྱིས་བཅོམ་པའི་གདུང་བས་མནར།།

བློ་ཁོག་རི་དང་རྒྱ་མཚོ་གཏིང་ཟབ་པའི།།

མ་ཡིས་གནང་བའི་ཁ་ཡིག་ལམ་ཆེན་འདིས།།

གཞོན་ཆུང་སེམས་ཀྱི་རེ་བའི་དྭངས་མ་རུ།།

རམ་འདེགས་ཚད་ཀྱི་བརྗོད་ཐབས་བྲལ་བར་བྱས།།

སྐྲ་བདག་ཅན་གྱི་དགའ་མ་མཐིང་སྨུག་སྦྲའི།།

འགྲམ་ནས་འགྲེངས་ཏེ་རང་སྡེར་ཕྱུག་མོ་ཡི།།

ཕྱོགས་སུ་ལྟ་ཞིང་རོགས་ཀྱིས་བསྐུལ་བའི་ཚིག།

སྒྲ་འཛིན་བུ་གའི་གསེབ་ཏུ་འཕོས་པའི་དུས།།

བརྗོད་བྲལ་བདེ་བའི་མཆོག་ཉིད་ཐོབ་པ་མངོན།།

འདོ་རིགས་རྟ་ཕོའི་གོམ་པའི་མྱུར་འགྲོས་ཀྱི།།

རི་ཆུ་སྟོང་ཕྲག་བརྒལ་བའི་ཕར་ནང་ནས།།

ཡིད་མཐུན་སེམས་རྟེན་རེ་བའི་འདུན་ས་རུ།།

བསུ་བའི་དམིགས་ཡུལ་མ་ཡིས་འགྲུབ་པར་བྱས།།

མི་ལོ་གསུམ་བཞིར་མཐར་གྱིས་སླར་མཇལ་འདི།།

ཨ་མ་རྒན་མོའི་སྙིང་གི་དྲོད་ལ་སིམ།།

ལྷ་བསང་མཆོད་ཕྲེང་རྒྱུས་པའི་ལས་ཚིགས་འདིས།།

བུ་ཡི་ལས་ལམ་བར་ཆད་བཟློག་པར་མཛོད།།

༼ སྒང་ཁྱུང་སྐྱེས། ༽