ལྷ་སའི་གླིང་ལ་ཆས་པས།།
རི་བོ་གྲུ་འཛིན་ཞོལ་ནས།།
རིག་འཛིན་ཚངས་དབྱངས་རྒྱ་མཚོའི།།
ལྷ་ཁང་གྲུབ་བཞི་མཇལ་སོང་།།
དྲན་པ་ཆུ་ཡི་ཆུ་རེད།།
གླུ་འདི་ཚངས་དབྱངས་མགུར་རེད།།
དབུས་ཀྱི་ལྕགས་པོ་རི་ཡང་།།
ཨ་ཇོ་དྲན་པའི་རྟེན་རེད།།
གཡུ་ཐོག་ཟམ་པའི་ཚུར་ཤོད།།
མེ་ཏོག་ལྡུམ་རའི་ཁ་གཏད།།
གཅིག་པུ་ཡུན་རིང་འགྲེངས་ཏེ།།
ཚངས་རྒྱལ་ཞེ་རུ་བྲིས་ཡོད།།
ཤར་རིའི་རྩེ་ཡི་རྟ་བདུན།།
མ་སྐྱེས་ཨ་མའི་ཁང་བཟང་།།
དེ་དང་དེ་གཉིས་བར་ན།།
གསེར་འོད་ལམ་ལམ་འཕྲོ་འདུག།
ཨ་ཇོ་འདི་རུ་ཕེབས་ནས།།
མི་ལོ་དུ་མ་ཟིན་ཀྱང་།།
དཀར་ཡོལ་འབྲུག་མའི་ནང་གི།
གསོལ་ཇ་ད་དུང་མ་གྲང་།།
བར་སྐོར་ལམ་གྱི་དད་ལྡན།།
དད་པས་མྱོང་སྟངས་མི་འདྲ།།
བྲང་ལ་བསྣོལབའི་ཕྱག་ཟུང་།།
ཨ་ཇོའི་སེམས་ཉིད་འདྲ་ལེ།།
ཉི་མའི་གྲོང་གི་བརྩེ་མགུར།།
ལི་ཐང་བར་གྱི་རྐང་རྗེས།།
སེམས་ཀྱི་ངོས་སུ་བྲིས་ན།།
ཨ་ཇོའི་རྣམ་ཐར་དྲན་ཡོང་།།
ལྷ་ལྡན་གཙུག་ལག་ཁང་སོགས།།
སྤྱན་གྱིས་གཟིགས་ཕྱོགས་མང་བས།།
ང་དང་ཚངས་མགུར་བར་ནས།།
ཨ་ཇོའི་ལས་དབང་རྙེད་འདྲ།།
བརྩེ་མགུར་ནང་གི་ལྷ་མོ།།
འཕྱོངས་རྒྱས་སྒྲོལ་མ་ཨེ་རེད།།
དབྱངས་ཀྱི་སོར་མོའི་བར་ནས།།
སྒྱུ་མའི་ཟློས་གར་མཐོང་སོང་།།
སྟོན་མཇུག་སྡོང་པོ་བགྲེས་དུས།།
ཁུ་བྱུག་མོན་ཡུལ་འཕུར་འགྲོ།།
དེ་དུས་ཚངས་སྲས་འཁྱམ་པོས།།
རང་ཡུལ་དྲན་ནས་སྨྲེང་སྐད།།
ཀྱེ་ཀྱེ་དབྱངས་ཅན་ལྷ་མོས།།
མངལ་ནས་སྐྱེས་པ་འདྲ་བའི།།
ས་མཐའི་ཚངས་དབྱངས་རྒྱ་མཚོ།།
བར་སྐོར་ལམ་ནས་དྲན་བྱུང་།།
ཨ་ཇོ་དྲན་པའི་གདུང་བ།།
བཅོས་རྒྱུ་མེད་པའི་ནད་རེད།།
མི་ཚོགས་བཤར་བའི་སྲང་ལམ།།
ཇོ་ཇོ་ཕེབས་སའི་གནས་རེད།།
༼ འོད་འཛིན་མ། ༽