སེམས་སྐྱོ་བའི་ངང་ཚུལ་སེམས་སུ་མ་ཤོང་བ།།
ཕྱི་ཡུལ་གྲུ་དེ་རུ་ཚོར་བའི་འདུན་མ་ཆགས།།
ལས་བཀོད་པ་གཅིག་གི་དབུ་ཁྱུད་བྲིས་པ་ནི།།
ནང་སྣང་བ་འགུལ་བའི་འདུ་ཤེས་ཡིད་སྲིད་དོ།།
ཡིད་སྐྱོ་ཤས་འདྲེན་པའི་ལོ་ཟླའི་སྣང་ཚུལ་འདི།།
ཡིད་བཅོས་མིན་ལམ་ནས་འཚོ་བའི་རྨི་ལམ་རྨིས།།
ཡིད་དགའ་ལ་སྐྱོ་བ་སྣང་ཞིང་སྲིད་པའི་ཁྲོད།།
ཡིད་སྐད་ཅིག་ལམ་ནས་གྱུར་དང་འགྱུར་ལ་བྲེལ།།
ཚིག་འཁྲུལ་བ་ཡོད་ཚད་བརྗོད་པས་སྟོང་ཞིང་བྲལ།།
དོན་སྙིང་པོའི་ཀློང་དུ་རྣམ་རྟོག་འཚང་ཁ་གཤིབ།།
ཞེ་ལྷོད་ལ་ཕབ་པའི་ཉིན་མཚན་གཉིས་ཀའི་གསེང་།།
ཞེ་སྣང་བའི་མཐའ་རུ་ཚོར་འདུ་རང་འཁྱིལ་བྱུང་།།
ཡེ་སྤྲོས་ཚོགས་བྲལ་ནས་འདུ་ཤེས་གཏིང་རིང་བ།།
གཟོད་སྣང་བའི་ངོ་བོ་ཞི་ལྷོད་འགྲོས་དང་མཐུན།།
དུས་གློ་བུར་ཞིག་དང་མཇལ་ནས་འཕྲད་པ་ལས།།
བདག་ལེགས་སུ་འདོད་ཀྱང་འདོད་པ་ཤིན་ཏུ་དཀའ།།
ཉམས་ཅི་འདྲ་མཛེས་ཤིང་བདེ་བའི་སྤྲོ་གར་ལས།།
ལོ་ཟླ་བའི་གསེང་ནས་འཚོ་བའི་ལན་ཆགས་ཐོགས།།
ཞེ་གཏིང་རིམ་ཀློང་དུ་ཚོར་བའི་རླབས་འཁྱིལ་ཏེ།།
ལས་དམར་རྗེན་དེ་ཡང་སྙིང་པོའི་དོན་དུ་སྒོམ།།
ཚིག་སྤྲོས་པ་ཇི་སྙེད་ལས་རླུང་དབར་དུ་འཚང་།།
ཡུལ་ཆ་མེད་རྒྱུས་མེད་སེམས་སུ་འབྲེལ་བྲལ་བ།།
སྐྱོ་སྨྲེང་བ་ཁུར་བའི་ལས་མཐུན་ཟླ་བ་ཡང་།།
མཚན་མུན་པའི་གཞུང་དུ་མག་མོག་ངང་དུ་རྒྱུད།།
དུས་འགྱུར་བའི་ལམ་དུ་སྣང་བར་རང་ཚུགས་ཟད།།
མཐའ་མེད་པའི་སྲིད་པ་སྒྱུ་མའི་འགྲོས་དང་ཉེ།།
ངག་རིང་མོས་གླེང་ཡང་མཐའ་དང་གཏིང་མེད་པ།།
ཞེ་ཚོར་བའི་འདུ་འབྲལ་གློ་རྡེག་དུས་ཀྱིས་མྱོང་།།
རྒྱང་ཁ་ཐག་རིང་ཐུང་སེམས་དང་སེམས་པ་ཡིན།།
སེམས་དམ་ཚིག་ལྷོད་ན་གང་ཡོད་སྐྱིད་ཀྱིས་སྟོང་།།
སྐྱིད་སྣང་བ་ཡོད་མེད་སྔོན་མའི་ལས་དབང་སྙམ།།
ལས་སྟངས་སྟབས་ཁྲོད་དུ་འཚོ་བའི་ན་ཚོད་རྫོགས།།
༼ ཁམས་འོད་གསལ། ༽