ངེད་གཉིས་སོང་སའི་ཟ་ཁང་སྤོས་མི་འདུག།
ཉི་མས་འཚིག་པའི་སྒོ་བྱང་བརྗེས་མི་འདུག།
དེ་དུས་རྟེན་འབྲེལ་ཡག་སོང་སྙམ་པའི་མིང་།།
"ཚེ་རིང་འཕེལ་རྒྱས"མིག་སྐྱ་ལོག་ལོག་ཏུ།།
རང་གི་རོགས་པ་ག་པར་ཡོད་དམ་ཞེས།།
ཉེས་ཅན་བཞིན་དུ་བདག་ལ་འདྲི་རྩད་བྱེད།།
དམ་བཅའ་འདུས་བྱས་ཡིན་པས་ཤོར་སོང་ཟེར།།
ཁོ་བོས་ཁ་གཡར་བཙལ་ཅིང་འགན་གཡུགས་ཏེ།།
ནོར་འཁྲུལ་འགེབས་སྲུང་བྱའམ་ཡང་ན་ནི།།
སྐུ་མཁྱེན་བདག་གིས་ཉེས་སོང་གོ་སྐབས་གཅིག །
གནོངས་དང་རྗེས་སུ་གཅེས་སྤྲས་ལྡབ་འགྱུར་གྱིས།།
བརྩེ་དགའ་ཆེན་པོར་འགྲོགས་ཞེས་མནའ་སྐྱེལ་ལམ།།
འོན་ཀྱང་ཡིད་འོང་ལོ་ཟླ་ལྟག་འགྲོས་མེད།།
མདོག་ཉེས་དུས་ཚོད་འབུད་རྒྱག་འགྲོ་ས་མེད།།
ཡོད་ཚད་ཐལ་རྡུལ་བཞིན་དུ་ཡལ་ཚར་བས།།
ཡང་བསྐྱར་སྔོག་པའི་དགོས་པ་ཆུང་ན་ཡང་།།
མཐར་ཕྱིན་དུས་ཚོད་དྲུག་པའི་དུས་ཁུག་འདིར།།
དྲན་གདུང་རླབས་རྩེར་འཁྱུག་ཙམ་འཁྱུག་ཙམ་བྱེད།།
ལོ་དེའི་དཔྱིད་ཀ་སློབ་གླིང་ནང་གི་ཁྱོད།།
ཡི་གེས་ཐང་ཆད་རྒྱུགས་ལ་ཞེད་ནས་ཡོད།།
ལོ་དེའི་དཔྱིད་ཟླར་བརྩེ་སྒྲུང་དབུ་ཁྱུད་བྲིས།།
ལོ་དེའི་དཔྱིད་ཀར་རེ་སྨོན་མེ་ཏོག་འཛུམ།།
དགའ་སྐྱོའི་ཚོར་བ་འཕྲིན་སྐྱེལ་ཕོ་ཉར་བཅོལ།།
སྐད་འཕྲིན་སྒོ་མོ་ནངས་རེ་དགོང་རེ་བརྡུངས།།
མཛའ་དུང་སྲིང་བའི་གོ་རིམ་ཡིན་ཁུལ་གྱིས།།
གཏམ་གྱི་བུ་རམ་ཚིམ་པའི་ཚོད་དུ་སྟེར།།
བློ་དཀར་གཞུང་དྲང་ཡིན་པའི་ཟོལ་ཡང་བསྟན།།
ཐོག་མའི་ལྷན་འཛོམས་མུན་པའི་ངོགས་ནས་བྱུང་།།
སྟོད་ཐུང་དཀར་པོ་མངགས་བཟོ་གྱོན་ནས་ཡོད།།
ཞལ་ངོ་ཚོས་ཀྱིས་ཅུང་ཙམ་བཅོས་འདུག་སྙམ།།
ངོ་ཚ་ཆེ་བས་ཚུར་སྤྱལ་མི་ལྟ་ཞིང་།།
གང་འགྲོའི་དྲིས་ལན་ཁྱད་མེད་ཙམ་དུ་ཟད།།
དེ་ནས་མཉམ་པོར་ཟ་ཁང་འགྲོ་རྒྱུ་བྱས།།
ལམ་ཟུར་ཐོག་ཁའི་ཆ་མེད་ཟ་ཁང་ཕྱིན།།
ཞིམ་པའི་བཟའ་བཏུང་མཐུན་པའི་གཏམ་གླེང་རྗེས།།
ཕྱི་རོལ་ཡུལ་ནས་ཕྱི་མིག་ཐག་སྣེ་རུ།།
སྒོ་བྱང་ཡིག་ཆེན་ཚེ་རིང་འཕེལ་རྒྱས་ཐོགས།།
གཏན་འདུན་ངེས་པའི་རྟེན་འབྲེལ་འགྲིག་སྙམ་དགའ།།
ཕྱི་ཉིན་ཁྱོད་རང་བར་སྐོར་བརྐྱངས་ཕྱག་བྲེལ།།
ངས་ནི་དུས་འགྱངས་སྐད་ལན་མ་ཡོང་ནས།།
སྒུག་མི་བཟོད་པའི་བྲེལ་འཚུབ་སེམས་པ་ཡིས།།
བསྐུལ་བའི་འཕྲིན་པ་ཡང་ཡང་བཏང་ནས་ནི།།
ཁྱོད་ལ་འཚུབ་ཆ་བསླངས་པ་དྲན་ནམ་ལགས།།
དེ་དུས་ཁྱོད་ལ་སྐད་ཆ་མང་པོ་མེད།།
སྙིང་གཏམ་ཡིན་ལ་སློབ་གསོ་འདྲ་བའི་ཚིག །
ང་ཡིས་མང་པོ་མང་པོ་བཤད་པ་ལ།།
སུན་སྣང་མེད་པའི་ཁྱོད་ཀྱིས་གཟབ་ཉན་བྱེད།།
མཚམས་མཚམས་ཧ་ཧ་གད་མོ་ལྷུག་ལྷུག་དགོད།།
དེ་འདྲའི་ངང་ལ་འདོད་འདུན་ཕོ་ཉ་མོས།།
བསྐུལ་བའི་སྙིང་གཏམ་དམར་པོ་བཙག་མདངས་ཅན།།
མངོན་སུམ་བྱུག་རེས་བྱས་ཤུལ་མེད་ནའང་།།
སྙིང་གི་ཤོག་ངོས་མཛའ་དུང་གཡུང་དྲུང་རིས།།
མ་བྲིས་རང་བྱོན་སྐུ་བཞིན་རྣམ་པར་བཀྲ།།
དེ་ལྟར་འཆམ་མཐུན་ཞི་བདེའི་འཚོ་བ་ཡི།།
བདེ་སྐྱིད་བདོ་བའི་ལོ་ཟླ་མང་ཙམ་བསྐྱལ།།
ཡིན་ཡང་སྐྱིད་སྡུག་རྒྱབ་ཏུ་ཁུར་རེས་ཀྱིས།།
མི་ཚེའི་ལ་ལུང་བརྒལ་ལ་ལས་བསོད་ཀྱི།།
རྒྱ་གྲངས་མ་ལོངས་བར་ཆད་བཙན་པོ་ཡི།།
དབང་སོང་མཛའ་བརྩེའི་ཆུ་རྒྱུན་སྐྱོང་སྐལ་ཆད།།
གྱེས་བྲལ་བདེ་མོ་བཞག་ནས་ལོ་ཡང་འཁོར།།
ཕན་ཚུན་བརྡ་རྟགས་ཆད་ནས་དེ་ཙམ་འགོར།།
ཨང་གྲངས་བློ་ལ་ཡོད་ཀྱང་སྟོང་པ་རེད།།
དྲན་གདུང་ཆུ་ལྟར་ཁོལ་ཀྱང་ཅི་ཞིག་བྱ།།
དེ་རིང་གློ་བུར་འདི་ལྟར་དྲན་པ་ལ།།
ཨང་གྲངས་བློ་ལ་ཡོད་ཀྱང་མནན་སྤོབས་བྲལ།།
སྐད་འཕྲིན་མཐོང་སར་ཡོད་ན་དགའ་བ་ལ།།
གྲོགས་ཚོམས་ནང་ལ་འཆམ་འཆམ་འཁྱུག་ཙམ་གྱིས།།
འཁོར་བ་བསྐྱངས་མིན་རྩད་ཆོད་ཁ་གསལ་ཡོང་།།
དྲན་གདུང་མོ་ལ་ཞུས་ན་སྟབས་ཀྱང་བདེ།།
དྲན་གདུང་ནམ་མཁར་སྤུར་བར་རླུང་ཆུང་གི།།
དྲན་གདུང་གྲུ་ལ་བསྐུར་ན་ཆུ་དལ་གི།།
དྲན་གདུང་ཆང་ལ་བཅོལ་ན་ས་ག་ཟླར།།
ལས་ཀྱི་ལྡུམ་རར་སྡིག་པའི་མྱུ་གུ་འབུས།།
ཉེས་མེད་ཁྱོད་ཀྱང་ཐག་ཞོར་འབྲེང་འདྲུད་བྱེད།།
དྲན་གདུང་ཡིག་འབྲུར་བརྒྱུས་ཀྱང་མཐོང་དཀའ་བས།།
ཉིད་ཀྱིས་ཐོས་བསམ་གྲུ་ཆུང་གཏང་སའི་གནས།།
སློབ་ཆེན་རིག་པའི་གླིང་གར་ལྒང་རྩེད་དང་།།
ཕྱི་དྲན་མེ་ཏོག་སྒྲུག་པར་ལན་གཅིག་ཆས།།
དེས་ཀྱང་ཨེན་ཙམ་ཕན་པའི་སྣང་བ་སྐྱེས།།
སྔར་བཞིན་བདེ་ལེགས་ཡིན་ནམ་ལུས་ཕྲ་མ།།
སློབ་མས་ཁ་ལ་ཉན་ནམ་མཁྱེན་ལྡན་མ།།
ལུས་ངལ་སེམས་ཚེགས་ཆེའམ་ཧུར་བརྩོན་མ།།
འཚོ་བར་སྤྲོ་སྣང་མོད་དམ་འཛུམ་ཆུང་མ།།
ལོ་ཟླས་གཉེར་རིས་བྲིས་སམ་བབ་ཆགས་མ།།
འཁོར་བས་སྡུག་པོ་བཏང་ངམ་གཞུང་དྲང་མ།།
༼ ལུག་རྫི། ༽