ཀ་མད་སུམ་ཅུ་ངག་ན་ཟློ་བའི་བློ་གསལ་བུང་བའི་
ཁྱུ་ཚོགས་ཀྱེ།།
ཁ་བ་རུ་བའི་ཕུགས་རྒྱང་བསམ་ན་ལེ་ལོ་བདུད་ཀྱི་
བྲག་རི་གཏོར།།
ག་ལེར་རྩིང་སྤྱོད་སྙིགས་བཞིན་དོར་ཏེ་རང་ནུས་
ཅི་ལྕོགས་རྩལ་སྤྲུག་སྒོས།།
ང་ཅག་རིག་གཞུང་འོ་མཚོ་གཞིབ་ལ་བརྩོན་པའི་
གོ་ཆ་ཁུར་ཏུ་བཞེས།།
ཅ་ཅོའི་འདུ་འཛི་གྲོགས་སུ་བསྟེན་ན་རྣོ་དབལ་རིག་པའི་
སོ་ཁ་ཉམས།།
ཆ་རྐྱེན་འཛོམས་པའི་གོ་སྐབས་བོར་ན་
ཤེས་ཡོན་བདུད་རྩི་ཐོབ་པ་དཀའ།།
ཇ་ཆང་གོས་བཟང་དྲོད་འཇམ་ལྡན་ཡང་བརྩོན་པའི་
འཁོར་ལོ་མ་བསྒྱུར་ན།།
ཉ་རྒྱས་ཟླ་ལྟར་གོང་མཐོར་སྙེག་པའི་ལང་ཚོའི་
གཟི་མདངས་བག་ལ་ཞ།།
ཏ་ལའི་འདབ་ལྟར་ཤེས་བྱ་ཀུན་ལ་
བློ་གདེང་རྙེད་པའི་དམིགས་སོ་བྲལ།།
ཐ་ཆད་ངན་པའི་ར་རིའི་གོམས་གཤིས་
མི་གཙང་སྙིགས་བཞིན་རབ་དོར་ཏེ།།
ད་ལྟའི་སྔོན་ཐོན་སློབ་གསོའི་ལོ་ཏོག་བཙས་མ་རྔ་
ལྟར་འདུར་རྒྱུག་རེམ།།
ན་ཚོད་ཕྲ་བའི་དུས་ཀྱི་ལང་ཚོ་གསེར་ལས་དཀོན་པར་
ངོས་ཟིན་ཏེ།།
པ་ཕའི་བུ་ལོར་རྒྱན་དུ་ངོམ་པའི་རིན་བྲལ་ཡོན་ཏན་
གཟུངས་གཞུག་གཙིགས།།
ཕ་མེས་སྲོལ་བཟང་སྲོག་ལྟར་སྐྱོང་བའི་
འགན་འཁྲིའི་འདུ་ཤེས་སྙིང་ལ་ཆོངས།།
བ་ཕྱུགས་ནང་བཞིན་དམིགས་པ་བྲལ་པའི་
རྨོངས་རྟུལ་ཆ་བྱད་རབ་སྤྱུགས་ཏེ།།
མ་ཕམ་མ་འཁུམ་བརྩོན་པའི་སྤོབས་སེམས་
ལྕགས་དབྱུག་བརྡར་བའི་ངང་ཚུལ་དང་།།
ཙ་རིའི་གནས་ལ་ཞབས་པད་བསྒྱུར་བའི་
ཞུམ་མེད་དཔའ་སྤོབས་གཟེངས་སུ་སྙོགས།།
ཚ་གྲང་ཁྱད་བསད་ཐོན་མིའི་དཀའ་སྡུག་དང་
དུ་ལེན་པའི་ནུས་མཐུ་དགོས།།
ཛ་དྲག་འགྲན་རྩོད་རླབས་ལྟར་འཕྱོ་བར་
མི་འཇིགས་སེང་གེའི་ཟིལ་རྔམ་མཁོ།།
ཝ་མོའི་གཡོ་སྒྱུའི་ཆ་བྱད་རྫོབ་པོ་རིགས་མཐུན་
ཡིན་ཡང་སྡང་སྲིད་པས།།
ཞྭ་ཡི་ཏོག་ལྟར་མཛེས་པའི་དཔལ་དུ་
མཛའ་མཐུན་ལག་རྡང་དམ་རྒྱུ་གཙོ།།
ཟ་འཐུང་འབའ་ཞིག་དོན་དུ་གཉེར་བའི་
ཐ་ཤལ་བྱོལ་སོང་སྤྱོད་ངན་དོར།།
འ་འུར་རྣམ་གཡེང་ལེ་ལོ་ཡོངས་སྤངས་བཟང་ངན་
སྤུ་རིས་རབ་ཕྱེ་སྟེ།།
ཡ་རབས་དམ་པའི་མིག་དཔེར་བསྟན་ཏེ་
ལུགས་དང་མཐུན་པའི་སྤྱོད་བཟང་གིས།།
ར་མ་ལུག་གི་མུན་པས་བསྒྲིབས་པའི་སྲོལ་ངན་
དར་ནག་ཡོངས་ཕྱིས་ཏེ།།
ལ་རྒྱ་ཁ་མིན་ལག་ལེན་དངོས་ལས་རང་སོའི་
འགན་འཁྲིར་འབད་ཙ་ན།།
ཤ་ཚ་ཆེ་བའི་རིགས་ཞེན་ཁོག་དཔུང་
མ་ཉམས་རང་མདངས་འོད་དུ་སྦྲུམ།།
ས་ཕྱོགས་ངེས་མེད་གང་དུ་འགྲིམས་ཀྱང་
ཁྱད་ཆོས་ནོར་བུ་ཆར་དུ་བསྙིལ།།
ཧ་ཅང་དྲང་བའི་གཏམ་གྱི་འཁོར་ལོ་རྦབ་རྡོའི་
ཚུལ་བཞིན་འདྲིལ་བ་ལ།།
ཨ་ནུ་གཞོན་པས་ཡིད་ངོར་འཆང་ན་
སྐྱོན་སེལ་སྨན་དུ་འགྱུར་བར་རེ།།
༼ སྟག་རིག་འབྲུག་ཐར། ༽