ཀ་བཞི་གདོང་མས་འདེགས་པའི་གཙུག་ལག་ཁང་ན།།

ཁ་མིན་སེམས་ནས་ཆོས་ལ་ངེས་ཤེས་མེད་པའི།།

ག་ཤེད་གཞན་ལ་འགྲིམ་པའི་སྣང་བརྙན་ཅན་པོ།།

ང་རང་གང་ལ་འགྲོ་བའི་དམིགས་ཡུལ་སུས་ཤེས།།

ཅ་ཅོ་ངག་ལ་སྐྱོར་བའི་འདུ་འཛིར་དུང་ཞིང་།།

ཆ་མེད་མི་དང་ཡུལ་ལ་ངོ་ཤེས་དགའ་བའི།།

ཇ་ལྗང་ལོ་མའི་བྲོ་འདྲའི་སིམ་པ་སྟེར་བའི།།

ཉ་བཞིན་གང་སར་བགྲོད་པའི་འཁྱུག་རྩལ་ནམ་རྒྱས།།

ཏྭ་རེ་སྟོད་ཀྱི་སྤྲིན་དཀར་མཁའ་ལ་རྒྱུ་འདྲའི།།

ཐ་མལ་སེམས་ཀྱི་རྣམ་རྟོག་ངེས་མེད་འཕྱོ་བ།

ད་ལྟ་འབྲས་མེད་ཕྱི་མིག་ལོ་ཟླའི་འགྱོད་གདུང།།

ན་ཚ་ལུས་ལ་མེད་ཀྱང་སེམས་ན་ལྗིད་པ།།

པ་ཏྲ་འདྲ་བའི་མི་ཚེ་ཀྱག་ཀྱོག་བསམ་ན།།

ཕ་རྒན་དབུ་སྐྲ་དཀར་པོའི་འདུན་མ་བརླགས་ནས།།

བ་ལང་སྤྱོད་པའི་འདུ་ཤེས་གསུམ་པ་བཅས་པས།།

མ་རྒན་སེམས་ཀྱི་རེ་འདུན་ཅང་མེད་གྱུར་སོང་།།

ཙ་གེ་ཙིག་གེའི་ལས་ཀྱི་མཐའ་ལ་ཞེན་ནས།།

ཚ་གྲང་དུས་ཀྱི་བགྲོད་མཚམས་གང་ཡིན་མ་ཤེས།།

ཛ་དྲག་འཁོར་བའི་ལས་ཀྱི་གནས་སུ་ཞུགས་ན།།

ཝ་བཞིན་ངོ་ཚ་མེད་པའི་གཡོ་སྒྱུ་བྱེད་འོངས།།

ཞ་འཐེང་ལུས་ཀྱི་འབྱུང་བཞིན་རྒུད་ཀྱིས་ཁྱེར་ཀྱང་།།

ཟ་འདོད་སྲེད་པའི་འཆང་ཐག་ལྷོད་ཐབས་མི་འདུག།

འ་ཆད་འུ་ཐུག་སྐྱོ་བའི་སྨྲེ་ངག་འདོན་བཞིན།།

ཡ་ཁུང་མིག་ཆུས་བརླན་པའི་ངང་ཚུལ་ཤོར་བ།།

ར་མ་ལུག་སྐད་བཤད་པའི་དྲྭ་སྒང་ཉུལ་ནས།།

ལ་ལུང་ཀུན་གྱི་འཚོ་བར་ལྟད་མོ་གཡེང་དུས།།

ཤ་ཁྲག་ཟས་སུ་སྤྱོད་པའི་མི་རིགས་ཤིག་གི།

ས་ཆ་སྤང་ཐང་ཡངས་པོ་གང་ནས་ཡིན་བསམ།།

ཧ་བོ་ཡུལ་ལྗོངས་སྐྱིད་པོ་འདི་རུ་ལྷགས་ན།།

ཨ་ཐང་ཆད་པའི་སེམས་འདི་གསོས་ཐབས་ཡོད་འདོད།།

ཧ་ཧ་རང་སེམས་རླུང་ལ་བདག་པོ་མེད་ན།།

ཨ་ཆེན་ཐང་ལ་སྲེད་པ་གོང་འཕེལ་གྱུར་འགྲོ།།

༼ སྒང་ཁྱུང་སྐྱེས། ༽