འོད་མདངས་གསེར་གྱི་མདོག་དང་འདྲེས་པ་ཡི།།
ནམ་མཁའི་སྤྲིན་དཀར་དལ་དལ་རབ་སྤྲོས་ནས།།
ཕུན་ཚོགས་ནགས་ཀློང་ལྡེམ་པའི་བསིལ་ཟེར་གྱིས།།
སྟོན་གྱི་དུས་ཚིགས་བསུ་བའི་བརྡ་རྟགས་གནང་།།
ནུབ་ཁའི་ཉི་མས་ཕྱི་མིག་ལྟ་བཞིན་བཞུད།།
གྲིབ་མས་བསེར་བུ་ཁྲིད་ནས་ཁོང་འདར་བསླངས།
སྟོན་གྱི་རླུང་བུར་འགྲོགས་པའི་སེམས་གཞུང་ལ།།
སྡོང་ལོ་སེར་པོས་མཚོན་པའི་སྐྱོ་ངལ་སྤུངས།།
རླུང་བུས་དེད་པས་ལྗོན་པའི་ལོ་མ་སྤུར།།
ནང་སེམས་འཁྱག་གིས་ཟོས་ཀྱང་བྱ་ཐབས་ཅི།།
རི་ལུང་བྱད་བཞིན་འགྱུར་བའི་སྣང་བརྙན་གྱིས།།
དྲན་པ་རིང་མོ་འདི་ཡིས་སྔམ་རིང་ཤོར།།
བཅུད་ལྡན་འཛིན་མའི་ཁྱོན་གྱིས་ལེགས་བསྐྲུན་པའི།།
རྐང་དྲུག་བུང་བའི་ཁྱུ་ཡིས་རབ་འཁྱུད་པའི།།
སྤང་ཐང་གཡུ་ལེགས་བཀོད་པའི་མེ་ཏོག་དག །
སད་དང་སེར་བས་བཅོམ་པ་སྐྱོ་བའི་གནས།།
སྤྲིན་བྲལ་ལྷ་ལམ་ངོགས་ཀྱི་ཟླ་གཞོན་མས།།
སྐམ་ཞིང་རྒུད་པའི་ལྕང་སྡོང་སེར་པོའི་འོག །
འཆར་ཡན་སྒྱུ་རྩལ་གཤིས་ལ་གོམས་པ་ཡི།།
མ་བཅོས་འཇིག་རྟེན་སུ་ལ་བསིལ་བ་བྱིན།།
དབྱར་གཞོན་ལང་ཚོ་དར་མའི་འཇོ་སྒེག་ཡལ།།
གསེར་ལྡན་མུན་པའི་འདུ་ཆེན་མཁའ་ལ་འཁྲིགས།།
མཚན་ལྗོངས་ཟླ་བའི་གཟུགས་རིས་འཛུམ་པ་ཡིས།།
འདས་སོང་དྲན་པའི་གཟུགས་བརྙན་སེམས་ལ་འཆར།།
བྱ་ཁྱུ་གཤོག་རྡང་སྦྲེལ་ནས་བྱང་མཐར་མགྲིམ།།
གསེར་མདོག་ལོ་མའི་རང་ལུས་ས་ལ་ཟག །
ཤིང་སྡོང་རྩེ་མོ་འགུལ་བའི་སྐྱོ་གཞས་ཀྱིས།།
ཡིད་ལ་ན་བུན་འཁྲིགས་པ་ལན་གཅིག་མིན།།
རི་འགོ་སྨུག་པའི་རྡུལ་དག་རིམ་བཞིན་འཇགས།།
སྐེད་པ་གཡུ་ཕྲེང་ལྗོན་པའི་ནགས་ཀླུང་ཞིག །
དྭངས་གཙང་ཆུ་ཤེལ་འཛུམ་པའི་གཟུགས་རླབས་ཀྱིས།།
ཡིད་ངོགས་མི་བརྟན་འགྱུར་བའི་བརྡ་ཞིག་བསྟན།།
༼ རིགས་ཀྱི་ཐ། ༽