ཐབས་མཁས་ཐུགས་རྗེ་འགྲོ་ཀུན་རྗེས་འཛིན་མ།།
སྟོན་ཟླ་རབ་རྒྱས་དཔལ་ལས་ལྷག་པར་མཛེས།།
ཐབས་ཤེས་ཟུང་ལྡན་དབྱངས་ཅན་ལྷ་མོ་ལགས།།
གུས་པས་འདུད་དོ་སྙན་ངག་སྦྲང་ཆར་སྩོལ།།
དཔྱིད་དཔལ་གསུང་གི་རང་སྒྲ་ཐོས་འཛིན་བཅུད།།
སྙིགས་དུས་འགྲོ་བའི་སྐྱབས་ཀྱི་མགོན་པོ་རྗེ།།
མ་དག་སྲིད་པའི་གྲོང་ལས་འདྲེན་མཛད་མ།།
ཐུགས་རྗེ་ལྕགས་ཀྱུའི་ཞགས་ཐོགས་འཕགས་མ་ལགས།།
འཛུམ་ཞལ་ཆུ་སྐྱེས་པདྨོའི་མདངས་ལ་རྩེན།།
ཚངས་དབྱངས་སྙན་པས་རྨོངས་མུན་རྩད་ནས་འཇོམས།།
འཛུམ་མདངས་མངོན་པར་བཞད་པའི་གེ་སར་ཕྲེང་།།
ཚངས་སྲས་ལྷ་མོར་གུས་ཕྱག་ལན་བརྒྱར་འདུད།།
སྒྱུ་འཕྲུལ་དབྱངས་ཀྱི་མེ་ཏོག་ཁྲ་ལེར་བཀྲམས།།
ལང་ཚོའི་གཟི་འོད་ཉི་ཟླའི་སྐུ་ཕྲ་བ།།
རིག་བྱེད་རྒྱུ་མངས་དཀྲོལ་བའི་ལྷ་མོ་ཀྱེ།།
མཆོད་བསྟོད་ངག་གི་ཕྲེང་བ་ཆད་མེད་འདྲེན།།
དབྱངས་ཅན་སྐུ་ཡི་ཟླ་གཞོན་མཛེས་པའི་མདངས།།
མ་ལྟར་བརྩེ་བས་རིགས་དྲུག་ཀུན་ལ་གཟིགས།།
ལྷ་ལམ་ཡངས་པའི་འཇིག་རྟེན་གཉིས་པ་རུ།།
སྙན་ངག་ལམ་ལ་འདྲེན་མཁས་དབྱངས་ཅན་མ།།
དབྱངས་གསལ་སོ་བཞིའི་སོ་ཕྲེང་མངོན་པར་བཞད།།
དབྱངས་གཅིག་གིས་ཀྱང་གདངས་ཀུན་ཟིན་གྱིས་གནོན།།
དབྱངས་ཀྱི་ཞལ་བཟང་པདྨའི་དྲི་བསུང་ཅན།།
དབྱངས་ཅན་ལྷ་མོའི་སྐུ་གསུང་ཐུགས་ལ་འདུད།།
༼ རིག་རྫི་བསམ་གཏན། ༽