འཛུམ་དཀར་ཟླ་བ་རྒྱས་པའི་ཕ་མཐའ་ན།།
དྲན་གདུང་ཚོར་བས་བརླན་པའི་སྟངས་ཀ་ན།།
ཡིད་ལ་དབང་མེད་ཟུག་པའི་བརྩེ་བའི་གྲོགས།།
མ་བཅོས་དྲན་པའི་སྨེང་བ་ཕྱོགས་སུ་ཤོར།།
དབྱངས་བདུན་ངག་གི་རོལ་ཆ་དཀྲོལ་བ་ནས།།
ཚིག་སྦྱོར་མེ་ཏོག་དཀར་དམར་རྒྱུ་བའི་སར།།
ཁྱོད་ནི་གསུང་ཞིམ་འཐུལ་བའི་འཇོ་སྒེག་མཁན།།
ཞུ་འཕྲིན་མུ་ཏིག་རྡོལ་བའི་འཁྲིས་སུ་བཞད།།
མཛེས་མཛེས་ལང་ཚོའི་ཆེ་བ་སེམས་སུ་ཡོད།།
ཟབ་ཟབ་དུང་བའི་སྙིང་གཏམ་མཉན་ནས་ཡོད།།
དཀར་དཀར་བཞིན་རས་འདྲེན་པའི་དཔལ་དུ་རོལ།།
ལྡེམ་ལྡེམ་ལུས་ཀྱི་འཁྲི་ཤིང་ཡིད་ལ་སྒོམ།།
ཁྱོད་རང་བརྩེ་བས་འཛུམ་པའི་སྤང་ལྗོངས་སུ།།
ང་རང་གྲོགས་མེད་གཡུ་སྦྲང་བུང་བ་བཞིན།།
སེམས་ནས་སྐྱབས་བཅོལ་བྱས་པ་དང་བླངས་པས།།
ཡིད་འདི་དགའ་ཞིང་སྤྲོ་བའི་ཞིང་ལ་དྲངས།།
མ་བཅོས་རིང་དུ་གནས་པའི་གཤིས་བཟང་དེ།།
སྲིད་འདིར་བདག་གི་བགོ་སྐལ་བྱུང་བས་ཚིམ།།
ངས་ཀྱང་གཡོ་ཅན་བརྫུན་གྱིས་མ་བསླད་པའི།།
བརྩེ་བའི་སྙིང་གཏམ་ཟབ་མོ་ཁྱོད་ལ་བསྔགས།།
རྒྱག་རིང་བྱེ་ཐང་ཞིག་ནས་ཁེར་རྐྱང་དུ།།
ལན་ཅིག་འཚོ་དུས་མི་སེམས་སྟོང་ན་ཡང་།།
ལོ་དེར་ཁྱོད་རང་རྙེད་པའི་དུས་བཟང་ནས།།
ཁེར་རྐྱང་སྐྱོ་བའི་གདུང་ཡུས་ཆུ་ལ་བསྐུར།།
རང་བྱུང་སྐྱེད་ཚལ་སྒེག་མོའི་འདབས་རོལ་ནས།།
དུས་ཀྱི་འགྱུར་བ་མེད་པར་ཁྱོད་རང་ནི།།
བརྩེ་བའི་འདབ་མ་ཐོར་ནས་བཞད་པ་དེ།།
ང་ཡི་མི་ཚེའི་ནང་གི་རྟེན་སྐལ་ཡིན།།
ཁྱོད་ནི་ནམ་མཁའ་ཡངས་པའི་ཕ་མཐའ་ནས།།
སྟེང་འཕུར་དང་ནི་འགྲོགས་ནས་མི་འགྲོ་བར།།
རྟག་བརྟན་བདག་ལ་ཟུར་མིག་ཡུན་གཏད་ནས།།
ང་ཡི་མཐོངས་སུ་ནམ་ཡང་འཛུམ་པར་གནངས།།
དེ་ལྟ་མོད་ཀྱི་འཇིག་རྟེན་སྤང་གི་གཞུང་།།
དགའ་སྐྱོའི་གཞས་ཆུང་ང་སར་ཡུན་འགུགས་ནས།།
འདྲེན་པའི་དཔལ་གྱུར་དར་བབ་ལང་ཚོ་དག།
གང་གིས་སྒྲིབ་མེད་གསལ་པོར་མཐོང་བས་སྐྱིད།།
༼ ཁམས་ཟླ་སྲས། ༽