མཚན་གུང་རྨི་ལམ་དུ་མེ་ཏོག་བཀད་འདུག།
དྲན་པ་རབ་རིབ་ལ་དབྱར་ཁ་ཚེས་འདུག།
མཁུར་གོང་མུ་ཏིག་ནི་འཁྱག་རོམ་གྱུར་འདུག།
ཁེར་རྐྱང་སྣང་བ་ལ་རྩྭ་སྐྱ་སྐྱེས་འདུག།
སྟོན་ཀའི་རླུང་ཡན་དང་སྡེབ་པའི་སེམས་པ།།
དྲོ་གྲང་གང་ཡིན་ལ་ངེས་གཏན་མེད་འདྲ།།
སྐབས་འཕྲལ་འདུ་འཛི་ཡི་མེ་ལྕེ་འཇགས་རྗེས།།
ཁང་ཆུང་གྲུ་བཞི་ཡི་དྲོད་ཁོལ་ཡལ་ཚར།།
ཡུན་འདྲིས་གནས་མལ་ལ་འཁྱག་སྣང་སྐྱེས་བྱུང་།།
གཞོན་མེད་རྒས་མེད་ཀྱི་ལོ་ཟླ་རྫོགས་ཚར།།
སྟོན་མིན་དགུན་མིན་གྱི་ནམ་ཟླ་སླེབས་ཟིན།།
ང་ཡང་སྟོན་མཇུག་གི་ཁྲུང་ཁྲུང་ཡིན་དགོས།།
རྒྱང་སྐྱོད་རྨི་ལམ་གྱི་བཟི་ཁ་ཡོད་དགོས།།
བད་དང་ལྷགས་རླུང་གིས་སད་པ་མི་འོས།།
ཐུང་ཐུང་ཚེ་སྲོག་འདི་གསེར་གྱི་རྟེའུ།།
མྱ་ངན་རྡོག་ཁྲེལ་གྱིས་མནར་ནས་ཅི་བྱེད།།
སྡུག་བསྔལ་གྲངས་འདྲེན་གྱིས་སུ་ལ་ཅི་ཕན།།
ང་ནི་ཤིང་ལོ་བཞིན་མཁའ་རུ་འཕུར་འདོད།།
གཡའ་དག་ནམ་མཁའ་དང་ས་གཞི་སེར་པོ།།
སྟན་དང་འཕྱོར་གོས་ཀྱི་ཚུལ་དུ་རྒྱན་འདོད།།
ལོ་ཟླའི་བང་སོ་ཡི་ཕྱིར་དྲན་བསྔོགས་ན།།
མི་ཚེའི་འགོ་མཇུག་ལ་འགྲེལ་བཤད་བོར་འགྲོ།།
འདི་ནས་མདུན་ཐད་ཀྱི་ལས་ལམ་བསམ་ཚེ།།
དགུན་ལ་དགུན་རྩེག་གིས་ཚེ་ཚད་ཚར་འགྲོ།།
རྨི་ལམ་ཐུན་གཅིག་ལས་སྐྱིད་ཡུན་མེད་ཀྱང་།།
སྤང་རྒྱན་མེ་ཏོག་བཞིན་ང་རང་བཞད་དགོས།།
ལང་ཤོར་ཀུན་རྟོག་གི་རྟ་ཕོ་སྔོ་སྐྱ།།
དྲན་ཤེས་སྲབ་སྐྱོགས་ཀྱིས་དུལ་བ་མི་འདུག།
འཁོར་བའི་ཉིན་སྲིབ་ནས་འཚེར་སྐད་ལྷང་ལྷང་།།
རྔ་རྔོགས་ལིང་ལིང་གི་གཞོན་ཉམས་སྣ་ཚོགས།།
དུས་ཀྱི་ཁེ་གྲི་ཡིས་འབྲེག་པར་ངེས་ཀྱང་།།
སྟོན་ཁ་རེ་ཟུང་ཞིག་རྡོག་པས་གཞལ་ན།།
འུ་གཉིས་རྒས་སོང་ཡང་འགྱོད་རྒྱུ་མི་འདུག།
ངང་པ་ཁེར་འཁྱམ་ཞིག་མཚོ་ཁར་ལུས་འདུག།
སྨུག་པ་བན་བུན་ཞིག་རྒྱང་ལ་འཁྲིགས་འདུག།
གངས་ཆར་འདྲེས་མ་རེ་འབབ་རྒྱུ་ཡོང་འདྲ།།
བསིལ་རླུང་འཇམ་པོ་ཡིས་ངོ་གདོང་རེག་བྱུང་།།
སྟོན་ཁ་སེམས་ངོགས་ནས་རྙེད་པ་མིན་ནམ།།
མེ་ཏོག་རྙིད་རྗེས་ཀྱི་སྦྲང་མ་ཤི་བོ།།
མཚན་མོའི་རྨི་ལམ་དུ་འཕུར་སྐྱོད་བྱས་བྱུང་།།
བརྩེ་བའི་གཏམ་རྒྱུད་ཀྱིས་གཉིད་ཐུན་བཅག་སོང་།།
མུ་འབྲེལ་ཟློས་གར་གྱི་ལེ་ཚན་འཁྲུགས་འདྲའི།།
ཡུལ་དུས་ངེས་མེད་ཀྱི་དྲན་ཤེས་སྣ་ཚོགས།།
དཀར་དམར་ཁ་དོག་གི་ལྷན་པ་མང་ཡང་།།
བརྩེ་བའི་སྒེའུ་ཁུང་ལས་རྙེད་པའི་ཡུལ་སྡེ།།
ཕ་ཡུལ་ཆུང་ཆུང་དེའི་སྟོན་གྱི་གྲོང་ཚོ།།
ནམ་ཡང་བརྗེད་མེད་ཀྱི་སེམས་པའི་རྒྱལ་ས།།
ལོ་ཟླའི་ཉག་ག་ནས་བཏུས་པའི་མེ་ཏོག།
འདང་ཆེན་ཆུང་འདྲིས་ལ་ཕུལ་བའི་ལག་རྟགས།།
དུས་ཀྱི་གཙང་པོ་ཡིས་གཏན་དུ་སྦས་ཏེ།།
ང་རང་གཞན་འགྱུར་གྱི་གྲིབ་མས་བཟོས་ཀྱང་།།
དྭངས་གཙང་ནམ་ཟླ་འདིས་གསལ་འདེབས་བྱས་བྱུང་།།
ཤང་ཤང་ཆུ་མོ་ཡིས་གཏམ་རྒྱུད་འཆད་བྱུང་།།
སྟོན་ཁའི་ས་སྲོད་ལ་རྣ་བ་གླགས་ན།།
མི་ཚེའི་སྐྱིད་སྡུག་ལ་ངེས་མེད་གསུངས་བྱུང་།།
མངར་སྐྱུར་དྲོ་བ་ལ་ཚད་མེད་གསུངས་བྱུང་།།
༼ ཞོགས་རྫ་རྔ། ༽