ཡངས་པའི་ས་ཆེན་ཉི་འོད་ལྷུང་བའི་ཚུལ།།
ཡིད་ཀྱི་ལྗོན་པ་དམར་སེར་ལི་ཁྲིའི་མདོག།
ཁྲུང་ཁྲུང་ལྷོ་རུ་འཁྲེང་བའི་ད་ཚོད་ལ།།
ཁྱོད་ཀྱི་ལང་ཚོའི་མེ་ཏོག་བཞད་ནས་བྱུང་།།
སྤྲིན་དཀར་འོ་མ་འཕྱུར་བའི་རི་རྩེ་ནས།།
གཟུགས་མེད་བསིལ་འཇམ་རླུང་བུས་ཤུགས་གླུ་ལེན།།
སྦྲང་ཆར་ཟིམ་ཟིམ་འཇོ་བའི་རྩྭ་ཐང་ནས།།
ཡིད་འོང་སྤང་རྒྱན་ཁྱེད་ཀྱི་འདབ་མ་རྒྱས།།
མི་ཚེའི་དར་རྒུད་རླུང་ཁའི་དར་ལྕོག་བཞིན།།
ལོ་ཟླའི་འཕོ་འགྱུར་ཞེ་ཡིས་མི་དཔོག་ཀྱང་།།
རྣམ་དག་སྨོན་ལམ་ཞིག་གི་མཐུ་འོག་ན།།
འུ་གཉིས་སྔར་བཞིན་བདེ་བར་གནས་འདི་སྐྱིད།།
བརྒྱ་ཁྲག་རི་ཆུས་རིང་དུ་བཀར་ཀྱང་རུང་།།
ཐུག་འཕྲད་རྨི་ལམ་དེ་བས་དཀོན་གྱུར་ཀྱང་།།
སྐྱིད་སྡུག་ཆུ་བོ་འདྲེས་པའི་ལས་སྐལ་འདིས།།
ང་ཡི་རེ་བའི་ནང་སེམས་གང་ནས་ཡོད།།
འཇིག་རྟེན་འཚོ་བར་དོ་སྙོམས་མི་སྲིད་ཅིང་།།
ཐམས་ཅད་དབང་བའི་ལས་སྐལ་ཆུང་བས་ན།།
གཞན་གྱི་བདེ་བར་ཡིད་སྨོན་མི་གནང་བར།།
གུ་ཡངས་སེམས་ཀྱི་འཚོ་བ་རོལ་དང་ཀྱེ།།
འཁོར་བ་གཏེར་དུ་སྦས་པའི་གསང་བ་འདྲ།།
བྱ་དངོས་མཐོངས་སུ་རྒྱུ་བའི་སྤྲིན་པ་བཞིན།།
འདིར་སྣང་ཆོས་ལ་ཡིད་རྟོན་མི་འདུག་མོད།།
འུ་གཉིས་སྣང་བ་མཐུན་པ་འདི་གས་ཆོག།
འབྱུང་འགྱུར་ལོ་ཟླ་གྱ་གྱུ་མོད་ན་མོད།།
ཨ་གསར་གཏམ་གྱི་ལྷུ་ལྷག་ཁྱོས་མ་སྒྲིགས།།
ངོ་གཉིས་མི་ཡི་ཟློས་གར་ངས་མི་འཁྲབ།།
ལྷད་མེད་བརྩེ་བ་འདི་ལ་གཅེས་སྐྱོང་གལ།།
ཁྱོད་ཉིད་ལྔ་ཟུང་རིག་པའི་སྐྱེད་ཚལ་ན།།
ཤེས་བྱའི་མེ་ཏོག་སྦྲང་མས་རྩི་ལེན་བཞིན།།
ང་ཡང་དགེ་ལེགས་འདབ་མ་འཁྲུངས་པའི་ཞིང་།།
མི་ཚེའི་ཁ་ཕྱོགས་སྔར་ལས་མཛེས་པར་སྨོན།།
༼ འོད་འཛིན་མ། ༽