ཀ་ཁའི་མགྲིན་གླུ་སྙན་མོ་ངག་ཏུ་བཀུག།
ཁ་ཚིག་ཞི་ལྷོད་འཇམ་པོས་སློབ་སྟོན་གནང་།།
ག་ས་གང་དུ་སོང་ཡང་བརྩེ་བས་གཟིགས།།
ང་ཡིས་བཤེས་གཉེན་དམ་པར་ནམ་ཡང་གུས།།
ཅ་ཅོའི་ཚིག་ལ་མི་མཁས་ཡང་དག་གསུང་།།
ཆ་རྒྱུས་ལས་ལ་བརྩོན་པའི་དམ་པ་སྟེ།།
ཇ་ཡུན་དུས་ཀྱང་སློབ་བུར་སྤྱན་གྱིས་གཟིགས།།
ཉ་རྒྱས་ཟླ་བའི་མདངས་ལས་དགེ་རྒན་མཆོག།
ཏ་ཐཱ་ག་ཏའི་བསྟན་པར་ཐུགས་བསྐྱེད་དཀར།།
ཐ་མལ་སྤྱོད་ལམ་ཚོགས་ལས་རྒྱལ་བའི་སླད།།
ད་ལྟ་སྐད་ཅིག་ཙམ་ཡང་སློབ་བུར་གཟིགས།།
ན་གཞོན་སློབ་བུ་ཚོགས་ལ་དྲིན་ཆེན་ཨང་།།
པ་རི་པི་རི་མིན་ཞིང་བརྟན་བརླིང་མཐུག།
ཕ་སྐད་མ་ཡིག་གཉིས་ལ་ཐུགས་སྙིང་དགྱེས།།
བ་འོ་དཀར་པོའི་མདོག་ལྟར་སློབ་བུར་བྱམས།།
མ་ཡུམ་སློབ་གླིང་དབུས་ནས་བཀའ་དྲིན་དྲན།།
ཙ་ཀ་ལི་ཡི་མཛེས་སྡུག་གསལ་ཡོད་མོད།།
ཚ་ཟེར་ཉི་མའི་དྲོད་ཐིགས་འཇམ་ན་ཡང་།།
ཛ་དྲག་དུས་ལས་རྙེད་དུས་དཀའ་བའི་མི།།
ཝ་མོའི་སྤྱོད་ལམ་སྤངས་པའི་དགེ་རྒན་རྒྱལ།།
ཞྭ་ལྟར་གཙུག་ཏུ་བཀུར་འོས་ཁྱེད་འདྲ་དཀོན།།
ཟ་ཟིའི་སྤྱོད་ལམ་བྲལ་བ་ཁྱེད་བཞིན་ཉུང་།།
འ་འུར་རིང་ནས་ཟད་པ་ཁྱེད་མཚུངས་སུ།།
ཡ་རབས་མཁས་པ་དག་ལས་སུ་དང་འགྲན།།
ར་བ་གངས་ཅན་ལྗོངས་ཀྱི་ཡུལ་གྲུ་ནས།།
ལ་རྒྱའི་སེམས་སྤོབས་མཐུག་པའི་དམ་པ་དང་།།
ཤ་རུས་རིགས་ལ་འཆང་བའི་དགེ་རྒན་ཞིག །
ས་སྟེང་འདི་ནས་བཙལ་ཀྱང་ཁྱེད་ལས་མེད།།
ཧ་ཅང་བྱམས་པ་ཆེན་པོས་སློབ་བུ་སྐྱོང་།།
ཨ་ལོང་བརྩེ་བའི་རང་གཟུགས་ཉེ་རིང་བྲལ།།
ཧ་ཧ་དགོད་སྒྲ་དང་བཅས་ཐུགས་རྗེ་ཡངས།།
ཨ་ཧོའི་གདངས་ལ་སྦྱར་ནས་བཀའ་དྲིན་ཞུ།།
རྗོད་བྱེད་ཚིག་ཏུ་དྲངས་པ་མི་མཛེས་རུང་།།
བརྗོད་བྱ་སེམས་ཀྱིས་བྲིས་པས་རབ་ཏུ་ཡག།
བརྗོད་ན་གྲངས་ཀྱིས་ལོངས་མི་སྲིད་ཅིང་།།
བརྗོད་པ་དྲང་པོར་སྨྲས་པས་ཅིས་མི་བཟང་།།
ཡུན་རིང་སྐྱོང་བའི་ངལ་བ་གཟུགས་གྲུབ་ན།།
ས་གཞི་རབ་ཏུ་ཆེ་ཡང་ཤོང་དུས་དཀའ།།
དྲིན་ཆེན་དགེ་རྒན་མཆོག་ལ་སྙིང་དབུས་ནས།།
བཀའ་དྲིན་ཚིག་གི་མེ་ཏོག་སེམས་ཀྱིས་ཕུལ།།
༼ ཁམས་འོད་གསལ། ༽